8
Jisọs înyi obop ene ini inorie
(Mat 15:32-39)
1 Sọnja mgbọ iraraka, owuwa ene enunu me lek kè Jisọs. Mije ema ekakaan̄ge inorie geege irerie, Jisọs onenigwen ebi udun̄ kan̄ ititiin̄, mè itumu inyi ibe, 2 “Njijin ife chi îtet emi enenen. Usen ita ire echa ife chi ekupbe melek n̄a. Mgbọ keyi, inorie kiban̄ îta, kpunu inu ema eberie. 3 Ire mbe ife chi eje ukpọk owot efon, mêgak iweek me oniin̄, mije, usini kiban̄ enan̄a me ujọn̄ọ ere inu.”
4 Ebi udun̄ kan̄ enenido ọmọ ibe, “Ìre owa me emen èwê keyi ke eji ebekọt ikaan̄ inorie òboso owuwa ene kechi?”
5 Jisọs onenido ema ibe, “Ìre owut fituru inen ke enyi ekaan̄?”
Ema efọfọọk, ibe ke owut fituru jaaba ke ema ekaan̄.
6 Jisọs oneninyi ida ibe ife cha esiki ekweek me ijọn̄, mè inibọkọ owut fituru jaaba cha, mè inyi Awaji itọn̄, mè ikpọkọ, mè isa inyi ebi udun̄ kan̄ ibe esa eche enyi ebi ife cha. Ebi udun̄ kan̄ esasa fituru cha isi iche. 7 Ema mîkaan̄ si ufuk asabọn irin̄ inen mè inen. Jisọs onenibọkọ irin̄ cha si, mè inyi Awaji itọn̄ me lek, mè ibe ebi udun̄ kan̄ esa egbaalek eche enyi ife cha. 8 Ebi ife cha ererie inorie ya, mè irie ijot. Mgbọ eriebe isan̄a, ebi udun̄ kè Jisọs eteteen̄ okpọkọ echi òsisik ekakọtge ìtaka ìsan̄a, ijojot okwun jaaba. 9 Ebi ìrerie inorie ya mîso obop ebirieen̄ ini. Jisọs onenitap ema me oniin̄ ifofo kiban̄. 10 Mgbọ yaage ife cha efonbe isan̄a, ọmọ mè ebi udun̄ kan̄ enanan̄a inin̄ uji, mè ikọp isi agan̄ Dalamanuta.
Ebi Farisi mîdo inu ijejeen̄
(Mat 16:1-4)
11 Usini ebi Farisi enunu me lek kè Jisọs mè ikigọọk ọmọ iwut ifan̄a. Ema ekiweweek itọtọ ọmọ ikpọ. Eya orọ, ema enenitumu inyi Jisọs ibe irọ-nu inu ukechieen̄ ge ònan̄a me emen inyọn̄.
12 Jisọs ofọfiọọk, mè ibe, “Ìre keke orọ ebi linyọn̄ mgbọ keyi ekiweek inu ijejeen̄? Me atikọ, ìkakaan̄ inu ijejeen̄ geege eberọ ijeen̄ ema.” 13 Itutumu ikeyi isan̄a, inanan̄a itele ema, mè inin̄ uji, ọmọ mè ebi udun̄ kan̄, ema ekọkọp isaba okwaan̄ ya ifo ofifi agan̄.
Ijo olat ebi Farisi
(Mat 16:5-12)
14 Ebi udun̄ kè Jisọs mîwuuk itatap fituru me uji, isan̄a me lek owut ge gaalek òsisik me ubọk kiban̄ me emen uji ya. 15 Jisọs okekitaba ema ubọk me utọn̄ ibe, “Ìgbala chieen̄ me lek olat ebi Farisi melek olat kè Erọdu.”
16 Ebi udun̄ kan̄ ekekitumu me lek kiban̄ ibe ke ìkalọlọ fituru ema ewuukbe ya orọ îkitumu ikọ ya.
17 Jisọs orọriọọn̄ inu ema ekitumu, mè inido ema ibe, “Ìre keke orọ enyi ekinina lek ibe ke enyi kpekaan̄ fituru? Ìre enyi kperiọọn̄ inu geege ni? Sà ìre enyi kpekikọt igobo inu geege itet? Sà ìre ejit kinyi ìkachichili si? 18 Ìre enyi ekaan̄ chieen̄ ikike, kpekisa imọọn̄ inu? Sà ìre enyi ekaan̄ utọn̄ ikike, kpekisa inọ ikọ? Ìre enyi kpekikeek inu? 19 Mgbọ nsabe owut fituru go inyi obop ebirieen̄ go, eyi ema eriebe ijot, ìre okwun inen ke enyi eteen̄ okpọkọ echi òsisik ijot?”
Ema efọfọọk ibe, ke îre akọp mè okwun iba.
20 Jisọs ododo ema si ibe, “Ìre mgbọ mkpọkọbe owut fituru jaaba isa inyi obop ebirieen̄ ini, ema eriebe ijot, ìre okwun inen ke enyi eteen̄ okpọkọ echi òsisik ijot?”
Ema efọfọọk ibe, ke îre okwun jaaba.
21 Ikeya ke Jisọs onibe ema, “Ìre enyi kpetet si ibot usem n̄a?”
Jisọs îgwa ogwu ǹnàan̄ me Betisaida
22 Ema enenire ama Betisaida. Ebi ene enenisa ogwu ǹnàan̄ ge ijet Jisọs ibe itoon̄ ubọk me lek, inyi imọọn̄ inu. 23 Jisọs otetet ogwu ene ya me ubọk, mè isa ọmọ ije inan̄a me emen ama ya isibi, mè ikwut ataak igwook ọmọ me chieen̄, mè isa ubọk itoon̄ ọmọ me lek, mè ido ọmọ ibe, “Ìre omọọn̄ inu?”
24 Ogwu ene ya obebene chieen̄ ikpọ ere, mè ifọọk ibe, “Mmun̄ ebilene ekije, ire, ema ebet lek uti.”
25 Jisọs okpọkpọk itoon̄ ọmọ ubọk me chieen̄. Chieen̄ kan̄ obobolo, ibebene ikimọọn̄ inu ijaan̄. 26 Jisọs onenitumu inyi ọmọ ibe, “Raka isi ge fo uwu kwun̄, kayaka ìgwu ìkom ìje ìnin̄ emen ama.”
Pita îtumu isibi ogwu Jisọs orebe
(Mat 16:13-20; Luk 9:18-21)
27 Jisọs mè ebi udun̄ kan̄ eneninan̄a ikije ikana asabọn ama òkukup ikana ama Sisaria Filipai. Me oniin̄ ije kiban̄, Jisọs okekido ebi udun̄ kan̄ ibe, “Ìre ebi ene ekitumu ibe ke emi ìre ekene?”
28 Ema efọfọọk ibe, “Usini ene ekibe ke owu ìre Jọn ògwook mun̄, usini ekibe ke owu ìre Ilaija ogwu nriran. Usini si ekibe ke owu ìre ene ge me lek ebi nriran.”
29 Jisọs onenido ema ibe, “Enyi me lek kinyi, ìre enyi ebe ke emi ìre ekene?”
Pita ofọfọọk ọmọ ibe, “Owu ore ogwu Awaji otọkọbe aran̄ me ibot ya.”
30 Jisọs obebe ema ekakpa inu ofolek kan̄ ìnyi ene geege.
Jisọs îtumu ikọ ofolek mkpa kan̄
(Mat 16:21-28; Luk 9:22-27)
31 Jisọs onenibene ikitumu inyi ebi udun̄ kan̄ ibe, “Emi Gwun̄ Ebilene mâbọkọ owuwa ufialek. Ebi ugane ama, mè ebi ibot ngwugwa, mè ebi ìjeen̄ Ikan mêjit emi, mè ikpan̄ emi. Ire, egwe ita isiraka, mâjomo me mkpa.” 32 Jisọs ìkalet otu, ìkpọkpọ itumu ikọ ya ikpọk mbum.
Eya orọ Pita ogwegwen ọmọ ida ibọkọ, mè itumu inyi ọmọ ibe, “Ìre kpasi ikọ ke okitumu ikeya?”
33 Jisọs okakana chieen̄ ikpọ ebi udun̄ kan̄, mè igana inyi Pita ibe, “Je nan̄a emi me isi, owu Yọk keyi! Ìkare Awaji ke ogọọk ikeke, îre ebilene ke ogọọk ikeke.”
34 Jisọs onenigwen otutuuk ebi ìkup me ere ya igbaalek ebi udun̄ kan̄ ititiin̄, mè itumu inyi ema ibe, “Ire ikaan̄ ogwu iweek igọgọọk emi, ene ya ijit lek kan̄, mè iben uti nkwurieen̄ kan̄ isa igọọk emi. 35 Mije, ogwu iweek ibọbọọk ugwem kan̄, ene ya môfiin̄ ugwem kan̄. Ire, ene geelek òfifiin̄ ugwem kan̄ mije n̄a, mè ìre mije ata etip yi nkilook, ene ya môkaan̄ ugwem ya. 36 Ìre kpasi oruru ke ene obokaan̄, ire ene ya ikaan̄ otutuuk linyọn̄, mè ifiin̄ ugwem kan̄? 37 Sà ìre keke ke ene obokọt isa inyi me useen̄ ibot ejit kan̄? 38 Ire ikaan̄ ogwu itet esip mije n̄a, mè ìre mije ikọ n̄a me etete ebi mgbọ keyi ebi ìrere ebi ijo mè ebi ekariọọn̄ge Awaji, emi Gwun̄ Ebilene, mâtet esip mije ene ya mgbọ mânube melek ebi osat mbuban me ujamgbugbo eyi Nte n̄a.”