6
1 Eji kubọk ebi melek Awaji ekigbaan̄ isi ikwaan̄, eji ekibeek enyi ibe, ikamọnọ atata nnwọn Awaji, eyi enyi ebọkọbe, kubọk inu ikike. 2 Mije, Awaji ìtumu ibe,
“Me mgbọ înemebe emi ikakaan̄ ejit nsan me lek kinyi,
nnọ ida ito kinyi.
Ntap si ubọk inyi enyi
me usen nnyan̄abe enyi isibi.”a
Me atikọ, mgbọ keyi ore mgbọ înemebe Awaji ikakaan̄ ejit nsan me lek ene. Mgbọ keyi ore usen unyan̄a.
Usini ufialek Pọọlu obọkọbe me ikwaan̄ kan̄
3 Eji kpekeke ikwek oniin̄ ene geege. Eya orọ, eji kpeweek si ibe ene geege itumu ijo ikọ ofolek ikwaan̄ eji ekirọ. 4 Kpan̄asi ikeya, me inu geelek eji ekirọ, eji ekijeen̄ ibe ke eji ìre ebi ikwaan̄ Awaji me atikọ. Eji mîkaan̄ ikpele ukarajit mgbọ eji ekije itibi owuwa ufialek, mè esese uyọrọlek, mè ùrioon̄. 5 Mîsulu eji me njijan̄, mè itap eji mkpọn, mè idimi ama me ibot kiji. Eji mîsi unye ikwaan̄, mè itop chieen̄ iwele egwe owuwa usen, kpelaak ilaak, mè iran̄ ọfiọọn̄ owuwa mgbọ. 6 Eji ekijeen̄ si ibe ke eji ìre ebi ikwaan̄ Awaji sa me unye eyi Ekwukwu Mbuban, mè iluluk ugwem òtatana, mè ikakaan̄ ifuk-ibot, mè imeme owuwa inu, mè ikakaan̄ ata ejit, mè ikakaan̄ atalek imumechieen̄ me lek ene, 7 mè ilolook ata etip eyi atikọ sa me unye eyi Awaji. Eji ekaan̄ nroon̄ akọn̄ eyi ata irọrọ me ubọk agan̄ ulom mè ubọk agan̄ ujit ikisa itim akọn̄, mè ikisa ikput lek kiji. 8 Usini ene mîmin eji, usini ene ekpọkpọ eji chieen̄ isiki. Usini ene mîtọn̄ eji, usini ene efefieek eji ikọ. Eji ìre ebi atikọ, ire, ebi ene ekimọnọ eji kubọk ebi ofiaan̄. 9 Ebi ene mîriọọn̄ eji, ire, ekirọ kubọk eji kpere ebi eriọọn̄be. Eji ekup kubọk ebi ìkwakwaan̄, ire, eji òwa me ògat ugwem. Mîsulu eji kubọk ebekpakpan̄, ire, eji kpekwaan̄. 10 Eji mîkup me ufieejit, ire, eji ekibebele ejit mgbọ geelek. Eji ìre ebi ugbọọn̄, ire, eji mîtap owuwa ene ubọọn̄. Me chieen̄ ebilene, eji kpekaan̄ inu geege, ire, eji mîkaan̄ otutuuk inu geelek iso.
11 Bọn Nte kiji ebi Kọrint, eji echichili ejit kiji ibook itumu otutuuk atikọ inyi enyi, eji kpelet enyi inu geege. 12 Eji mîjeen̄ imumechieen̄ me lek kinyi, ire, enyi kpejeen̄ imumechieen̄ me lek kiji. 13 Mgbọ keyi, ǹkiteme enyi nteme kubọk enyi ìre nsabọn n̄a. Ìchili ejit ìjeen̄ imumechieen̄ me lek kiji, kubọk eji ekijeen̄ me lek kinyi, inyi mfeen̄ ikakup.
Ebi ìchechieek ekasa lek kiban̄ ìchim ìriaak me lek ebi ekachieekge
14 Ikasa lek kinyi ìchim ìriaak me lek ebi ekachieekge me lek kè Karais. Ìre keke ke ata irọrọ mè ijo inu egbaan̄ ikaan̄? Sà ìre utoon̄ melek udun ebejeje igbaan̄ ije? 15 Ìre Karais melek Yọk ebejeje igbaan̄ ichieek? Ìre ogwu òchechieek me lek kè Karais ìkaan̄ keke melek ogwu ikachieekge me lek kè Karais? 16 Ìre keke ke Uwu Mbuban Awaji ogbaan̄ ikaan̄ melek mkpọmfaka? Mije, eji ìre Uwu Mbuban Awaji ogwu òkup me ugwem. Awaji me lek kan̄ ìtumu ibe,
“Emi mâluk melek kiban̄, mè ikijijen̄e me etete kiban̄;
emi mâre Awaji kiban̄, ema mêre si ebi n̄a.”b
17 Okumugwem si onenitumu ibe,
“Eya orọ, ìnan̄a ìsibi me etete kiban̄, mè ìkup esese.
Ikatet ubọk me lek inu geege ikatanage me isi Awaji,
inyi emi m̀bọkọ enyi ǹtap.”c
18 Okumugwem Ogwu Òkaan̄ Unye Geelek ìtumu si ibe,
“Emi mâre Ute inyi enyi,
enyi mêre bọn n̄a ebirieen̄ mè bọn n̄a ebibaan̄.”d