7
Orọmijọn̄ ebi Ju
(Mat 15:1-9)
1 Usen ge, usini ebi Farisi mè ebi ìjeen̄ Ikan ìnan̄a me Jeruselem enunu me lek kè Jisọs. 2 Me ere ya, ema enenimun̄ ibe ke usini ebi udun̄ kè Jisọs kpegwọk lek sabum enirie inorie. Eyi ìsibi ibe ke ema kpegwọk ubọk igọọk me lek mfaka ebi Ju. 3 Otutuuk ebi Ju, ògak ge ebi Farisi, ekigọọk orọmijọn̄ ebi nte nte kiban̄, kpekirie inorie me ekagwọkge ubọk. 4 Ema isinan̄a me ewe ika, kpekirie inu geege îtata egwọgwọk lek. Îkaan̄ si owuwa orọmijọn̄ ema ekirọ, kubọk igwọgwọk otin̄, mè ugọn̄, mè ekpen̄, mè alala.
5 Eya orọ, ebi Farisi mè ebi ìjeen̄ Ikan enenido Jisọs ibe, “Ìre keke orọ ebi udun̄ kwun̄ ekijit irọrọ orọmijọn̄ ebi ugane? Kpekigwọk lek sabum ènerie inorie.”
6 Jisọs onenifọọk ema ibe, “Enyi ebi isi iba kechi! Ikọ Asaya otumube me ukot ikaan̄ ibak enyi ìkpọkpọ itat. Asaya ìtumu ibe ke Awaji ibe,
“ ‘Ife chi ekimin emi me ukpọk-otu ikike,
ire, ejit kiban̄ îjọn̄ọ ere me lek n̄a.
7 Ema ekitọbọ ebum inyi emi ikike,
mè ikijeen̄ ikan ema gaalek etapbe kubọk ìre Ikan Awaji.’a
8 Enyi mîjuuk Ikan Awaji itele, mè iyaka initet orọmijọn̄ ebilene inye.”
9 Îtumu si inyi ema ibe, “Enyi mîkaan̄ ujọn̄ọ ifuk-ibot enyi ekisa ijit isusun̄ Ikan Awaji, mè ikitet ijejeen̄ eyi kinyi inye. 10 Mosis ìnyi Ikan ibe mè ene geelek ikinyi ogwu ute mè ogwu uga ulibi;b ikaan̄ ene geelek òtutumu ogwu ute mè ìre ogwu uga ilọ, ekpakpan̄.c 11 Ire, enyi ekijeen̄ ibe, ire ogwu ikaan̄ inu mosabe itap ubọk inyi ogwu ute mè ogwu uga, mè itumu inyi ogwu ute mè ìre ogwu uga ibe ke inu ya ìkup inyi Awaji, 12 ke ìkayaka ìkup me uyọt ibe ene ya irọ inu ògbegbe ibe ọmọ irọ inyi ogwu ute mè ìre ogwu uga. 13 Mije enyi ekijeen̄ bọn kinyi orọmijọn̄ kinyi, enyi mîsa ikọ Awaji isun̄ inu ikike. Melek si, ìkare orọmijọn̄ keyi gaalek ke enyi ekirọ, enyi mîkirọ si owuwa orọmijọn̄ òkup esese.”
Inu òkichaka ene mbuban me lek
(Mat 15:10-20)
14 Jisọs onenigwen ogbogbo ene cha ititiin̄ me agba lek kan̄, mè ibe ema, “Enyi otutuuk ene, ìgban̄ utọn̄, mè ìtet ibot me lek inu mbatumu inyi enyi. 15 Ìkare inu geege ene oriebe itap me owot okichaka ene mbuban me lek. Îre inu òkinan̄a me emen ejit ene isibi okichaka ene mbuban me lek. [ 16 Ogwu ikaan̄ utọn̄ isasa inọ ikọ, inọ!”]
17 Mgbọ Jisọs onan̄abe itele urum ene cha, mè ifo uwu, ebi udun̄ kan̄ enunu inibeek ọmọ ibe ibak ibot urọk ya inyi ema. 18 Jisọs onenido ema ibe, “Ìre enyi kpekaan̄ nden̄? Ìre ìkabook enyi chieen̄ ibe ke kpunu inu geege eyi ene oriebe eyi òkichaka ene mbuban me lek? 19 Inu ene oriebe ìkakifo emen ejit ene, ìkifo emen owot ene, mè ene ya òne ofiin̄.” (Ikọ keyi Jisọs otumube îjeen̄ ibe ke otutuuk inorie geelek îtana me isi Awaji.)
20 Jisọs onenitumu si ibe, “Îre inu ònan̄a me ejit ene isibi okirọ inyi ene ikatana. 21 Mije, îre nan̄a me emen ejit ene ke ijo ekiket geelek okinan̄a isibi, mè ijeje oyet, mè ichichiin̄ inọ, mè ikpakpan̄ ene, 22 mè ugan-nwa, mè ikakaan̄ ejit ile, mè irọrọ nnaan̄, mè ikakan̄ ataak, mè barabat, mè ikakaan̄ chieen̄ ile, mè itutumu ene ifiat, mè igugumu lek, mè irọrọ inu kubọk ebi una ifuk-ibot. 23 Otutuuk ijo inu chi ìkinan̄a me emen ejit ene isibi. Îre echichi okichaka ene mbuban me lek.”
Ichechieek ogwu enenwaan̄ ikarege ogwu Ju okaan̄be
(Mat 15:21-28)
24 Jisọs oneninan̄a me ere ya isi agan̄ ama Taya. Me agan̄ ya, îkaan̄ uwu ge îgbabe ikup. Ìkaweek ibe ebi ene eriọọn̄ ibe ke ọmọ òwa me uwu ya, ire, ìkakọt ìlet. 25 Îkaan̄ enenwaan̄ ge, ogwu ijo erumun̄ okisisaak ogwu gwun̄ enenwaan̄. Mgbọ ogwu enenwaan̄ yi onọbe inu ofolek kè Jisọs, inunu me uwu ya, mè inirọn̄ me ijọn̄ me ukot kè Jisọs. 26 Ogwu enenwaan̄ yi ìre ogwu ido Giris. Eman ọmọ me agan̄ Fonisia eyi òkup me ido Siria. Ọmọ okekibeek Jisọs ibe irieen̄ ijo erumun̄ ya isibi me emen gwun̄ kan̄ enenwaan̄.
27 Jisọs onenifọọk ọmọ ibe, “Tele mè nsabọn edasi erie inorie ejot owot. Mije, ìkatat ibe eben inorie nsabọn etọp eto me ijọn̄ enyi ibo.”
28 Ire, ogwu enenwaan̄ ya ofọfọọk ọmọ ibe, “Iin̄, Ogwu Nte, ikeya ke îre ubọk owu otumube. Ire, ibo ìkekikup si me irak ikasi ikirie ngigen̄e inorie òkinan̄a me ubọk nsabọn igwook me ijọn̄.”
29 Jisọs obebe ọmọ, “Owu ofọọk itop. Eya orọ gwu kom fo, ke ijo erumun̄ ya îra isibi itele gwun̄ kwun̄.”
30 Ogwu enenwaan̄ ya ogwugwu ikom ifo isi ire uwu kan̄, mè imun̄ gwun̄ kan̄ ya olaakbe me inyọn̄ mkpilaak, mè imun̄ si ibe ke ijo erumun̄ ya îtele gwun̄ ya.
Jisọs îgwa ogwu ìnan mè mbuuk
31 Jisọs oneninan̄a me Taya ije iraka Sidọn isi ire okwaan̄ oyô Galili, mè iraka isi agan̄ ekigwen Akọp Ama. 32 Me ere ya, enenisa ogwu ìnan ge ikakọtge ìtumu si ikọ ìjaan̄ ijet Jisọs, mè ibeek ibe itoon̄ ubọk me lek, mè igwa.
33 Jisọs osasa ene ya ije inan̄a me etete ebi ene isi ere ònọnọọn̄, mè itap otubọk kan̄ me utọn̄ ene ya agan̄ iba, mè icho ataak, mè ichak ubọk me lek alọm ene ya, 34 mè ibene chieen̄ ikpọ inyọn̄, mè inunuun̄ me emen kan̄, mè ibe, “Efata!” eyi òsisibi, “Chili!” 35 Mgbọ yaage, utọn̄ ene ya ochichili, ibebene ikinọ ikọ. Alọm kan̄ si otọtọn̄ọ, ibebene ikitumu ikọ ijaan̄.
36 Jisọs otutumu ibe ekakpa inu ọmọ orọbe ya ìnyi ene geege. Ire, ike îkigban ema, ikeya ke ema eriọọn̄ ikikpa inu ya ikana ere. 37 Inu yi Jisọs orọbe okeke otutuuk ebi ìnọnọ chieen̄ iraka onineen̄. Ema ekekitumu ibe, “Inu geelek îkirọ ìkpọkpọ ikijaan̄. Îrọ si inyi ogwu ìnan inọ ikọ, mè irọ inyi ogwu mbuuk itumu ikọ!”