11
Jisọs înin̄ Jeruselem
(Mat 21:1-11; Luk 19:28-40; Jọn 12:12-19)
1 Mgbọ ema ekije igbet Jeruselem, ema enenire ama Betifegi melek ama Betani me inyọn̄ ogoon̄ Olifu. Jisọs oneniria ene iba me lek ebi udun̄ kan̄ ibe, 2 “Ìje ìsi ama yilọ òkup me isi kinyi. Mgbọ yaage enyi enin̄be ama ya, enyi mêmun̄ gwun̄ inyinya akpan ge etobobe itele, eyi ene geege ikanenege inyọn̄. Ìtọn̄ọ ìsa ìjet emi. 3 Ire ikaan̄ ogwu ido ibe mè ìre enyi ejeje ikitọn̄ọ anam ya, ìtumu ìnyi ene ya ibe ke Okaan̄-ene okiweek, ke môyaka igwat lek iria isa inu.”
4 Ema ejeje, mè isi imun̄ gwun̄ anam ya etobobe me agba isotu uwu ge òkup me agba oniin̄, mè itọn̄ọ. 5 Ebi ìkup me ere ya edodo ema ibe, “Keke orọ enyi ekitọn̄ọ anam ya?” 6 Ema efọfọọk ebi ife cha ike Jisọs obe ema efọọk. Ife cha etetele mè ema esa anam ya eje. 7 Ema enenisa inyinya akpan ya ijet Jisọs, mè iwele ekwut kiban̄ me inyọn̄, Jisọs onenene ikweek. 8 Owuwa ene ewewele ekwut kiban̄ me oniin̄, usini ene esọsọp otu uti mè inwan̄ me lek igwook si me oniin̄, inyi Jisọs ije me inyọn̄. 9 Owuwa ebi ìkije me isi kan̄ mè ebi ìkije me udun̄ kan̄ ebebene ikibọn̄ okoko, mè ikitaan̄ ukpo itumu ibe,
“Osana!
Awaji igbana ogwu ònunu me erieen̄ Okumugwem!a
10 Awaji igbana mkpulu kè Debit nte kiji eyi òkinu!
Itọn̄ ikup inyi Awaji me emen inyọn̄ ere òbebene ichit!”
11 Jisọs onenire Jeruselem, mè ije isi inin̄ Uwu Mbuban, mè ikiriraan̄ chieen̄ ikana ikikpọ inu geelek òkup me ere ya. Ire, mije egwe ojọkọbe, ọmọ mè akọp mè ene iba ebi udun̄ kan̄ egwugwu ikom isibi ifo Betani.
Jisọs îfieek otu inyi uti figi
(Mat 21:18-19)
12 Me ofit iwele kan̄, mgbọ Jisọs mè ebi udun̄ kan̄ ekinan̄a me Betani inu Jeruselem, uraafiọọn̄ otataka Jisọs. 13 Inenikeke me ujọn̄ọ ere imun̄ uti figi ge, inwan̄ ojotbe lek, mè ije isi ikpọ mè ọmọ mômun̄ mfut me inyọn̄. Ire, mgbọ îrebe lek uti ya, ìkamun̄ mfut geege, ìyaka ire inwan̄ inwan̄ ojot lek, mije, mgbọ ya ìkare ibot mgbọ figi okito. 14 Jisọs otutumu inyi uti figi ya ibe, “Ene geege ikayaka ìrie mfut ònan̄a me lek kwun̄ ofifi.” Ebi udun̄ kan̄ enọnọ ikọ ya îtumube.
Jisọs înin̄ Uwu Mbuban
(Mat 21:12-17; Luk 19:45-48; Jọn 2:13-22)
15 Mgbọ ema erebe Jeruselem, Jisọs onenije isi inin̄ emen Uwu Mbuban, mè ibene ikilap ebi ìkinyam ewe, mè ebi ìkilep inu me emen uwu ya isibi, mè ida ikasi ebi ìkinwene ikpoko, mè ogboon̄ ebi ìkinyam elesia, ikana ikwuun̄. 16 Ìkachieek si ibe ebi ene eben inu ewe geege esa eje etibi uwu ya. 17 Ikekitumu inyi ebi ife cha ibe, “Ege me Ikpa Mbuban ibe,
“ ‘Mêkigwen uwu n̄a uwu uriaak eyi ebi ido geelek.’b
Ire, enyi eyaka ikisa uwu ya irọ ere ebi inọ ekinu inilet lek.c”
18 Ebi ibot ngwugwa mè ebi ìjeen̄ Ikan enọnọ inu yi òrọrọ, mè ibene ikiweek oniin̄ ikpakpan̄ Jisọs. Ire, ema mîkaan̄ ufieek-owot me lek kè Jisọs, mije, ogbogbo ebi ene mîkaan̄ ulọk me lek kan̄, inan̄a me lek uyeke uyeke inu cha îkijeen̄.
19 Mgbọ îrebe ikakwun̄ me usen ya, Jisọs mè ebi udun̄ kan̄ enanan̄a me Jeruselem isibi.
Ijejeen̄ ònan̄a me lek
(Mat 21:20-22)
20 Me ofit iwele kan̄, me otu ewelegwe, mgbọ ema ebenije iraka, ema emumun̄ uti figi ya ochiaakbe ire lek ugwun̄-ijọn̄. 21 Pita onenikeek inu òrọrọ me iyakwut òraraka, mè inigwen Jisọs ibe, “Ogwu Ijejeen̄, kpọ, uti figi ofieekbe otu inyi ya îkwu!”
22 Jisọs otutumu inyi ema ibe, “Ìkaan̄ ichechieek me lek Awaji. 23 Me atikọ, ǹkitumu inyi enyi ibe, ire ene itumu inyi ogoon̄ yi ibe, ‘Jibi nan̄a me akpat, mè si rọn̄ me okwaan̄,’ mè ire ene ya ichieek ibe ke inu ọmọ otumube môrọ, mêrọ si ikeya inyi ene ya, mè ire ìkakaan̄ ejit iba. 24 Eya orọ mgbọ geelek enyi ekibeek Awaji inu, ìchieek ibe ke enyi mîbọkọ inu ya, ke Awaji mônyi enyi si inu ya enyi ebeekbe. 25 Mgbọ enyi isikiriaak uriaak, ìtele inu geelek ene orọbe enyi ilọ ìnyi ene ya, inyi Nte kinyi ogwu òkup me emen inyọn̄ itele si nrọ-nlọ kinyi inyi enyi. [ 26 Ire owu òkatele nrọ-nlọ ene orọbe owu ìnyi ene ya, Nte kwun̄ ogwu òkup me emen inyọn̄ ìkpotele si nrọ-nlọ eyi owu orọbe inyi owu.]”
Idodo ofolek unye kè Jisọs
(Mat 21:23-27; Luk 20:1-8)
27 Jisọs mè ebi udun̄ kan̄ enenigwu ikom inu Jeruselem. Mgbọ Jisọs okije me emen Uwu Mbuban, ebi ibot ngwugwa, mè ebi ìjeen̄ Ikan, mè ebi ugane ama, enunu me lek kan̄, 28 mè inido ọmọ ibe, “Ìre kpasi unye ke osa ikirọ otutuuk inu chi? Ìre ekene onyi owu unye yi?”
29 Jisọs onenitumu inyi ema ibe, “Emi mâdo enyi ikọ ge. Ire enyi ifọọk ikọ ya, mâtumu unye nsabe ikirọ inu chi inyi enyi. 30 Ìre unye eyi Jọn okisa igwook ene mun̄ ìnan̄a me owa? Ìre ìnan̄a me ubọk Awaji, sà ìre ìnan̄a me ubọk ebilene? Ìtumu ìnyi emi nu.”
31 Ema eninin̄ oru me lek kiban̄, mè ibe, “Ire eji ifọọk ibe ke ìnan̄a me ubọk Awaji, môdo eji ibe mè ìre keke orọ eji kpechieek ikọ kè Jọn. 32 Sà ìre eji mêfọọk ibe ke ìnan̄a me ubọk ebilene mọnọ?” Ema mîkaan̄ ufieek-owot me lek ebi ene, mije, otutuuk ene mîchieek ibe ke Jọn ìre ogwu nriran. 33 Eya orọ, ema efọfọọk Jisọs ibe ke ema kperiọọn̄.
Jisọs obebe ema, “Emi si m̀kpatumu ere unye eyi nkisa irọ inu chi geelek onan̄abe inyi enyi.”