Bɩ coni Yeésu Piláátɩ gbeni
23
Nɩ́ ba fii bɩ kɔ́kɔ́ kɩ conɩ Yeésu Piláátɩ gbeni. 2 Líbó nɩ́ ba búri kɩ pɩɩnɩɩ́nɩ wʊ nɩ ɩ́wɛ́ɛ́ nɛɛ́yɩ: «Tɩ́ ká ʊ́já nɛɛ́wʊ káa ɖée soolií tɩ́wáá ńɖó yɛ: Ʊ ɖée pereŋ zamáa naa bɩ ta fɛrɛɛ Rooma wáá ʊ́bwáyáá úkpé lambúu nɩ́ kɩ mii naa ʊ sá ʊ́mánjá Mwáátáá wáá anɖébi Mesííya nɩ ʊ́bwáyáá» 3 Piláatɩ ŋ́ka barɩɩ wʊ naa: «Ɩ́sɛ́ ńsá Yahúúɖúmɩ wáá ʊ́bwáyáá?» Yeésu ŋ́ka kɩ́ɩ́ wʊ́ naa: «Ɩsɛ́ ńwɛ́ɛ.» 4 Piláatɩ ŋ́ka soó saráaraamɩ wáá bíkpélébí nɩ zamáa naa: «Má ká ɩbá ʊ́já nɛɛ́wʊ bo, ya bɩ́ɩ́ canɩ́ ka bɩ́ kpɔ wʊ yɛ.» 5 Amá nɩ́ ba kpée púú nɩ ḿpwáá kɩ wɛ́ɛ́ náá: «Ʊ mii zamáa naa bɩ fii nɩ ńɖó wáá bíkpélébí, ɖoo Galilée ńnaa wáa búri yɛ, kɩ co Yuuɖée kɔ́kɔ́ pooni hálɩ ɩ́lɛ.»Bɩ conɩ Yeésu Heróoɖɩ gbeni
6 Sáatɩ waa Piláátɩ ka ŋú ɩ́wɛ́ɛ́ nɛɛ́yɩ yɛ, nɩ́ wa barɩɩ naa: «Ʊ́já nɛɛ́wʊ sa galiléejawʊ gɛɛ?» 7 Nɩ́ wáa ŋú náá Yeésu nyɛ́nɩ́ nɩ ńɖó ŋwaa bo Heróoɖɩ káa kpɛɛ́ yɛ pooni, nɩ́ wa canɩ bɩ co nɩ wʊ Heróoɖɩ gbeni, ɖoómi ʊ la ɖé Yerúsalɛ́ɛmɩ ɖáwáá ɩ́wɩɩ má nɩ́. 8 Ɖá tɩ́nɩɩ mwáŋgɩɩ Heróoɖɩ naa ʊ́ ká Yeésu, ɖoómi ʊ la ŋú ʊ́wáá ńwɛ́ɛ́ nɩ kɩ peé la bɔɔ́ ʊ́ pɔ́ nɩ́ wʊ. Ʊ bɩ baa naa ʊ yá maamáácimɩ ʊbá ka ʊ ká. 9 Ʊ́ barɩɩ wʊ ɖɩbarɩɩɖɩ ɖawómɩ, amá Yeésu ká kɩ́ɩ́ wʊ ɩbá. 10 Ba yáá Mwáátáá wáá saráa yɛ wáá bíkpélébí nɩ́ bɩmarámínlí lá ɖé líbó kɩ pɩɩnɩɩ́nɩ Yeésu ɖa pwaa. 11 Heróoɖɩ nɩ ʊ́wáá sɔ́ɔ́jamɩ ŋ́ka yɛɛnɩ wʊ nɩ kɩ́ lá wʊ. Bɩ fú wʊ kʊ́fúúgáá kʊ́jɔ́jɔ́ɔ́kʊ́ kʊbá nɩ kɩ gɔ́rɛnɩ wʊ Piláátɩ gbeni. 12 Ɖá ɖáárɩ́ má, Heróoɖɩ nɩ Piláatɩ ka kpɛ́nɩ kʊ́jɔ́tɩ́ɩ́, bɩ́ɩ́ ba lá sá kʊ́bááráámɩ́.
Bɩ gba nííya naa bɩ bɩ́ɩ́ kpɔ Yeésu
13 Piláátɩ yííní saráaraamɩ wáá bíkpélébí, bɩ́bwɛ́ɛ́bɩ, nɩ zamáa, 14 nɩ́ kɩ soó bɩ naa: «Nɩ́ ɖáánɩ mɩ unyii nɛɛ́wʊ kɩ soó mɩ naa ʊ laá ʊ́wɛ́tɛ́nɩ́ zamáa. Ɖáké ḿmɛ wa barɩɩ wʊ ɖɩbarɩɩɖɩ ninyimíŋ yɛ, má ká ɩbá ʊ́já nɛɛ́wʊ bo ya na ya yɛ kɩ barɩɩ́ náá bɩ kpɔ wʊ, ka nɩ pɩɩnɩɩ́nɩ wʊ yɛ. 15 Heróoɖɩ mɛ́tɛ́ ká ká ʊ́wáá taalɩ́ ɖoómi ʊ gɔ́rɛnɩ́ wʊ kɩ tee tɩ. Unyii nɛɛ́wʊ ká yá ɖícútírí ɖɩbá ɖa bɛ́nɩ naa ʊfɛɛmɩ ńtó yɛ. 16 Ɖée ń bɩ́ɩ́ canɩ́ bɩ́ fɔ́ wʊ agbeŋgbí, ɖa ké kɩ pátɩ́ wʊ kɩ́ tɔ́.» 17 Báanɩ Ɖábóɖɩ́gɛ́ɛ́tɛ́rɩ́ ʊ́lá wáá jíŋgáárɩ́ Piláátɩ bɩɩ́ la pátɩ́ sárɩ́karaa ʊbá. 18 Amá bɩ kɔ́kɔ́ ŋ́ka búri kɩ́ kpííníí: «Kpɔ ʊ́já nɛɛ́wʊ! Kɩ́ pátɩ́ tɩ́ Barabáasɩ!» 19 Bɩ pɩɩ Barabáasɩ sárɩ́ka ɖoómi ʊ la ku unyii sáa waa binyii káa la fiini Róoma tɩɩbɩ bo ńɖó pooni yɛ. 20 Ɖáa sá náá Piláátɩ laá ʊ́ pátɩ́ Yeésu yɛ, nɩ́ wa kpée lóloonɩ bɩ. 21 Amá nɩ́ ba kpíí ʊ bó náá: «Fáá wʊ ńɖɔ́ ŋ́kaŋagá páá! Fáá wʊ ńɖɔ́ ŋ́kaŋagá páá!» 22 Piláátɩ ŋ́ka gba ńwɛ́ɛ́ mɩ́táárɩ́ nɩ kɩ wɛ́ɛ́ bɩ naa: «Ɩ́kpɩ́ɩ́ ŋɩ́lá nɩ́ wa yá. Má ká ɩbá ʊ bó ya bɛ́nɩ múkú yɛ. Ń bɩ́ɩ́ canɩ́ bɩ fɔ́ wʊ agbeŋgbí, ɖa ké kɩ́ pátɩ́ wʊ.» 23 Amá bɩ lɩɩ ŋá kɩ́ kpííníí nɩ ḿpwáá: Fáá wʊ ńɖɔ́ ŋ́kaŋagá páá! Hálɩ bɩ́wáá íkpíí ŋ́ka fétee wʊ. 24 Nɩ Piláátɩ ka kɩ́ɩ́ kɩ bɩ́ɩ́ yá yaa zamáa káa barɩɩ́ yɛ. 25 Ʊ pátɩ waa baa bɩ tɔ́ sárɩ́kanɩ ɖifiiri nɩ ɖɩ́kpɔ́rɩ́ bó, waa báa bɩ laá yɛ; ya sa nɩ Yeésu wɩ́ɩ́, Piláátɩ ŋ́ka canɩ bɩ yá nɩ wʊ kaa báa laá yɛ.
Bɩ fáá Yeésu ńɖɔ́ ŋ́kaŋagá bó
26 Sɔ́ɔ́jamɩ káa kɩ́ɩ pá nɩ Yeésu yɛ, nɩ́ ba tó Sirɛ́ɛnɩ wáá ʊ́já waa baa yi naa Símɔ́ɔn yɛ ńsɛ, wa nyɛ́nɩ́ nɩ tɩ́satɩnɩ. Bɩ pɔ́rɛ wʊ ḿpwáá náá ʊ́ pɛɛ ńɖɔ́ ŋ́kaŋagá, kɩ́ ɖe Yeésu bɔ́ɔ́nɩ́. 27 Zamáa ʊmɔntɩ ɖe Yeésu kɩ pwɛɛnɩ nɩ bɩ́pɩ́ɩ, bɩ́pɩ́ɩ bɩ́ɩ́ wíí kɩ beleŋ́ úbó. 28 Yeésu ŋ́ka kɛɛtɛ ʊ́bá bíbó, kɩ́ wɛ́ɛ́ bɩ naa: «Yerúsalɛ́ɛmɩ wáá bɩ́pɩ́ɩ, tá wíí maá ńbó! Amá wíí maá nɩ́mánjá nɩ níbíbi bo! 29 Ɖoómi ɩ́wɩɩ ŋɩbá bɩ́ɩ́ fóóní ŋwaa ɖaarɩ unyii káa bɩ́ɩ́ wɛ́ɛ́ náá: "Ḿmwáá kɩ tee bɩ́pɩ́ɩ́ bɩŋɔntɩlɩ, ba na ma yɛ, náá ká pé ḿbɩ́ɩ́ yɛ! 30 Líbó nɩ binyii ŋ́ka bɩ́ɩ́ búri kɩ gi ájɔ́ɔ́ náá: "Lɛ́ maá tɩ́ bó!" Nɩ́ ígólíímú náá: "Ci maá tɩ́ bó!" 31 Ɖoómi ńɖɔ́ ńsɔnsɔm nɩ́ ba kɩ́ɩ́ yáá nɩ ɖéé naa yɛ, lɛɛ-lɛɛ nɩ́ ba bɩ́ɩ́ ɖáá yá nɩ ńɖɔ́ ŋ́kóŋkóó?»
32 Bɩ la cóni bɩ́já bilé, mɩ́tákpɩ́ɩ́ráámɩ́ bɩbá, naa kɩ kpɔ bɩ nɩ Yeésu. 33 Sáa waa báa fóó ɖɩtɛntɛɛrɩ ɖaa ba yi naa ɖiyiikpɔ́rɩ́ yɛ; nɩ́ ba fáá Yeésu ńɖɔ́ ŋ́kaŋagá páá. Nɩ́ kɩ́ fáá mɩ́tákpɩ́ɩ́ráámɩ́ bilé má, ʊbá ʊ́wáá ńjɩ́ɩ́bó, wá ké yɛ ʊ́wáá ŋ́gambó 34 Yeésu ŋ́ka wɛ́ɛ́ náá: «Mɩ́ɩ́náá, cátɩ́ bɩ ɖoómi baá nyí yaa baa yáá yɛ.» Ka bɩ bú tá ʊ́wáá tífúgátɩ́ nɩ́ ba tɔ́ áɖé naa ʊ je náá ʊ́ gbá. 35 Zamáa yó líbó kɩ kpɛɛ́; yahúúɖúmɩ wáá bíkpélébí bɩ́ɩ́ ɖé kɩ la wʊ nɩ́ kɩ́ lólóó náá: «Ʊ pɛ ba ké yɛ, ʊ́ pɛ ʊ́bá, ńsá náá ʊ sá Mwáátáá wáá Mesííya waa Mwáátáá káa lɛɛ yɛ!» 36 Sɔ́ɔ́jamɩ mɛ́tɛ́ ŋ́ka lá Yeésu, kɩ́ cúní nɩ wʊ, kɩ pe wʊ finɛ́ɛ́gɩrɩa nɩ́ kɩ́ soó náá: 37 «Ɩ́ sá náá Yahúúɖúmɩ wáá ʊ́bwáyáá pɛ sɩ́bá sɩ́mánja!» 38 Yeésu yííɖi paa, ńɖɔ́ ŋ́kaŋagá páá, bɩ́ fáá kʊ́kpáŋkpáa kwaa paa báa waa ɩ́waa nɛɛ́yɩ: «Nɛɛ́wʊ ńsá Yahúúɖúmɩ wáá ʊ́bwáyáá.»
39 Mɩ́tákpɩ́ɩ́ráámɩ́ cíígá ʊbá waa báa fáá ńɖɔ́ ŋ́kaŋagá bó yɛ, ŋ́ka cii Yeésu naa: «Ɖáa sá sɩ́ ńsá Mesííya? Pɛ sɩ́bá sɩ́mánja ɖa ké kɩ́ pɛ tɩmɩ mɛ́tɛ́.» 40 Amá mɩ́tákpɩ́ɩ́ráá wá ké yɛ ŋ́ka yɩ́ɩ́ nɩ wʊ nɩ kɩ wɛ́ɛ́ náá: "A síŋíí Mwáátáá, ɩ́sɛ́ waa baa ɖée kuu ɖéé wɩ́ɩ́ yɛ. 41 Ḿmɛ́ nɩ ɩ́sɛ́ wáá ɖijifɛrɛ ɖɩɖɛbɛrɩ tógó, ɖoómi yaa táa yá yɛ wáá ɖɩfɛrɛɛɖɩ nɩ ta fɔɔ́ yɛ; amá wɩ́ɩ́ ká yá ɩ́kpɩ́ɩ́ ɩbá. 42 Nɩ́ wá kóte naa: «Yeésu, nyuní ńbó sáa waa ɩ́ ɖaa ɖa náá náá ɩ́ jé sɩ́bwɛ́ɛ́tɛ́.» 43 Yeésu ŋ́ka kɩ́ɩ́ wʊ, naa: «Ń soo sɩ́, ɩ́já náá: Ɖílemi mɩ nɩ sɩ bɩ́ɩ́ ɖéé arɩ́jáńna pooni.»
Yeésu wáá múkú
44 Ɖa la sá ɖéé ńwɩɩnɩ wáá kíkéncíí sáatɩ, nɩ ńwɩɩ ka canɩ ɖɩ́jánɖɩ́, nɩ́ ɖa yá ɖɩbwambwá ńɖó kɔ́kɔ́ bó, hálɩ áwamɩ bɩta. 45 Ńwɩɩ káá wɛ́tɛ ɖéé yɛ, nɩ́ paatɩ́ɩ́saŋ wa péréŋ ɖɩtɛntɛrɩ ɖa tɩ́nɩɩ sá ɖacɩrɩ-cɩrɩ, Mwáátáácénɖeni yɛ ŋ́ka bú ʊ́bá milé. 46 Yeésu ŋ́ká kpíí nɩ ḿpwáá nɩ́ kɩ wɛ́ɛ́ náá: «Mɩ́ɩ́náá sɩ́ŋáánɩ́ nɩ́ ma tɔ́ɔ́ ńwáá mɩfɛɛ.» Ɩ́wɛ́ɛ́ nɛɛ́yɩ bɔ́ɔ́nɩ́ nɩ́ wa kpe. 47 Róomatɩɩbɩ wáá sɔ́ɔ́ja úkpée káa ká ya la fóóní yɛ; nɩ wa nyɔ́m Mwáátáá nɩ́ kɩ́ wɛ́ɛ́ náá: Ɩ́já bó unyii nɛɛ́wʊ lafʊ tógó. 48 Nɩ́ baa kɔ́kɔ́ la ɖá bɩ́ kpaá yɛ, káa ká ya la yá yɛ, nɩ bɩ́ɩ́ kɔ́kɔ́ ŋ́ka gɔ́rɛnɩ́ bɩ́wáá kɩ ɖéé ńnyíimɔm pooni. 49 Yeésu jɔ́tɔ́lɔ́mɩ nɩ bɩ́pɩ́ɩ ba cɛ́ɛ́nɩ́ɩ́ wʊ ɖoo Galílée yɛ, tɩ yóre ńɖanɖabó, ka kɩ kpɛɛ́ ya yáá yɛ.
Bɩ sí Yeésu
50-51 Ʊ́já ʊbá la ɖé, bɩ yi wʊ naa Yúúsífu, ʊ nyɛ́nɩ́ nɩ Arimatée ńnaa Yahúúɖúmɩ káa ɖé yɛ. Ʊ́já má la ya nɩ́ kɩ́ tógó, nɩ́ ʊlá baa Mwáátáá Bwɛ́ɛ́jéri wáá ɖífóóńɖí. Ʊ lá ɖé bícúgúlí bitakpélébí cíígá, amá wáa la kɩ́ɩ́ yaa ba ké yɛ káa la kɩ́ɩ́ nɩ́ kɩ́ yá yɛ. 52 Ʊ la tɩ ká Piláátɩ nɩ́ kɩ barɩɩ wʊ Yeésu wáá tíwé. 53 Nɩ Yúúsífu ka canɩ bɩ sini Yeésu wáá tíwé ńɖɔ́ ŋ́kaŋagá páá, nɩ wa pɔ́ɔ́ wʊ kʊ́cɔ́lɔ́ɔ́ pooni nɩ kɩ tɩ tɔ́ wʊ ɖíkúrí ɖaa báa su kʊ́tá pooni, ɖaa pooni ba ná láá sí unyii ɖaarɩbá-ɖaarɩbá. 54 Ɖa la sá nɩ ńwɩɩ ŋaa báa kpɩ́ɩ́rɩ́ɩ́ ɖiwonɖi wɩɩŋʊ yɛ, nɩ́ ɖiwonɖi wɩɩŋɔ má bɩɩ́ lá búri. 55 Bɩ́pɩ́ɩ ba cɛ́ɛ́nɩ́ɩ́ Yeésu ɖoo Galilée nɩ Yúúsífu co ɖɩtɛntɛɛrɩ ma pooni, bɩ ká ɖíkúrí má nɩ kɩ kpaá ɖéé ba bíri Yeésu wáá tíwé yɛ. 56 Yɩ́ɩ́ bɔ́ɔ́nɩ́ nɩ́ ba gɔ́rɛ bɩ́wáá nɩ kɩ bɔɔ ŋkpɔwámɩ nɩ́ tɩlaarʊ́mɩ baa báa bɩ́ɩ́ tɩ pɩ́ ʊ́wáá tíwé bó yɛ. Ɖiwonɖi wɩɩŋʊ, bɩ la womɩ ɖéé mará káa barɩɩ́ yɛ.