Yeésu wáá ɖifeńɖí
24
Kpátákpáa ɖáárɩ́ kʊcáń-cáŋkpɩ́ɩ́nɩ́ bɩ́pɩ́ɩ ŋ́ka co ɖíkúrí bó kɩ ba ŋkpɔmɩ nɩ tɩlaarʊ́mɩ baa baá bɩ kóre yɛ. 2 Nɩ́ ba ká náá ɖɩ́tá ɖaa báa pɩɩ nɩ ɖíkúrí wáá ḿbɔmbɔ yɛ bíni kɩ yó ŋ́kónɖó bó. 3 Nɩ́ ba kɔ́ ɖíkúrí pooni amá baá ká Tɩ́ɖáá Yeésu wáá tíwé. 4 Nɩ́ ɖa yá bɩ bítí ká nyí yaa pooni báa ɖé yɛ, nɩ́ ba pee litini bɩ́já bilé binyimíní bɩ́ fú tífúgátɩ́ ta nyelesií yɛ. 5 Tɩ́náŋgá ŋ́ka mɔ bɩ́pɩ́ɩ́ má, nɩ́ ba guni binyimíŋ. Bɩ́já bilé má ŋ́ka soó bɩ naa: «Batɩɩ bó nɩ́ na bɔɔ́ unyii wa ɖe mɩfɛɛnɩ yɛ bíkpíí cíígá? 6 Ʊ kpá ɩ́lɛ, ʊ feni múkú pooni. Nyuní máa yaa waá la soó nɩ́ sáatɩ waa wáa la kote ɖé Galilée yɛ. 7 Ʊ la gi naa: "Ɖa barɩɩ́ bɩ gbá Unyiijapwa kɩ tɔ́ binyiikpɩŋkpɩɩbɩ ŋáánɩ́, bɩ́ fáá wʊ ńɖɔ́ ŋ́kaŋagá páá nɩ́ ńwɩɩ ńtáárɩ́ɩ́ ʊ fení bíkpíí cíígá".»8 Nɩ́ bɩ́pɩ́ɩ má ŋ́ka nyuni Yeésu wáá ɩ́wɛ́ɛ́ bó. 9 Nɩ́ bá nyɛ́ ɖíkúrí pooni kɩ ku kɩ tɩ taŋ yɩ́ɩ́ nɛɛ́yɩ kɩ soó bítóó pwí nɩ ʊbá nɩ bipinlii ba ké yɛ kɔ́kɔ́. 10 Ɖa la sá Márɩ́yam Magɩɖáláa yɔwʊ, Yáánɩ nɩ Márɩyám, Záakɩ nyi nɩ bɩ́pɩ́ɩ ba ké yɛ mɛ́tɛ́, bɩ́ kɔ́kɔ́ ŋ́ka taŋ ílemí má kɩ soó bítóó. 11 Amá bítóó ka maatɩɩ naa bɩ ɖée lólóó báanɩ lɛɛ-lɛɛ, nɩ́ ba na pé bɩ ɩ́já. 12 Ɖá tám má Péétiro ŋ́ka fii kɩ síŋii kɩ co ɖíkúrí pooni nɩ wa tɩ gbaa kɩ kpaá, kʊ́cɔ́lɔ́ɔ pɩ́m waa báa la ci tíwée bo yɛ, bámbá nɩ́ wa ká. Nɩ́ wá ku ʊ́wáá kɩ́ ɖé bítíní ya yá ńnɛ yɛ bo.
Emayúúsi sɛmpaa
13 Ńwɩɩ ŋ́kolóó má ɖáárɩ́ bipinlii bilé la pá kíɖóbíí kaa baa yi naa Emayúúsi yɛ, ɖáwáá ńɖátʊ́ʊ́ ɖé ɖéé séé kɩ́ fii Yerúsalɛ́ɛmɩ kɩ́ yá áwamɩ bilé kɩ́ co líbó. 14 Nɩ́ bɩ́kɔ́kɔ́ ka ɖé kɩ lólóó nɩ ta yaa kɔ́kɔ́ yá yɛ. 15 Sáatɩ waa báa ɖé kɩ lólóó nɩ ta yɛ, Yeésu mánjá ŋ́ka ɖáa kɔ́ bícíígá nɩ bɩ́kɔ́kɔ́ ka gba ake. 16 Bipinlii la kpɛɛ́ wʊ amá yambá la pere bɩ naa bɩ́ ta bɛ́ɛ́ wʊ. 17 Yeésu ŋ́ka barɩɩ bɩ naa: «Faawɩ́ɩ ʊ́lá nɩ́ na ɖé kɩ coo kɩ yáá yɛ?» Nɩ bipinlii ka yóre, ńnyimímmɔm pooni. 18 Bícíígá waa báa yi Kilewopáásɩ yɛ ŋ́ka kɩ́ɩ́ wʊ naa: «Yerúsalɛ́ɛmɩ wáá binyii kɔ́kɔ́ nyí ya yá ɩ́wɩɩ nɛɛ́yɩ yɛ, nɩ́ sɩ́bámbá ŋ́ká nyí yɩ?» 19 Nɩ́ wa barɩɩ bɩ naa: «Ɩ́lá ńyá?» nɩ́ ba kɩ́ɩ́ wʊ naa: «Ya bɛ́nɩ Yeésu Naázarɛ́ɛ́tɩ yɔwʊ, wa la sá anɖébi wa pwaa ʊ́wáá ɖɩ́yárɩ́ nɩ́ ʊ́wáá ɖílóloori pooni, Mwáátáá nyimíŋ nɩ zamáa kɔ́kɔ́ nyimíŋ, 20 nɩ́ lɛɛ-lɛɛ tɩ́wáá saráaraamɩ wáá bíkpélébí nɩ tɩ́wáá ńɖóní wáá bíkpélébí ŋ́ka gba wʊ kɩ tee Piláátɩ naa bɩ kpɔ wʊ. Nɩ́ ba fáá wʊ ńɖɔ́ ŋ́kaŋagá páá. 21 Nɩ́ tɩmɩ, tɩ la kpɛ támáa naa wɩ́ɩ́ ń bɩ́ɩ́ ɖáá pɛ Isɩrayɛ́ɛlɩ. Amá ńwɩɩ ńtáárɩ́ sɔ́ ɖoo ílemí má káa yá yɛ. 22 Kɩ pwɛɛ nɩ ɖée bɩ́pɩ́ɩ́ bɩkaŋga ba ɖé tícíígá canɩ tɩ́ kɔ́ bítí, báa co ɖíkúrí pooni kʊ́cáncáŋkpɩ́ɩ́nɩ́ 23 nɩ́ bá ná kánɩ́ Yeésu wáá tíwé yɛ, bɩ́ gɔ́rɛnɩ́ kɩ́ ɖáa soó tɩ́ náá ɖá lɛɛ kɩ míni bɩ Malááyɩ́kamɩ ba soó bɩ naa Yeésu ɖé mɩfɛɛ pooni!" 24 Tícíígá bɩbá co ɖíkúrí pooni kɩ tɩ ká ɖée yaa bɩ́pɩ́ɩ́ káa wɛ́ɛ́ yɛ nɔ́ɔ́. Amá baá ká Yeésu. 25 Nɩ́ wa soó bɩ naa: "Binyii ba na cɩ́ yɛ, bakpɛŋgɛlɛɛ́ŋ gbatɩɩ́ tám ɖáánɩ́ kɩ́ pá ɩ́já yaa kɔ́kɔ́ anɖébimɩ káa wɛ́ɛ́ yɛ. 26 Ɖaá bɩ bɛ́nɩ naa Kiríísito ńyá wahála ɖée, ɖáánɩ kɩ sɩɩ kɔ́ ʊ́wáá ɩ́kpɩ́lɩ́ɩ́ nɩ́?" 27 Nɩ́ Yeésu ka bóti bɩ yaa Ɩ́waa ɖacɩrɩ-cɩrɩ yɛŋɩ káa lóloo úbó yɛ. Ʊ búríni Múúsá wáá tákárɩɖá, ɖá bɔ́ɔ́nɩ́ nɩ́ wa taŋ anɖébimɩ wáá tákárɩɖámɩ. 28 Báa cúni kíɖóbíí kaa pooni baa pá yɛ, Yeésu ŋ́ka yá ɖée wa laá náá ʊ sɔ́ŋɔ́ɔ́n ʊ́wáá ake. 29 Amá nɩ́ ba nyáŋaa wʊ naa: «Karɩ́nɩ tɩ, kʊ jɔ́ɔ́tɩ nɩ́ kʊ kɩ́ɩ laá kɩ́ mwɛ́.» Yeésu ŋ́ka kɔ́ ɖícéní ka kɩ́ karɩ́ nɩ bɩ. 30 Nɩ́ ʊ nɩ bɩ ŋ́ka karɩ kɩ́ bɩ́ɩ́ jé tíjégáá, nɩ́ wa gba kpɔ́nɔ́ kɩ mɛɛ kɩ nyɔ́m Mwáátáá nɩ́ kɩ gíí kɩ tee bɩ. 31 Nɩ́ binyimíŋ ka citi nɩ ba bɛ́ɛ́ Yeésu, amá nɩ́ wa wɛ́tɛ binyimíní. 32 Nɩ ba ɖé kɩ soó tá náá: «Á ká náá ɖa lá ɖé ɖéé ḿmíí ŋ́kɩ́ɩ́tɩ́ɩ́ tɩkpɛŋgɛlɛɛ́ŋ pooni sáa waa wáa lólóó nɩ tɩ ńsɛmpaa nɩ́ kɩ́ bótíí tɩ yaa Ɩ́waa ɖacɩrɩ-cɩrɩ yɛŋɩ káa mii yɛ?»
33 Nɩ́ ba peé fii líbó-líbó kɩ gɔ́rɛ Yerúsalɛ́ɛmɩ, báa fóó líbó yɛ, nɩ ba ká bítóó pwí nɩ ʊbá má nɩ baa bɩnɩ káa ɖé líbó yɛ. 34 Nɩ́ ba soó bipinlii bilé má náá: «Ɖa sá ɩ́já Tɩ́ɖáá lafʊ gɔ́rɛnɩ́ mɩfɛɛnɩ! Símɔ́ɔn ká wʊ.» 35 Nɩ́ bɩ́ɩ́ ŋ́ka taŋ bɩ ya yá ńsɛmpaa yɛ, nɩ ɖéé báa bɛ́ɛ́ nɩ Yeésu sáatɩ waa wáa ɖée gííníí kpɔ́nɔ́ yɛ.
Yeésu lɛɛ ʊ́bá kɩ míni ʊ́wáá bipinlii
36 Sáatɩ waa báa ɖé kɩ́ lólóó ɖée yɛ, Yeésu ŋ́ka fóóní bícíígá, nɩ́ kɩ́ ɖɔ́ɔ́ bɩ kɩ́ gí náá: «Ɖiwonɖi ńɖéé nigbeni.» 37 Nɩ bipinlii ka jége, tɩ́náŋgá ka tɩ́nɩɩ mɔ́ bɩ ɖoómi bɩ nyí náá ʊfanfantɩ nɩ́ ba ká. 38 Amá Yeésu ŋ́ka barɩɩ bɩ naa: «Batɩɩ bo nɩ́ ɖa sooliɩ́ nɩ ɖée? Batɩɩ bo nɩ síka-síka ka ɖé nɩkpɛŋgɛlɛ́ŋ pooni? 39 Kpaá maá ńŋálɩ́ŋ nɩ nnatáŋ: ḿmɛ́ nɩ́ ɖa lafʊ sá. Jɛɛ maá mɩ́, kpaá maá, ɖoómi ʊfanfantɩ ká kpɛ tíwée náá ɖɩ́kpɔ́rɩ́ amá ḿmɛ́ kpɛ.» 40 Ʊ́ wɛ́ɛ́ ɩ́wɛ́ɛ́ nɛɛ́yɩ nɩ́ kɩ míni bɩ ʊ́ŋálɩ́ŋ nɩ ʊnatáŋ. 41 Ɖée ba ná la fété kpée pé ɩ́já ɖoómi ḿmwáá nɩ bítí gbé bɩ, nɩ́ wa barɩɩ bɩ naa: «Nɩ kpɛ kaa báa bɩ́ɩ́ fété kɩ jé ɩ́lɛ́ yɛ?» 42 Bɩ tee wʊ ʊjɛ ʊ́kenígá ɖígé. 43 Nɩ wa fɔɔ nɩ́ kɩ ŋmɔ́ binyimíŋ. 44 Yɩ́ɩ́ bɔ́ɔ́nɩ́ nɩ́ wa soó bɩ naa: «Sáa waa máa kóte la ɖé nigbeni yɛ, ń la soo nɩ naa: Yaa kɔ́kɔ́ báa waa ḿbó yɛ, Múúsá wáá mará pooni, anɖébimɩ wáá tákárɩ́ɖámɩ pooni nɩ Íleb wáá tákárɩɖá pooni yɛ, yɩ́ɩ́ kɔ́kɔ́ bɩ́ɩ́ yá.» 45 Nɩ́ wa canɩ ɖa matɩ bɩ naa bɩ́ ŋmɔ́ ɩ́waa pombírí. 46 Nɩ́ wa soó bɩ naa: «Kpaá kaa báa waa yɛ: Mesííya bɩ́ɩ́ yá wahála, nɩ́ kɩ fení ńwɩɩ ńtáárɩ́ bíkpíí cíígá 47 Nɩ́ úyííɖi bo bɩ́ káá ɩ́ɖó kɔ́kɔ́ nyímíŋ, ɖɩ́kpɛ́nɖɩ́ nɩ́ ɩ́kpɩ́ɩ́ ɖɩ́cátɩ́rɩ́ kɩ́ búrínɩ Yerúsalɛ́ɛmɩ. 48 Nɩmɩ ńsá yɩ́ɩ́ kɔ́kɔ́ wáá seríyaraamɩ. 49 Nɩ́ ḿmɛ́ mánja, ń bɩ́ɩ́ tɔ́nɩ́ nɩ́ kaa Mɩ́ɩ́náá káa gba alɩkáwʊlɩ́ náá ʊ bɩ́ɩ́ pá nɩ́ yɛ. Ka sá nɩ nɩmɩ, karɩ́ maá ńɖó pooni kɩ́ baanɩ́ Mwáátáá wáá ḿpwáá ńgbé nɩ́.
Yeésu jɔ́ kʊ́tápáá
50 Yɩ́ɩ́ bɔ́ɔ́nɩ́, Yeésu ŋ́ka conɩ bɩ ńɖó bɔ́ɔ́nɩ́ Bétááníi gbeni bó, líbó nɩ́ wa ɖáátɩ ʊ́ŋálɩ́ŋ kɩ́ jé bɩ alɩbárɩ́ka 51 Sáa waa wá ɖée jéŋgi bɩ alɩbárɩ́ka yɛ, nɩ́ wa ɖátɩ nɩ bɩ, nɩ́ Mwáátáá ka jɔ́ɔ́nɩ́ wʊ kʊ́tápáá. 52 Ɖá sáa máa bipinlii gbaa bíɖéyiiŋ bo unyimíní, yɩ́ɩ́ bɔ́ɔ́nɩ́ nɩ́ ba gɔ́rɛ Yerúsalɛ́ɛmɩ kɩ gbé ḿmwáá ńtakpé. 53 Báanɩ báɖáárɩ bɩ́ ɖé Mwáátáácénɖeni kɩ́ nyɔ́m Mwáátáá.