10
Ijejeen̄ ofolek iyayaak
(Mat 19:1-12; Luk 16:18)
1 Jisọs oneninan̄a me Kapanọm ije isi agan̄ Judia, mè isaba okwaan̄ Jodan. Ogbogbo ebi ene enunu si inikana ichit ọmọ. Ikekijeen̄ ema inu kubọk îkirọ me ere geelek îkisi.
2 Usini ebi Farisi enunu me lek kè Jisọs me ere ya inikiweek ileleke ọmọ ikọ me otu, mè inido ọmọ ibe, “Ìre Ikan kè Mosis înyi irek ibe ene ijit ogwu nwa?”
3 Jisọs oneniyaka ido ema ibe, “Ìre kpasi Ikan ke Mosis onyi enyi òfo me lek iyaak-nwa?”
4 Ema efọfọọk ibe ke Mosis ìnyi Ikan ibe, “Ogwu ibojit ogwu nwa, ige ikpa iyaak-olom inyi, mè ilap isibi.”
5 Jisọs onenitumu inyi ema ibe, “Mosis ìnyi enyi Ikan ya, mije, ejit kinyi minye. 6 Ire, me ibebene, mgbọ Awaji orombe otutuuk inu, Awaji ìrom enerieen̄ mè enenwaan̄.a 7 ‘Mije keyi, ogwu enerieen̄ môtele ogwu ute mè ogwu uga, mè isa lek kan̄ ichim iriaak me lek ogwu nwa, 8 ema ene iba mênenikana ire akpalek ge.b Sa me ikeya, ema kpeyaka ire ene iba ofifi, ema eyaka inire ge kpọi.’ 9 Eya orọ, inu Awaji ogbaan̄be ibuk, ene geege ikayiyala.”
10 Mgbọ ema egwube ikom ifo uwu, ebi udun̄ kan̄ enenido ọmọ ikọ ofolek iyayaak olom mè nwa ya. 11 Jisọs otutumu inyi ema ibe, “Ene geelek òjijit ogwu nwa, mè isi ido ofifi nwa, ene ya îrọn̄ ikan ugan-nwa ikeme ogwu nwa. 12 Ikeya si, ogwu enenwaan̄ geelek òyayaak ogwu olom, mè isi ibat ofifi enerieen̄ îrọn̄ ikan ugan-nwa ikeme ogwu olom.”
Jisọs îgbana nsabọn
(Mat 19:13-15; Luk 18:15-17)
13 Îkaan̄ ebi ene ìsasa nsabọn inu me lek kè Jisọs ibe itoon̄ ubọk me lek, mè igbana. Ire, ebi udun̄ kan̄ ekakan̄ inu inyi ebi ife cha. 14 Mgbọ Jisọs omun̄be inu ebi udun̄ kan̄ ekirọ, inanaan̄ ejit, mè itumu inyi ema ibe, “Ìtele mè nsabọn cha enu me lek n̄a, ikakput ema, mije, îre ebi ìkup kubọk nsabọn ke mkpulu eyi Awaji okup inyi. 15 Me atikọ, ǹkitumu inyi enyi ibe, ogwu geelek ikabọkọge mkpulu eyi Awaji ìtap kubọk nsabọn ekibọkọ inu itap, ene ya ìkponin̄ mkpulu ya kubọk ge.” 16 Jisọs onenikibeen̄ nsabọn cha ge ge ikaan̄, mè ikitoon̄ ema ubọk me lek, mè ikigbana ema.
Gwun̄ enerieen̄ òbọbọọn̄ ubọọn̄
(Mat 19:16-30; Luk 18:18-30)
17 Mgbọ Jisọs onan̄abe me ere ya isibi, mè ibene ikije ije kan̄ ifo isi, gwun̄ enerieen̄ ge olilibi inu, mè initọbọ ekpe me ijọn̄ me isi kan̄, mè ibe ọmọ, “Atata Ogwu Ijejeen̄, ìre keke ke mbarọ mè ikaan̄ ugwem ikakaan̄ge itata?”
18 Jisọs onenido ene ya ibe, “Ìre keke orọ mè owu ògwen emi ata ene? Kpunu ene geege òrere ata ene, ilọ me lek Awaji gaalek. 19 Owu oriọọn̄ ibe ke Ikan ìtumu ibe, ‘Kakpan̄ ene, kagan nwa ene, kachiin̄ inọ, kakeke ata-ikọ ataak, kafeen̄ ene, nyi nte kwun̄ mè nga kwun̄ ulibi.’c ”
20 Ogwu enerieen̄ ya ofọfọọk ọmọ ibe, “Ogwu Ijejeen̄, ǹkisusun̄ otutuuk Ikan kecha bene me karake ijija n̄a.”
21 Jisọs okpọkpọ ọmọ siì, mè ima ọmọ, mè inibe ọmọ, “Îkaan̄ inu ge òsisik owu irọrọ me ugwem kwun̄. Je fo, mè si nyam inu geelek okaan̄be, mè sa ikpoko ya nyi ebi ugbọọn̄, ke owu môkaan̄ inu ubọọn̄ me emen inyọn̄, mè gwu kom na gọọk emi.”
22 Mgbọ ene yi onọbe ikọ yi, isi kan̄ ogbugbugbolo. Ifefieek ejit, mè ije ifo, mije, ọmọ ìre ogwu òbọbọọn̄ ubọọn̄ enenen.
23 Jisọs oyayaka chieen̄ ikana ikpọ ebi udun̄ kan̄, mè itumu inyi ema ibe, “Môyọt enenen ebi ìbọbọọn̄ ubọọn̄ ininin̄ me mkpulu eyi Awaji.”
24 Ikọ ya otetet ebi udun̄ kan̄ ukpook enenen. Ire, Jisọs okpọkpọk itumu inyi ema ibe, “Ebi n̄a, ininin̄ mkpulu eyi Awaji ìre inu òyọyọt. 25 Aligọ ijeje itibi chieen̄ alaga îfet igak ogwu òbọbọọn̄ ubọọn̄ ininin̄ mkpulu eyi Awaji.”
26 Ikọ yi otetet ebi udun̄ kan̄ ukpook iraka iman̄. Ema ebebene ikidido lek kiban̄ ibe, “Ire ikeya, ìre ekene ke mênyan̄a?”
27 Jisọs okpọkpọ ema siì, mè itumu inyi ema ibe, “Me lek ebilene, inu keyi ìkpokọt imọnọ irek. Ire, ìkare ikeya me lek Awaji, mije, inu geelek îkup mfufet me lek Awaji.”
28 Pita onenibe Jisọs, “Kpọ, eji mîjuuk inu geelek eji ekaan̄be itele, mè igọọk owu.”
29 Jisọs obebe ema, “Me atikọ, ene geelek òtetele uwu kan̄, mè ìre ebi ngwan̄ ebirieen̄, mè ìre ebi ngwan̄ ebibaan̄, mè ìre nga kan̄, mè ìre nte kan̄, mè ìre nsabọn kan̄, mè ìre ijọn̄ uko kan̄ îkaan̄be, mije n̄a, mè mije ata etip yi, 30 ene ya môkaan̄ inu iwa enenen igak echi îtelebe. Ene ya ìbokaan̄ efit efit uwu, mè ngwan̄ ebirieen̄, mè ngwan̄ ebibaan̄, mè uga, mè nsabọn, mè ijọn̄ uko, mè ibọkọ si tukutuku, me linyọn̄ keyi, mè iyaka inikaan̄ ugwem ikakaan̄ge itata me ofifi inyọn̄. 31 Ire, owuwa ebi ìrere ebi adasi me mgbọ keyi mêkana ebi òta, owuwa ebi ìrere ebi òta me mgbọ keyi mêkana ebi adasi.”
Òso mgbọ ita Jisọs otumube ikọ ibak mkpa kan̄
(Mat 20:17-19; Luk 18:31-34)
32 Jisọs mè ebi udun̄ kan̄ enenikije me oniin̄ isi Jeruselem. Jisọs okije me isi, ebi udun̄ kan̄ ekekije igọọk ọmọ me udun̄. Ukot ije kan̄ otetet ebi udun̄ kan̄ ukpook. Ebi ene ebi ìkigọọk ema me udun̄ me oniin̄ ya si efefieek owot. Jisọs okpọkpọk igwen ebi udun̄ kan̄ ida ibọkọ, mè itumu inu òborọ ọmọ inyi ema.
33 Ìtumu inyi ema ibe, “Ìgban̄ utọn̄, eji ebesi Jeruselem. Me ama ya, mêleke emi Gwun̄ Ebilene ikana itap me ubọk ebi ibot ngwugwa mè ebi ìjeen̄ Ikan. Ife chi mêtip emi oyerebet mkpa, mè iyaka emi itap me ubọk ebi ekarege ebi Ju, 34 ebi mêrọbe emi inu ochak, mè icho ataak igwook emi me lek, mè isulu emi me njijan̄, mè ikpan̄ emi. Ire, egwe ita isiraka, mâjomo me mkpa.”
Mbeek Jemis melek Jọn ebeekbe
(Mat 20:20-28)
35 Jemis melek Jọn bọn kè Jebidi eneninu me lek kè Jisọs, mè inibe ọmọ, “Ogwu Ijejeen̄, îkaan̄ inu ge eji ekiweek ibe owu òrọ ònyi eji.”
36 Jisọs onenido ema ibe, “Keke ke îre?”
37 Ema enenifọọk ibe, “Eji ekiweek ibe, mgbọ owu osikweek me inyọn̄ ogboon̄ ubọọn̄ me emen mkpulu kwun̄, mè owu òtele inyi eji ekweek irek me agba lek kwun̄, ene ge me agan̄ ulom, ene ge me agan̄ ujit.”
38 Jisọs onenibe ema, “Enyi kperiọọn̄ inu ya enyi ekido. Ìre enyi mêkọt inwọ ujat inu ònan̄a me emen ekpen̄ ufieejit eyi mbanwọ? Sà ìre enyi mêkọt ibọkọ igwook-mun̄ eyi ikpele ufialek eyi mbabọkọ?”
39 Ema efọfọọk ibe ke ema mêkọt.
Jisọs onenitumu inyi ema ibe, “Enyi mêkọt inwọ ujat inu eyi mbanwọ, mè ibọkọ si igwook-mun̄ eyi mbabọkọ. 40 Ire, emi ǹkakaan̄ unye igogobo ebi ìbekweek me agan̄ ulom n̄a mè agan̄ ujit n̄a. Irek kecha ìkup inyi ebi Awaji oneen̄be isun̄ iban.”
41 Mgbọ akọp ebi udun̄ kan̄ kechilọ enọbe ikọ ya, ema enanaan̄ ejit enenen inyi Jemis mè Jọn. 42 Eya orọ Jisọs ogwegwen otutuuk kiban̄ ititiin̄, mè itumu inyi ema ibe, “Enyi mîriọọn̄ ibe ke ebi ìkikpulu ido ebi ekarege ebi Ju ekisa me unye ubọk ikpulu ebi ìkup me irak kiban̄. Ikeya si, ebi ilile me ido chi ekitọ ikọ òneme ema inyi ebi ema ekikpulu. 43 Ire, ìkabore ikeya me etete kinyi. Ogwu iweek irere ogwu ibot me etete kinyi, ene ya môdasi ire ogwu òkisi ikwaan̄ inyi otutuuk kinyi. 44 Ogwu iweek irere ogwu isi, ene ya môkana ogwu usun̄ inyi otutuuk ene. 45 Mije, Gwun̄ Ebilene me lek kan̄ ìkanu ibe ebilene enesi ikwaan̄ enyi ọmọ, ìnu inenisi ikwaan̄ inyi ebilene, mè inenisa ugwem kan̄ ikpe mkpukpe ijo inu me ibot owuwa ene.”
Jisọs îgwa Batimiọs
(Mat 20:29-32; Luk 18:35-43)
46 Ema enenire Jeriko. Mgbọ Jisọs mè ebi udun̄ kan̄ mè ogbogbo ebi ene ekinan̄a me Jeriko ikije isibi, îkaan̄ enerieen̄ ge ogwu ǹnàan̄, ekigwen Batimiọs, gwun̄ kè Timiọs, òkup me agba oniin̄ ya ikibeek inu. 47 Mgbọ înọbe ibe ke îre Jisọs ogwu Najeret ire ogwa òkiraka me oniin̄ ya, ibebene ikitaan̄ ukpo ikibe, “Jisọs, Gwun̄ kè Debit, to emi nsan!”
48 Ebi ene ekekikpin ọmọ ibe iriaan̄ ere. Ire, Batimiọs okpọkpọ ichieek mkpa ikitaan̄ ukpo ya inye ikibe, “Gwun̄ kè Debit, to emi nsan!”
49 Jisọs oyayaka ikeke, mè ibe ebi udun̄ kan̄ egwen ene ya enyi ọmọ.
Ema enenisi igwen ogwu ǹnàan̄ ya, mè itumu inyi ọmọ ibe, “Kayaka ìfieek owot, nan̄a keke na, ke ìbe owu ònu.” 50 Batimiọs inọnọ ikeya, iwọwọọk ofọnti inyọn̄ kan̄ itọp ito, mè ito ubọk inan̄a ikeke, mè ije inu me lek kè Jisọs.
51 Jisọs onenido ọmọ ibe, “Ìre keke ke oweek ibe emi ǹrọ ǹnyi owu?”
Batimiọs ofọfọọk ibe, “Ogwukaan̄ n̄a, ǹkiweek imọmọọn̄ inu.”
52 Jisọs onenibe ọmọ, “Je fo, ke ichechieek kwun̄ îrọ inyi lek kwun̄ inye.” Mgbọ yaage Batimiọs obebene ikimọọn̄ inu, mè igọọk Jisọs ije.