18
Urọk nwakpa mè ogwu ibot oyerebet
1 Jisọs onenito urọk ge inyi ebi udun̄ kan̄, isasa ijeen̄ ema ibe ke îgbe ibe ema ekeriaak uriaak mgbọ geelek, mè ekawọ lek ibe ke Awaji ìkanyi ema ufọọk-otu. 2 Ìto urọk ya ibe, “Îkaan̄ ogwu ibot oyerebet ge òluk me ama ge. Ogwu ibot oyerebet ya ìkakilibi Awaji, ìkakinyi si ene geege isi. 3 Îkaan̄ si nwakpa ge òluk me ama ya, mè ikpọkpọ ikinu iniriaak ogwu ibot oyerebet ya ibe isibi oyerebet inyi ọmọ mè ogwu ochicha kan̄, inyi ọmọ ikaan̄ unen kan̄, mè inwọnọ me ubọk ene ya.
4 “Ogwu enenwaan̄ ya îsi me lek ogwu enerieen̄ yi owuwa mgbọ, mè isa igak, ogwu enerieen̄ yi ojijit. Ire, me mgburudun̄ mgbọ, ogwu ibot oyerebet yi onenibe, ‘Ubọk geelek ǹkakitet ukpook me lek Awaji, ǹkakinyi si ene geege isi, 5 ire, mije nwakpa yi okpọkpọ ikinu inikisisaak emi mgbọ geelek, mâsibi oyerebet ya inyi ogwu nwakpa yi, mè irọ inyi ikaan̄ unen kan̄, inyi ikayaka ìnu ìnisisaak emi ofifi.’ ”
6 Okaan̄-ene onenido ebi udun̄ kan̄ ibe, “Ìre enyi mînọ ikọ ijo ogwu ibot oyerebet ya otumube? 7 Ire ijo ogwu ibot oyerebet isibi unen oyerebet, mè inyi nwakpa ya unen kan̄, ìre enyi kpekeek ibe ke Awaji môsibi unen oyerebet inyi ebi îgobobe isibi inyi lek kan̄, ebi ìkitaan̄ ukpo ibeek ọmọ mbeek eririeen̄ mè ikarek? Ìre enyi ekikeek ibe ke Awaji môfiat mgbọ irọrọ mbeek ebi kan̄ ebeekbe ọmọ? 8 Me atikọ, Awaji ìkpofiat mgbọ kubọk ge. Môsibi unen oyerebet inyi ife cha, mè imun̄ ibe ke ema mîkaan̄ unen kiban̄ ugwat ugwat. Ire, ubọk geelek, mgbọ Gwun̄ Ebilene môkpọkbe inu, ìre mônimun̄ ebi ìkakaan̄ ichechieek me linyọn̄ yi?”
Urọk ogwu Farisi mè ogwu òkibọkọ otitip ido
9 Me ere ya ema ekupbe, îkaan̄ usini ene ebi ìtotoon̄ ejit ibe ke Awaji îbọkọ ema itap, mije ata irọrọ kiban̄, mè ikikpọ ebi ofifi ene chieen̄ isiki.
10 Jisọs onenito ofifi urọk inyi ife chi ibe, “Ebirieen̄ iba eninan̄a ije isi Uwu Mbuban ibesi iriaak uriaak. Ene ge ìre ogwu Farisi, ogwulọ ore ogwu òkibọkọ otitip ido. 11 Ogwu Farisi ya odada lek ibọkọ ikeke esese, mè ikiriaak uriaak ibe, ‘Awaji owu onirọ, mije, emi ǹkakup kubọk otutuuk ebilene, ebi ìkibọkọ ene inu me unye, mè ikifeen̄ ene, mè ikigan nwa ene. Ògak ge, owu onirọ, mije, emi ǹkakup kubọk ogwu otitip ido yilọ. 12 Eyi n̄a, ǹkijin otu mgbọ iba me nde geelek, mè ikikpe irek ge me etete akọp irek me otutuuk inu geelek nkibọm.’
13 “Ire, ogwu òkibọkọ otitip ido ya okekeke me ujọn̄ọ ere. Ìkakọt ìbene chieen̄ ìkpọ inyọn̄. Kpan̄asi ikeya, ìsisiki lek kan̄ me ijọn̄, mè ikisulu ubọk me ejit, mè ikitumu ibe, ‘Jei Awaji, emi ìre ogwu ijo. Soso, kaan̄ ejit nsan me lek n̄a.’ ”
14 Jisọs onenitumu inyi ema ibe, “Me atikọ, ǹkitumu inyi enyi ibe, me etete ife cha ene iba, ogwu òkibọkọ otitip ido ya ore ogwu òrọrọ inu òtatat me isi Awaji. Ogwu Farisi ya ìkarọ inu òtatat me isi Awaji. Mije, ogwu òbebene lek kan̄, ene ya ke mêsiki. Ire, ogwu geelek òsisiki lek kan̄ me ijọn̄, ogwugwa ke mêbene ifo inyọn̄.”
Jisọs îgbana asa nsabọn
(Mat 19:13-15; Mak 10:13-16)
15 Me ike mgbọ ya, ebi ene ekekisa asa nsabọn kiban̄ ijet Jisọs ibe ichak ubọk me lek, mè igbana. Mgbọ ebi udun̄ kan̄ emun̄be ebi ife cha, ema ebebene ikigana ikọ inyi. 16 Ire Jisọs ogwegwen asa nsabọn cha iriaak me lek kan̄, mè itumu inyi ebi udun̄ kan̄ cha ibe, “Ìtele inyi asa nsabọn enu me lek n̄a, ikakput ema, mije, îre ebi ìkup kubọk asa nsabọn chi ke mkpulu eyi Awaji okup inyi. 17 Me atikọ, ǹkitumu inyi enyi ibe, ene geelek ikabọkọge mkpulu eyi Awaji ìtap kubọk sọntiik gwun̄, ìkpokọt inin̄ mkpulu ya.”
Mfufuk ogwu ibot òbọbọọn̄ ubọọn̄
(Mat 19:16-30; Mak 10:17-31)
18 Usen ge, ogwu ibot ebi Ju ge onenido Jisọs ibe, “Ata Ogwu Ijejeen̄, ìre keke ke mârọ, mè ikaan̄ ugwem ikakaan̄ge itata?”
19 Jisọs obebe ọmọ, “Ìre keke orọ ogwenbe emi ata ene? Kpunu ene geege òrere ata ene, ilọ me lek Awaji gaalek. 20 Owu oriọọn̄ ibe ke Ikan ìtumu ibe, ‘Kagan nwa ene, kakpan̄ ene, kachiin̄ inọ, kakeke ata-ikọ ataak ìkeme ene geege, nyi nte kwun̄ mè nga kwun̄ umin.’a ”
21 Ene ya ofọfọọk ibe, “Emi ǹkisusun̄ Ikan kecha karake nkupbe sọntiik.”
22 Jisọs inọnọ ikọ ya, itutumu inyi ene ya ibe, “Kpọ, inu ge gaalek osik owu môrọbe. Si nyam otutuuk inu okaan̄be, mè sa ikpoko cha che nyi ebi ugbọọn̄, ke owu môkaan̄ inu ubọọn̄ me emen inyọn̄. Osinyam inu cha, mè isa ikpoko cha inyi ebi ugbọọn̄ isan̄a, gwu kom na gọọk emi.”
23 Mgbọ ene ya onọbe ikọ yi, ifefieek ejit enenen, mije, ọmọ ìre ene ogwu òbọbọọn̄ ubọọn̄ enenen. 24 Jisọs okpọkpọ ọmọ siì, mè ibe, “Môyọt enenen ebi ìbọbọọn̄ ubọọn̄ ininin̄ mkpulu eyi Awaji. 25 Môfet aligọ ijeje itibi chieen̄ alaga igak ogwu òbọbọọn̄ ubọọn̄ ininin̄ mkpulu eyi Awaji.”
26 Ikọ ya otetet lek otutuuk ebi ìnọnọ. Ema ekekibe, “Iyak, ire ikup ikeya, ìre ekene ke mênyan̄a?”
27 Jisọs ofọfọọk ema ibe, “Inu ebilene kpebekọt irọ, ìkire mfufet inu me lek Awaji.”
28 Pita onenitumu inyi Jisọs ibe, “Eyi kiji, eji mîtele otutuuk inu eji ekaan̄be, mè igọọk owu!”
29 Jisọs ofọfọọk ibe, “Iin̄, ǹkitumu atikọ inyi enyi ibe, ene geelek òtetele uwu mè ìre ogwu nwa, mè ìre ebi ngwan̄, mè ìre ute mè uga, mè ìre bọn, mije mkpulu eyi Awaji, 30 ene ya ìkpolọlọ ibọbọkọ inu òwawa igak echa me ukot keyi, mè iyaka ikaan̄ si ugwem ikakaan̄ge itata me mgbọ òkup me isi.”
Òso mgbọ ita Jisọs otumube ikọ ibak mkpa kan̄
(Mat 20:17-19; Mak 10:32-34)
31 Jisọs onenigwen akọp mè ebi udun̄ iba kan̄ ida ibọkọ, mè itumu inyi ema ibe, “Ìkpọ, Jeruselem ke eji ebesi. Eji isire ama ya, inu geelek ebi nriran egebe ofolek Gwun̄ Ebilene, môrọ iso. 32 Mêyaka ọmọ ìtap me ubọk ebi ekarege ebi Ju. Ife chi mêrọ ọmọ inu ochak, mè inu esip, mè icho ataak igwook ọmọ me lek, mè isulu ọmọ, mè ikpan̄ ọmọ. 33 Ire, òso egwe ita, ọmọ môjomo me mkpa.”
34 Ire, ebi udun̄ kan̄ kpekọt igobo ikọ cha geege itet, mije, Awaji îrọ mè ema ekakọt ìgobo inu cha ìtet. Sa me ikeya, ema kpekọt iriọọn̄ inu Jisọs okitumu ikọ ibak.
Jisọs îgwa ogwu ǹnàan̄ ge
(Mat 20:29-34; Mak 10:46-52)
35 Mgbọ Jisọs mè ebi udun̄ kan̄ ekije igbet Jeriko, ogwu ǹnàan̄ ge ọmọ òwa me agba oniin̄ ya okupbe ikibeek inu. 36 Mgbọ înọbe okput ene ekiraka, idodo ebi ene ibe mè ìre keke okirọ ye? 37 Ebi îdobe cha efọfọọk ọmọ ibe ke îre Jisọs ogwu Najeret okije iraka me lek oniin̄ ya.
38 Ogwu ǹnàan̄ ya obebene ikitaan̄ ukpo ibe, “Jisọs Gwun̄ kè Debit, soso to emi nsan!”
39 Ebi ìkije me ntut agan̄ isi egagana inyi ibe ichit otu. Ire, ogwu ǹnàan̄ ya okpọkpọ itet lek inye ikitaan̄ ukpo ibe, “Gwun̄ kè Debit, to emi nsan.”
40 Jisọs onọnọ ida ene ya, mè iyaka ikeke, mè inyi ida ibe esa ene ya ejet ọmọ. Mgbọ esabe inu, Jisọs, ododo ọmọ ibe, 41 “Ìre keke ke oweek ibe emi ǹrọ ǹnyi owu?”
Ene ya ofọfọọk ibe, “Okaan̄-ene, ǹkiweek isasa chieen̄ n̄a imọọn̄ inu!”