13
Òta nteme
1 Eyi môre òso mgbọ ita mbanu inikpọ enyi. Ìkeek inu Ikpa Mbuban otumube ibe, “Ogwu itumu ikọ itoon̄ ene, môkaan̄ ebi ata-ikọ iba mè ìre ita isa irọ ikọ kan̄ inye.”a 2 Me òso mgbọ iba nnube inikpọ enyi, ntaba ubọk me utọn̄ ebi ìrọrọ ijo inu mè ebi ofifi ene si. Mgbọ keyi nkakupge melek kinyi isi mè isi, mâkpọk itaba enyi ubọk me utọn̄ si ibe, nsinu, ke m̀kpalọlọ isusulu ene geelek òrọrọ ijo inu osusut. 3 Mije, enyi ekiweek ibe emi ǹjeen̄ enyi inu ijejeen̄, eyi enyi mêsabe iriọọn̄ ibe ke îre Karais okitumu ikọ inan̄a me otu n̄a. Karais ìkawọ lek me inu geelek îkirọ melek kinyi, ire, ìkijeen̄ unye kan̄ me etete kinyi. 4 Me atikọ, egon ọmọ ikpan̄ me inyọn̄ uti nkwurieen̄ kubọk ogwu uwọ-lek, ire, ìkiluk ugwem mgbọ keyi sa me unye eyi Awaji. Ikeya si, eji ebi eyi kan̄, eji mîwọ. Ire, eji ekigọọk Karais iluk ugwem si sa me unye eyi Awaji, inyi eji ekọt esi ikwaan̄ enyi enyi.
5 Ìwọlọ ugwem kinyi, mè ìtọ lek kinyi ìkpọ, mè ìre enyi òwa me emen ichechieek. Enyi mêweek imun̄ ibe ke Jisọs Karais ọmọ òwa me emen kinyi, îtata mè enyi ekikakan̄ ataak ibe ke enyi ìre ebi ìchechieek me lek kan̄. 6 Ntoon̄ ejit ibe ke enyi mêweek imun̄ ibe ke eji kpenan̄a irọn̄ me emen ntọ-mkpọ ya; ke eji ìre ata ebi otuchieen̄. 7 Mgbọ keyi, eji ekiriaak Awaji ibe mè enyi ekarọ inu geege ìlọ. Ìkare isasa ijeen̄ ibe ke eji mêkirọ ijaan̄. Ire, eji ekiweek ibe mè enyi ekerọ inu òtatat, ubọk geelek môkupbe me chieen̄ ebilene kubọk eji kpere ata ebi otuchieen̄. 8 Mije, eji kpebekọt irọ inu geege ikeme atikọ ya, kpan̄asi ikeya, eji ebekekeke inyi atikọ ya. 9 Eji mîkibele ejit mgbọ geelek lek kiji owọbe, eyi kinyi onyenye. Uriaak kiji ìre, mè Awaji irọ inyi enyi eso ifuk me emen ichechieek. 10 Îre mije keyi ke nge inu chi me ikpa ijet enyi mgbọ keyi nkakupge melek kinyi isi mè isi. Mije, nsinu, ǹkaweek isasa unye Okaan̄-ene onyibe emi kubọk ogwu otuchieen̄ irọ enyi inu me lek ikpak ikpak. Okaan̄-ene ìnyi emi unye yi ibe emi ǹsa ǹnama enyi m̀bene, ìkanyi ibe emi ǹsa m̀gbugbọ enyi ǹgwook.
Òta amọn
11 Eya orọ, bọn Nte n̄a ìriọọn̄ ubọk ìluk. Ìweek ubọk enyi mêkọtbe iluk ugwem òsoso ifuk, ìgban̄ utọn̄ me lek nteme n̄a. Ìluk me ejit ge, mè ìluk me esuuk. Awaji ogwu imumechieen̄ mè esuuk môkup melek kinyi. 12 Ìkat lek kinyi, mè ìtọp lek kinyi amọn, me oniin̄ òkup mbuban. 13 Otutuuk bọn Awaji mîtọp enyi amọn. 14 Atata nnwọn eyi Okaan̄-ene Jisọs Karais, mè imumechieen̄ eyi Awaji, mè mgbaan̄-ntitiin̄ eyi Ekwukwu Mbuban ikup melek kinyi otutuuk ene.