9
Jisọs îria ebi udun̄ kan̄ isibi
(Mat 10:5-15; Mak 6:7-13)
1 Jisọs onenigwen akọp mè ebi otuchieen̄ iba kan̄ ititiin̄, mè inyi ema unye isasa ilap otutuuk ijo erumun̄ isibi me emen ene, mè igwa esese chieen̄ orukan̄, 2 mè iniria ema isibi ibe esi elook ata etip eyi mkpulu eyi Awaji, mè egwa ebi lek ikanyege. 3 Îtumu si inyi ema ibe, “Ikamọnọ inu geege ìkaan̄ me ubọk ìsa ìje ije ya. Ikamọnọ mkpat, ikamọnọ akpa ubọk, ikamọnọ fituru, ikamọnọ ikpoko, ikamọnọ ofọnti ìso iba. 4 Uwu geelek òbọbọkọ enyi itap, ìkup me uwu ya mege ire mgbọ enyi mênan̄abe me ama keya isibi. 5 Ire ikaan̄ ama ekabọkọge enyi ìtap, ìnan̄a me ama ya ìsibi. Enyi isibesibi, ìgen̄ achiaan̄ ukot kinyi ìgwook ìnyi ebi ama ya kubọk inu ijejeen̄ isasa itaba ema ubọk me utọn̄ ibe ke unaan̄-ejit Awaji môkeme ama ya.”
6 Mgbọ ebi otuchieen̄ kan̄ cha ebọkọbe nteme cha isan̄a, ema enanan̄a ije isi ilook ata etip ya ikana asabọn ama geelek, mè ikigwa owuwa ebi orukan̄ me ere geelek ema esibe.
7 Mgbọ Erọdu ogwu òkikpulu Galili, onọbe ukpatu ofolek otutuuk inu cha òkimọnọ irek, ifuk-ibot kan̄ îwuwọlọ. Ìkariọọn̄ ogwu òkirọ inu cha, mije, usini ene ekitumu ibe ke îre Jọn ògwook mun̄ onan̄a ikeke me mkpa inikirọ inu cha. 8 Usini ene ebe ke îre Ilaija okana isibi inikirọ inu cha. Ebi ofifi ene si ekekibe ke îre ene ge me lek ebi nriran ukot ikaan̄ ogwu ikom inu inikirọ inu cha. 9 Erọdu obebe ke îre ọmọ me lek kan̄ onyi ida, efefieek Jọn ebek, ikwukwu. Ìre ekene ire ogwu, ọmọ okinọ nke nke inu chi ofolek mọnọ? Inenikiweek imumun̄ Jisọs ogwu òkirọ otutuuk inu cha.
Jisọs înyi obop ene go inorie
(Mat 14:13-21; Mak 6:30-44; Jọn 6:1-14)
10 Mgbọ ebi otuchieen̄ kè Jisọs cha ekabe, mè inikpa otutuuk inu ema erọbe inyi Jisọs isan̄a, Jisọs osasa ema igbaalek ije ifo ama Betisaida ema gaalek. 11 Ire, owuwa ene enọnọ ibe ke Jisọs òkije isi Betisaida, mè igbuku inin̄ oniin̄ ya igọọk ọmọ. Jisọs obọbọkọ ema itap, mè ibene ikitumu ikọ ofolek mkpulu Awaji inyi ema, mè igwa si otutuuk ebi lek ikanyege.
12 Me agan̄ ikakwun̄ usen ya, mgbọ egwe okideke, ebi otuchieen̄ kan̄ enenitumu inyi ọmọ ibe, “Ria ife chi sibi, mè eje esi asabọn ama òkukup igbet ere yi esi eweek inorie elep erie, mè eweek si ere ilaak, mije, ere yi eji ekupbe îjọn̄ọ ere me lek ama enenen.”
13 Jisọs ofọfọọk ema ibe, “Enyi me lek kinyi, ìweek inorie ìnyi ife chi erie ma.”
Ema efọfọọk ọmọ ibe, “Owut fituru go mè ufuk irin̄ iba gaalek ke eji ekaan̄. Ìre òkiweek ibe eji esi elep inorie òboso otutuuk ife chi ni?” 14 (Ebi ìkup me ere ya mêso obop ebirieen̄ go.)
Jisọs onenibe ebi otuchieen̄ kan̄, “Ìtumu ìnyi ife cha ibe esiki ekweek me irek me irek, akọp ene go go me irek ge.”
15 Ema esisi itumu inyi. Otutuuk ife cha esisiki ikweek me ijọn̄. 16 Jisọs onenibọkọ owut fituru go mè ufuk irin̄ iba cha, mè ibene isi ikpọ inyọn̄, mè inyi Awaji itọn̄, mè ikpọkọ fituru cha mè irin̄ cha inyi ebi otuchieen̄ kan̄ ibe esa esi eche enyi ife cha. Ema ebọbọkọ isa isi iche inyi ife cha. 17 Otutuuk ife cha ererie inorie ya ijot, mè isik si. Ebi otuchieen̄ kè Jisọs eteteen̄ okpọkọ echi òsisik ijot akọp mè okwun iba.
Pita îtumu isibi ogwu Jisọs orebe
(Mat 16:13-19; Mak 8:27-29)
18 Usen ge, Jisọs onenisi iriaak uriaak me ere ònọnọọn̄, ọmọ mè ebi udun̄ kan̄ gaalek. Jisọs onenido ema ibe, “Ìre ebi ene ekitumu ibe ke emi ìre ekene?”
19 Ema efọfọọk ibe, “Usini ene ebe ke owu ìre Jọn ògwook mun̄, usini ene ebe owu ìre Ilaija. Sà usini ene si ekitumu ibe ke ene ge me lek ebi nriran ukot ikaan̄ ogwu ikom inu.”
20 Jisọs onenido ema ibe, “Sà enyi ye? Ìre enyi ekikeek ibe ke emi ìre ekene?”
Pita ofọfọọk ọmọ ibe, “Îre owu ore ogwu Awaji otọkọbe aran̄ me ibot ya!”
21 Jisọs orọriọọn̄ ubọk itaba ema ubọk me utọn̄ ibe ekakpa inu ya ìnyi ene geege.
Jisọs îtumu ikọ ofolek mkpa kan̄
(Mat 16:20-28; Mak 8:30–9:1)
22 Jisọs onenitumu inyi ebi udun̄ kan̄ ibe, “Gwun̄ Ebilene mômun̄ owuwa ufialek. Ebi ugane ama, mè ebi ibot ngwugwa, mè ebi ìjeen̄ Ikan mêjit ọmọ, mè ikpan̄ ọmọ. Ire, me òso egwe ita, Awaji môjomo ọmọ me mkpa.”
23 Jisọs onenitumu inyi ebi udun̄ kan̄ mè otutuuk ebi ìkup me ere ya ibe, “Ire ikaan̄ ogwu òbogọọk emi, ene ya ijit lek kan̄, mè iben uti nkwurieen̄ kan̄ egwe geelek isa ikigọọk emi. 24 Mije, ene geelek òweweek ibọbọọk ugwem kan̄, ene ya môfiin̄ ugwem ya. Ire, ogwu geelek òfifiin̄ ugwem kan̄ mije n̄a, ene ya môkaan̄ ugwem kan̄. 25 Ìre kpasi oruru ke ene obokaan̄, ire ene ikaan̄ otutuuk linyọn̄, mè ifiin̄ lek kan̄, mè ìyaka ire, mè ichep lek kan̄ ire mgbọ ikakaan̄ge itata? 26 Ire ikaan̄ ogwu itet esip mije n̄a, mè ìre mije ikọ n̄a, emi Gwun̄ Ebilene mâtet esip si mije ene ya mgbọ mânube me ujamgbugbo eyi n̄a, mè ujamgbugbo eyi Nte n̄a, mè eyi ebi osat Awaji ìkup mbuban. 27 Me atikọ, ǹkitumu inyi enyi ibe ke usini me lek ebi ìkekeke me ere yi mgbọ yi kpebekwu mege ire mgbọ ema mêsabe chieen̄ kiban̄ imun̄ mkpulu eyi Awaji.”
Akpalek kè Jisọs înwene
(Mat 17:1-8; Mak 9:2-8)
28 Mgbọ inu òso egwe jeeta orakabe, Jisọs osasa Pita, mè Jọn, mè Jemis igbaalek inene ifo inyọn̄ ogoon̄ ge isi ikup ikiriaak uriaak. 29 Mgbọ îkiriaak uriaak, isi kan̄ onwenwene, ofọnti îtapbe me lek okpọkpọ itana kubọk abalara, mè ikinin̄ ene chieen̄ kubọk ura. 30 Mgbọ yaage, ene iba ekakana isibi inikigọọk Jisọs ikpa ukpatu. Ene iba cha ìre Mosis mè Ilaija. 31 Ema ekana isibi me ujamgbugbo eyi emen inyọn̄, mè ikigọọk Jisọs ikpa ukpatu ofolek mkpa Jisọs obokwu me Jeruselem. 32 Otutuuk mgbọ cha, Pita mè ebi melek kan̄ mêkilaak. Ire, mgbọ ema ebolobe chieen̄, ema emumun̄ ujamgbugbo kè Jisọs, mè imun̄ si Mosis mè Ilaija ekekebe melek Jisọs. 33 Mgbọ ebirieen̄ iba cha ekitele Jisọs, Pita otutumu inyi Jisọs ibe, “Ogwu Nte, înwọn ubọk eji ekupbe me ere yi. Eji enenama uwu ọfọ ita, ge eyi kwun̄, ge eyi kè Mosis, ge eyi kè Ilaija.” (Pita ìkpọkpọ itumu ikọ ya ikeya, mije, ìkariọọn̄ inu ìkitumu.)
34 Pita òkitumu ikọ ya me otu, oduku inyọn̄ okakana ichit ema. Ukpook otetet ema mgbọ oduku inyọn̄ ya okikana ichit ema. 35 Ida ge okekitumu ikọ me emen oduku inyọn̄ ya ibe, “Ogwugwu ìre Gwun̄ n̄a ogwu emi ngobobe inyi lek n̄a. Ìgban̄ utọn̄ ìnyi ọmọ!” 36 Ida ya itutumu ikọ isan̄a, ebi udun̄ kè Jisọs enenibene chieen̄, mè imun̄ Jisọs gaalek okekebe. Ema etetet inu ema emun̄be ya ikaan̄ me ejit kiban̄. Kpekpa inyi ene geege me mgbọ ya.
Jisọs îrieen̄ ijo erumun̄ isibi
(Mat 17:14-18; Mak 9:14-27)
37 Me ofit iwele kan̄, Jisọs mè ebi udun̄ kan̄ ita cha eneninan̄a me inyọn̄ ogoon̄ ya isibi, mè inichichini melek ogbogbo ebi ene. 38 Ene ge me etete ebi ife cha otataan̄ ukpo itumu inyi Jisọs ibe, “Ogwu Ijejeen̄, soso, nye lek na kpọ gwun̄ n̄a, ibot gwun̄ enerieen̄ ge gaalek nkaan̄be. 39 Ijo erumun̄ okisisaak. Isibene me lek, gwun̄ ya îra ikitaan̄ ukpo. Îra ijibi gwun̄ ya itọbọ me ijọn̄ mè ikisik, awo îra ikibaan̄ me otu. Ìkakinyinyi gwun̄ ya irek inyi isiki efuuk. Sa me ikeyi, ijo erumun̄ ya òkisak gwun̄ ya unan me lek iwa enenen. 40 Mgbọ keyi, nsa gwun̄ ya inu, mè iriaak ebi udun̄ kwun̄ ibe erieen̄ ijo erumun̄ ya esibi. Ire, ema mîsa igak, kpekọt irieen̄ isibi.”
41 Jisọs onenigana inyi ebi udun̄ kan̄ ibe, “Jei, ebi mgbọ kechi, enyi mîfieek, mè inan ichechieek enenen! Ìre kpa mgbọ ke mbagọọk enyi ikup ire sabum enyi ènekaan̄ ichechieek? Sà ìre m̀bame una ichechieek kinyi ire mgbọ owa?” Inenitumu inyi nte gwun̄ ya ibe, “Sa gwun̄ kwun̄ na me ere keyi.”
42 Mgbọ gwun̄ ya okije inu, ijo erumun̄ ya obebene gwun̄ ya me lek kubọk mkpikpi, mè ijibi itọbọ me ijọn̄. Jisọs ogagana inyi ijo erumun̄ ya, ijo erumun̄ ya osisibi me emen gwun̄ ya, lek gwun̄ ya onyenye. Jisọs osasa gwun̄ ya inyi ogwu ute. 43 Mbiribọ ogwogwook otutuuk ebi ìkup me ere ya me lek, mije ikpele unye Awaji eyi òsisibi utoon̄ me isi kiban̄.
Mgbọ ebi ene ekibubeek chieen̄ ikana me lek inu ya Jisọs orọbe, Jisọs onenitumu inyi ebi udun̄ kan̄ ibe, 44 “Ìriọọn̄ ubọk ìgban̄ utọn̄ me lek ikọ yi mbatumu inyi enyi. Me atikọ, mêleke emi, Gwun̄ Ebilene, ikana itap me ubọk ebilene.” 45 Ire, ebi udun̄ kan̄ kpekọt iriọọn̄ inu ikọ ya osibibe. Kpekọt igobo ibot ikọ ya itet, mije, kpekpọk mbum inu ya inyi ema eriọọn̄. Ukpook si ìkachieek inyi ema ekọt edo Jisọs ibot ikọ ya.
Ogwu òsisip ichit me linyọn̄
(Mat 18:1-5; Mak 9:33-37)
46 Ebi udun̄ kè Jisọs enenibene ikiwut ifan̄a ikiweek irọriọọn̄ ogwu òbore ogwu òmimin ichit me etete kiban̄. 47 Jisọs orọriọọn̄ ekiket kiban̄, mè igwen sọntiik gwun̄ ge inito me agba lek kan̄, 48 mè initumu inyi ema ibe, “Ene geelek òbọbọkọ sọntiik gwun̄ yi itap me erieen̄ n̄a ìbọkọ emi itap. Ene geelek òbọbọkọ emi itap ìbọkọ ogwu òraria emi inu itap. Eya orọ, ene geelek òsisip ichit me etete kinyi, ogwa ore ogwu òmimin ichit.”
49 Jọn onenitumu inyi Jisọs ibe, “Ogwu Nte, eji mîmun̄ enerieen̄ ge okisa erieen̄ kwun̄ irieen̄ ijo erumun̄ isibi me emen ene, mè iweek igbagban ene ya, mije ikarege ogwu melek kiji.”
50 Jisọs onenibe ema, “Ikagban ene ya, mije, ene geelek ikarọge ìkeme enyi, ìgọọk enyi ikeke.”
Ebi gwun̄ ama Sameria ge mîjit Jisọs
51 Ike îkigbet mgbọ Awaji obomọnọ Jisọs ifo emen inyọn̄, Jisọs otutumu ifieek me ejit kan̄ ibe ke ọmọ môsi Jeruselem, mè ibene ije ikije isi Jeruselem. 52 Isasan̄a ebi ene iria ibe edasi ekeje me isi kan̄ ekesi enen̄e ere esun̄ eban ọmọ. Ife cha esisi inin̄ gwun̄ ama ebi Sameria ge. 53 Ire, ebi ama ya kpechieek ibọbọkọ ọmọ itap, mije, ema mîriọọn̄ ibe ke îre Jeruselem ke îben me ejit iboniraka isi. 54 Mgbọ Jemis mè Jọn ebi udun̄ kan̄ enọbe etip ya, ema edodo Jisọs ibe, “Okaan̄-ene, ìre oweek ibe eji enyi ida mè ukan̄ inan̄a me emen inyọn̄ initaka ebi ama yi iriọk?”a 55 Jisọs oyayaka chieen̄ ikpọ ema, mè igana ikọ inyi ema. 56 Itutumu ikọ ya isan̄a, ema enanan̄a isi ofifi ama.
Inu igọgọọk Jisọs okibọkọ
(Mat 8:19-22)
57 Mgbọ Jisọs mè ebi udun̄ kan̄ ekije me oniin̄ ya, enerieen̄ ge onenitumu inyi Jisọs ibe, “Mâgọọk owu isi ere geelek obosi.”
58 Jisọs ofọfọọk ọmọ ibe, “Ekpuuruk îkaan̄ udọn̄ ere îkiluk, unọn òwulu me inyọn̄ îkaan̄ si uwu ere îkiluk. Ire, emi Gwun̄ Ebilene, ǹkakaan̄ ere nkinin̄ isiki ilaak itap efuuk.”
59 Jisọs omumun̄ ofifi ene, mè igwen ibe, “Na, na gọọk emi.”
Ire, ogwu enerieen̄ ya ofọfọọk ọmọ ibe, “Okaan̄-ene, tele mè ǹdasi ǹsi m̀fuun̄ nte n̄a sabum ǹnengọọk owu.”
60 Jisọs obebe ọmọ, “Tele mè ebi kpekaan̄ ugwem ikakaan̄ge itata efuun̄ ebi kiban̄ ìkwukwu. Ire, owu nan̄a si look ata etip eyi mkpulu eyi Awaji kana ere.”
61 Ofifi ene si onunu, mè initumu inyi Jisọs ibe, “Okaan̄-ene, ǹkiweek igọgọọk owu ije. Ire, tele mè ǹdasi ǹgwu ǹkom m̀fo ǹsi ǹtumu ǹnyi ebi uwu n̄a ibe eriọọn̄ ubọk ekup, sabum mânigọọk owu.”
62 Jisọs ofọfọọk ogwu enerieen̄ ya ibe, “Ene geelek òkisa eriembuuk ibak ijọn̄ ere ìbowop mfut me emen uko, mè ikiraan̄ chieen̄ ikpọ udun̄, ene ya ìkagbe ogwu òbosi ikwaan̄ me emen mkpulu eyi Awaji.”