Lúkɩ 21

Úpíípó uceceeli wáá ɖɩ́párɩ́

Yeésu ŋ́ka ɖáátɩ anyimí kɩ ká ajimíráámɩ káa ɖée tɔ́ɔ́ ajimí ajimítɔ́ɔ́rɛ fém Mwáátáácénɖeni. 2 Nɩ́ wa kpée ká úpíípó uceceeli ʊbá mɛ́tɛ́ káa ɖáa tɔ́ ajimí áwáá ákúbí alé. 3 Yeésu ŋ́ka wɛ́ɛ́ náá: ńsoo nɩ ɩ́já: Úkpíí pó uceceeli nɛɛ́wʊ tɔ́ ɖa po ba ké yɛ kɔ́kɔ́. 4 Ba ké yɛ lɛɛ bijimíŋ pooni ŋa na bɩ́ɩ́ fɔ́ɔ́sɩɩ bɩ yɛ kɩ tɔ́. Amá wɩ́ɩ́ wáá íceceé pooni ʊ tɔ́ kaa kɔ́kɔ́ bɩ ké wʊ naa ʊ jé kɩ́ karɩ́ mɩfɛɛnɩ yɛ.

Yeésu káánɩ́ɩ́ Mwáátáácénɖe wáá ɖɩwɩɩrɩ

5 Ɖée bɩbá káa lólóó Mwáátáácénɖe wáá kʊ́láa nɩ kɩ gbɛ́ɛ́nɩ́ɩ́ átá ajɔjɔɔ ŋaa báa má nɩ kʊ yɛ nɩ́ tɩ́págáá kʊ́láá yɛtɛ taa báa pé Mwáátáá nɩ kɩ gbaa kóré nɩ kʊ yɛ, Yeésu ŋ́ka wɛ́ɛ́ náá: 6 Káa náá kpɛɛ́ ńnɛ yɛ, ɩ́wɩɩ ŋɩbá bɩ́ɩ́ ɖá, náá tɩ́ ká ɖɩ́tá páá ɖɩ́tɔwʊ bó; ɖá kɔ́kɔ́ bɩ́ɩ́ nogó.

Mbusú nɩ ɖɩ́náásɩɩrɩwámɩ

7 Nɩ́ ba barɩɩ Yeésu naa: Úmínlí sáa ʊlá nɩ yɩ́ɩ́ nɛɛ́yɩ ŋ́ka bɩ́ɩ́ fóóní, nɩ kʊ́ta kʊ́lá nɩ́ ta bɩ́ɩ́ bɛ́ɛ́nɩ yɩ́ɩ́ nɛɛ́yɩ. 8 Nɩ́ Yeésu ŋ́ká kɩ́ɩ́ bɩ naa: Gɔ́rɛ́ maá nɩ laákarɩ, ta canɩ́ maá bɩ́ wɛ́tɛ́ nɩ́, ɖoómi binyii ɖabata bɩ́ɩ́ ɖaa gbá ńyííɖí, kɩ́ gí naa: "Ń sá Mesííya! Ɖá sáatɩwʊ kɩ́ɩ cu! Amá ta ɖe maá bɩ. 9 Nɩ ɖaa ŋmɔ náá bɩ lólóó akɔ nɩ soolii-soolii yɛyɩ, ɖa ta yá nɩ tɩ́náŋgá, ɖoómi ɖa barɩɩ náá yɩ́ɩ́ ń bɩɩ́ lɩɩ́ fóóní; amá ɖaá láá bɩ́ɩ́ kóté sáá líbó-líbó ɖúúlínya wáá ɖɩ́kɔ́ɔ́. 10 Nɩ́ wa kpée kóte naa: Zamáa ʊbá bɩ́ɩ́ fii ʊ́tɔ́wʊ bo, nɩ́ ʊ́bwɛ́ɛ́tɛŋkɛ́ kɩbá ńfii kɩ tɔ́wʊ bo. 11 Kɩ́tɩ́ɩ́ bɩ́ɩ́ ɖáá cigí nɩ ḿpwáá átɛntɛɛ ɖabám-ɖabám pooni, muko nɩ́ ɩ́wɛɛwamɩ ŋa pwaa kɩ kuu ŋa soonií yɛ; ɖa bɩ́ɩ́ ɖáá kpɛrɛ́ maamááci nɩ tɩ́tá tɩbá ta ɖɛbɛ́ laákarɩmɩ, tá nyɛ́nɩ kʊ́tápáá yɛ. 12 Amá ɖáánɩ́ yɩ́ɩ́ nɛɛ́yɩ ńfóóní, bɩ bɩ́ɩ́ mɔ́ nɩ, bɩ bɩ́ɩ́ náásɩɩ nɩ, bɩ bɩ́ɩ́ gbá nɩ́ kɩ teé ɖícúgúrí ɖícíŋíírí ɖíítinɩ. Nɩ́ bɩ bɩ́ɩ́ pɩɩ nɩ sárɩ́ká. Bɩ bɩ́ɩ́ coni nɩ bɩ́bwɛ́ɛ́bɩ́ nɩ gómínamɩ nyimíní ńyííɖi bo. 13 Yɩ́ɩ́ nɛɛ́yɩ bɩ́ɩ́ fóóní nɩ́ náá nɩ sáá ńwáá seríyaraamɩ. 14 Peé tɔ́ maá niyiiŋ pooni naa ná kpɛ nɩ kpɩ́ɩ́rɩɩ yaa náa bɩ́ɩ́ kɩ́ɩ́ ka kɩ́ péré nɩ́bá bó. 15 Ɖoómi ń bɩ́ɩ́ pá nɩ́ ḿmánja ńwɛ́ɛ́ nɩ ɖɩ́bɛ́ɛ́rɩ́ ɖaa bo nɩ́wáá kʊ́bááráámɩ́ kɔ́kɔ́ káa fété kɩ kɩ́ɩ́ kókoó kɩ́ cɔ́gɔ́ yɛ. 16 Nɩ́ɩ́náálɩ́mɩ, nɩ nínyílímɩ, níkpólombi nɩ́naarɩmbɩ, ninyibíbi, nɩ nɩjɔ́tɔ́lɔ́mɩ bɩ́ɩ́ gbá nɩ kɩ teé, ɖaké bɩ kpɔ ɖabata nícíígá. 17 Binyii kɔ́kɔ́ káa laa nɩ lemíŋ ńyííɖi bo. 18 Amá nɩ yiiŋ paa wáá ńyií ŋʊbá káá wɛ́tɛ́. 19 Bá maá ɖá wɛ́, ɖée ń bɩ́ɩ́ canɩ́ nɩ́ pɛ nɩfɛɛmɩ.

Yeésu káánɩ́ɩ́ Yerúsalɛ́ɛmɩ wáá ɖinogórí.

20 Nɩ́ nɩ ɖáa ká náá sɔ́ɔ́jamɩ logó náá pwá Yerúsalɛ́ɛmɩ, nɩ́ bɩ́ɩ́ bɛ́ɛ́ ɖá tám má náá ʊ́wáá ɖinogórí kɩ́ɩ cu. 21 Ɖá sáatɩwʊ ba bɩ́ɩ́ ɖéé Yuuɖée pooni yɛ, bɩ́ siŋii kɔ́ ájɔ́ɔ́ pooni; ba bɩ́ɩ́ ɖéé ńɖó pooni yɛ, bɩ́ nyɛ́; ba bɩ́ɩ́ ɖéé tɩ́satɩ́nɩ, bɩ́ɩ́ ńta tɩ kɔ́ɔ́nɩ́ ńɖóní. 22 Ɖoómi ɖa bɩ́ɩ́ sáá ɖɩ́cúgúrí wáá ɩ́wɩɩ ŋaa pooni yaa Ɩ́waa káa wɛ́ɛ́ kɔ́kɔ́ káa bɩ́ɩ́ lá fʊ́ yá. 23 Mbusú ʊ́lá nɩ́ ɖa bɩ́ɩ́ sáá, ɖa wáá ɩ́wɩɩ má kɩ teé bɩ́pɩ́ɩ́ apooraamɩ nɩ́ ba pe bíyáá ńbɩ́ɩ́ yɛ! Ɖoómi ńɖó má pooni wáá binyii bɩ́ɩ́ yɛ́lɛm ɖa wóm, nɩ́ Mwáátáá ka bɩ́ɩ́ ɖɛ zamáa má jɩfɛm. 24 Bɩ bɩ́ɩ́ kpɔ bɩbá nɩ tókobímɩ, kɩ́ mɔ bɩbá kɩ co nɩ bɩ íɖówámɩ ɖabamɩ-ɖabamɩ pooni, nɩ́ ba ná sá yahúúɖumɩ yɛ bɩ́ɩ́ tá Yerúsalɛ́ɛmɩ bó kɩ́ tɩ́ sá nɩ tám waa báa pé bɩ yɛ ńtó.

Unyiijapwa wáá ɖɩ́gɔ́rɛ́nɖɩ́

25 Ɖa bɩ́ɩ́ ɖáá kpɛrɛ́ tɩ́ta ńwɩɩ pooni, ʊ́ɖámɩ́ nɩ aŋmɛlɛsɛ́ɛ́ pooni. Kɩ́tɩ́ɩ́ bó wáá zamáa bɩ́ɩ́ ɖéé ńnyiímɔmnɩ ɖoómi baá bɩ́ɩ́ bɛ́ɛ́ kaa báa bɩ́ɩ́ yá teŋkú wáá ɖícígírí nɩ ḿpwá nɩ ɖa wáá kúgboŋgbo yɛ. 26 Nɩ́ tɩ́náŋgá bɩ́ɩ́ kɔ́ binyii bɩ ɖé náá kɩ maatɩɩ́ náá ya bɩ́ɩ́ ɖá fóóní kɩ́tɩ́ɩ́ kɔ́kɔ́ bó yɛ. Ɖoómi kʊ́tápáá wáá ḿpwáá wám bɩ́ɩ́ ɖáá cigí. 27 Ɖá sáatɩwʊ nɩ́ ba bɩ́ɩ́ ká Unyiijapwa káa siniíní ɖítígbe ɖɩbá páá, ɖa nɩ ḿpwáá tuutúúma nɩ ɩ́kpɩ́lɩ́ɩ́ 28 Sáa waa ílemí nɛɛ́yɩ ɖáa búri náá kɩ́ yáá, kóré maá nɩ́bá kɩ́ ɖáátɩ anyímí, ɖoómi nɩ́wáá ɖiwonɖi kɩ́ɩ cu.

Yaa bʊ́káŋká káa míí yɛ

29 Nɩ́ Yeésu ŋ́ka kɛɛsɛɛ bɩ naa: "kpaá maá bʊ́káŋká nɩ ícíí kɔ́kɔ́ ŋa ké yɛ. 30 Nɩ ɖaa ká náá bʊ́wáá apopo ɖaa búrí náá ɖɩ́mɛnɖɩ́ nɩ nyí náá kʊ́sɛ́ɛ́ kʊ́pwan-pwaŋkʊ kɩ́ɩ cu. 31 Ɖée má mɛ́tɛ́, nɩ ɖaa ká náá ɖáwáá ílemí má ɖaa náá, nɩ bɛ́ɛ́ náá Mwáátáá Bwɛ́ɛ́jéri kɩ́ɩ cu. 32 Ń soo nɩ́ ɩ́já náá: ɖílemi wáá binyii kɔ́kɔ́ káá kpó ɖáánɩ́ yɩ́ɩ́ nɛɛ́yɩ kɔ́kɔ́ ńfóóní. 33 Kɩ́tɩ́ɩ́ nɩ kʊ́tápáá bɩ́ɩ́ wɛ́tɛ́ amá ńwáá ɩ́wɛ́ɛ́ káá wɛ́tɛ́ ɖaarɩ́bá-ɖaarɩ́bá.

Yaa bo ɖáa tɩ́nɩɩ bɛ́nɩ náá unyii ńɖéé péré yɛ.

34 Bá maá nɩ́bá! Ta canɩ́ maá nɩ́wáá laákarɩ ńwómɩ jígáárɩ́mɩ pooni nɩ tɩ́ɖannyɔtɩ pooni, nɩ mɩfɛɛ nɩ wáá báanɩ batɩɩ wáá ɖɩmaatɩɩrɩ, ńsá náá ɖée ɖícúgúrí wɩɩŋʊ bɩ́ɩ́ lití nɩ́, 35 Ɖoómi ŋʊ bɩ́ɩ́ ɖáá ɖá ɖéé kʊ́calaa binyii bá kɔ́kɔ́ ɖé kɩ́tɩ́ɩ́ kɔ́kɔ́ bó. 36 Ta gɛɛnɩɩ́ maá mɛɛnɩɩ maá báanɩ sáa ʊ́lá, ɖée yárɩ́ pooni nɩ́ na bɩ́ɩ́ kpɛrɛ́ ḿpwáá kɩ poó kaa kɔ́kɔ́ bɩ́ɩ́ fóóní, nɩ́, nɩ́ bɩ́ɩ́ fété kɩ́ kpɛrɛ́ ḿpwáá kɩ́ yóré Unyiijapwa nyimíŋ.

37 Ńwɩɩ nɩ Yeésu mii Mwáátáácenɖenɩ nɩ kújóóbó ʊ nyɛ kɩ tɩ ɖɔɔ olifiyéémɩ wáá kígólíí páa. 38 Kʊ́cáŋkpɩ́ɩ́nɩ́ zamáa pɛgɛnɩ́ kɩ ɖaa Mwáátáácénɖenɩ Yeésu gbéni kɩ gbii ńwáá ńwɛ́ɛ́.