Lúkɩ 18

Úcúgúlí nɩ úpíípó wáá ílemí ɖɩkɛɛsɛɛrɩ

Yíí bɔ́ɔ́nɩ́ Yeésu ŋ́ka taŋ ʊ́wáá bipinlii ílemí nɛńyɩ ka kɩ míní bɩ naa bɩ barɩ́ mɛɛnɩɩ́ báanɩ sáa ʊlá; kɩ ta barɩ́ gɩɩ. 2 Nɩ́ wa soó bɩ naa: «Ɖa la kpɛ ńɖó mbá pooni úcúgúlí ʊbá wa ná síŋíí Mwáátáá yɛ, nɩ́ ka pe binyii gírímá. 3 Nɩ́ ɖa la kpɛ ńɖó má mɛ́tɛ́ pooni úpíípó wa ɖaa kɩ soo wʊ naa: "Lɛɛ ńwáá ɩ́já kɩ míní waa mɩnɩ wʊ ɖɛbɛ́ tá yɛ nyimíní". 4 Ɖa tɩ́nɩɩ kɛ́ɛ́lɛɛ, úcúgúlí káa yɩ́ɩ́tɩ́ɩ́ yɛ, amá ɖɩbá, nɩ́ wa wɛ́ɛ́ ʊ́bá náá: "Ma síŋíí Mwáátáá nɩ́ má gba unyii kɩ yíí yambá; 5 Amá ɖéé úpíípó nɛɛ́wʊ káa lo mɩ yɛ ń bɩ́ɩ́ canɩ́ bɩ́ bɛ́ɛ́ ʊ́wáá ɩ́já, ka ʊ́ ta barɩ́ ye nɩ kɩ ɖaa kɩ cɛɛ nÿiiɖi wáátɩ́ɩ́".» 6 Nɩ́ Tɩ́ɖáá ka kóte naa: ŋmɔ́ maá kʊ́lááŋmɛ́ yaa úcúgúlí ʊ́kpɩ́ŋkpɩ́ɩ́ nɛɛ́wʊ káa wɛ́ɛ́ yɛ. 7 Nɩ́ Mwáátáá káá lɛɛ ʊ́wátɩ́ɩ́ ba wíí nɩ wʊ kʊ́nyɛ́ɛ́ nɩ ńwɩɩ yɛ wáá ɩ́já kɩ́ míní? Ʊ bɩ́ɩ́ kɛ́ɛ́lɛɛ ɖáánɩ́ kɩ́ girí nɩ bɩ? 8 N soo nɩ naa ʊ bɩ́ɩ́ lɛɛ bɩ́wáá ɩ́já kɩ́ míní wéré. Amá sáa waa Unyiijapwa káa bɩ́ɩ́ gɔ́rɛ́nɩ́ yɛ ʊ bɩ́ɩ́ ká ɩ́jápárɩ́ kɩ́tɩ́ɩ́ páá? 9 Yeésu kpé kɛɛsɛɛ ɖɩkɛɛsɛɛrɩ nɛńɖɛ kɩ tee ba bɩ mii náá bɩ tógó Mwáátáá nyimíni nɩ ká kɩ yɛɛ́nɩ ba ké yɛ: 10 Binyii bilé co Mwáátáácénɖeni naa bɩ tɩ mɛɛ; ʊbá sa farizíiraa, wa ké yɛ wɩ́ɩ́ sá lambúufɔ́ɔ́lɩ. 11 Farizíiraa, yó kɩ mɛɛ́ upooni kɩ gi naa: «Óo Mwáátáá, ńnyɔ́m sɩ ɖéé maná sá ɖéé binyii ba ké yɛ, ba sá binyii, bɩ́kpɩ́ŋkpɩ́ɩ́bɩ́ nɩ zináráámɩ; ńnyɔ́n sɩ ɖéé má ná sá ɖéé ʊlambúufɔɔlɩ nɔɔ́wʊ. 12 Ń bóóníí ɩ́wɩɩ ɩlé bɔ́kɔyɩ pooni, ńtee sɩ ńwáá ríba wáá úpwíírí^a» 13 Ɖa ké ʊlambúufɔɔlɩ wɩ́ɩ́ tɩ yóre ńɖánɖabó nɩ́ ká barɩ́ laá ʊ́ɖáátɩ anyimí kɩ kpaá kʊ́tápáá, amá ʊ tɛgɛ ʊ́ŋálɩŋ nɩ kɩ wɛ́ɛ́ naa: "Óo Mwáátáá, ŋmɔ́ ńwáá íceceé, ḿmɛ́ wá sá ɩ́kpɩ́ɩ́ráá yɛ". 14 Nɩ́ Yeésu ka kpée wɛ́ɛ́ náá, n soo nɩ, ʊlambúufɔɔlɩ nɛɛ́wʊ ńgɔ́rɛ úcénɖéni nɩ Mwáátáá wáá ɖɩ́cátɩ́rɩ́, amá farizíiraa nɛɛ́wʊ ka ká ɖɩ́cátɩ́rɩ́. Ɖoómi wá jɔ́ɔ́nɩ́ɩ́ ʊ́bá yɛ bɩ bɩ́ɩ́ sínɩ wʊ, amá wá sinií nɩ ʊ́bá yɛ bɩ bɩ́ɩ́ jɔ́ɔ́nɩ́ wʊ.

Yeésu nɩ bíyáá

15 Binyii la ɖáánɩ Yeésu bíyáá bɩpwampwambɩ mɛ́tɛ́ naa ʊ́ páá bɩ ŋ́ŋálɩ́ kɩ jé bɩ́ alɩbárɩ́ka. Bipinlii káa ká ɖé yɛ nɩ ba yɩ́ɩ́ nɩ́ bɩ bíyáá ɖɩ́ɖáánɩɖɩ. 16 Amá Yeésu ŋ́ka pé ńsɛ bɩ ɖáánɩ wʊ bíyáá má nɩ́ kɩ wɛ́ɛ́ naa: Canɩ́ maá bíyáá ńɖa ŋgbeni; ta peré maá bɩ, ɖoómi Mwáátáá Bwɛ́ɛ́tɛ́ŋkɛ ɖé kɩ tee ba ɖé ɖéé bɩ́ɩ́ yɛ. 17 Ɩ́já bó, n soo nɩ, wá ná bɩ́ɩ́ kɩ́ɩ́ kɩ́ fɔɔ Mwáátáá Bwɛ́ɛ́tɛ́ŋkɛ́ ɖéé úbú yɛ káá fété kɔ́ ɖa pooni ɖarɩ́ba-ɖarɩ́ba.

Yeésu nɩ Árízikíráá

18 Yahúúɖúmɩ wáá úkpée ʊbá ŋ́ka barɩɩ Yeésu naa: Úkpée ʊ́jɔ́jɔɔ́, ɩ́lá nɩ ma bɩ́ɩ́ yá ka kɩ kpɛrɛ́ mɩfɛɛ ma ná tóó yɛ. 19 Yeésu ŋ́ka kɩ́ɩ́ wʊ naa: Batɩɩ bo nɩ a yi mɩ naa wa ya yɛ? Ʊbá ká ya, ɖaá sá náá Mwáátáá bámbá. 20 Ɩ́ nyí marámɩ nɛḿbɛ: Ta nyɛ́ sípó náá sɩ́cɛ́ bɔ́ɔ́nɩ́; ta kpɔ sɩ́tɔ́wʊ; ta yɔ; ta lɛɛ séríya ʊ́kpɩ́ŋkpɩ́ɩ́ sɩ́tɔ́wʊ́ bo; pá sɩ́ nyí nɩ sɩ́ɩ́náá gírímá. 21 Ʊ́já má ŋ́ka kɩ́ɩ́ wʊ naa: «N ɖe yɩ́ɩ́ nɛɛ́yɩ kɔ́kɔ́ ɖoo ńwáá kʊ́mwajakʊ sáátɩ́wʊ.» 22 Yeésu káa ŋú ʊ́wáá ńwɛ́ɛ́ má yɛ, nɩ wá kɩ́ɩ́ wʊ naa: «Ɖa kpée ké sɩ ɩbá: nyɛbɛ kaa kɔ́kɔ́ áa kpɛ yɛ kɩ bú biceceeli, ka ɩ́ kpɛrɛ́ tííbí Mwáátáá gbeni; ka ɩ́ sɩ́ɩ́ ɖáá ɖe mɩ.» 23 Sáa waa wáa ŋú ɩ́wɛ́ɛ́ má yɛ nɩ́ unyimíŋ ka mɔm, ɖoómi ʊlá tɩ́nɩɩ sá íkoraa. 24 Yeésu káa ká náá unyimíŋ mɔm yɛ, nɩ wá wɛ́ɛ́ náá: «Ɖa bɩ́ɩ́ pwáŋgɩɩ ka árízikíráámɩ́ ŋ́kɔ́ Mwáátáá Bwɛ́ɛ́tɛ́ŋkɛ́nɩ!» 25 Ɖéé ɖáa bɩ́ɩ́ pwáŋgɩɩ naa ɩraakúm ńgbánɩ kɩ́gɛyɩ́ wáá ńfɛnɩ yɛ, ɖéé mɛ́tɛ́ nɩ́ ɖa bɩ́ɩ́ tɩ́nɩ́ɩ́ kpéé pwáŋgɩɩ naa árízíkíráá ŋ́kɔ́ Mwáátáá Bwɛ́ɛ́tɛ́ŋkɛnɩ. 26 Ba gbii Yeésu wáá ńwɛ́ɛ́ yɛ ŋ́ka barɩɩ wʊ naa: «Ɖée ŋmá ń bɩ́ɩ́ ká ɖɩpɛnɖɩ?» 27 Yeésu ŋ́ka kɩ́ɩ́ náá: «Yaa binyii ká ná bɩ́ɩ́ fété kɩ́ yá yɛ Mwáátáá bɩ́ɩ́ fétéé yá». 28 Nɩ́ Péétiro ŋ́ka wɛ́ɛ́ náá: «Kpaá tɩ canɩ́ tɩ́yɛ́tɛ kɩ ɖe sí» 29 Yeésu ŋ́ka kɩ́ɩ́ bɩ naa: Ń soo nɩ ɩ́já: Unyii wa bɩ fii náá Mwáátáá Bwɛ́ɛ́tɛ́ŋkɛ bo, ʊ́cénɖé, úpó, úkpolombi nɩ ʊnaarɩbɩ, unyibíbí, kókoó ʊ́wáá bíyáá, 30 ʊ bɩ́ɩ́ fɔɔ ɖɩfɛrɛɛɖɩ ɖawómɩ ɖúúlínya nɔɔ́wʊ nɩ, nɩ́ kɩ́ kpɛrɛ́ mɩfɛɛ má ná kpɛ ɖɩ́kɔ́ yɛ ɖúlínya wá bɩ́ɩ́ yáá ɖá yɛ pooni.

Yeésu káá ɖɩ́táárɩ́ wáá, ʊ́wáá múkú nɩ ʊ́wáá ɖifeńɖí

31 Yeésu yíí ʊ́wáá bipinlii pwí nɩ bílé nɩ́ wá soó bɩ naa: ŋmɔ́ máá, tɩ pá Yerúsalɛ́ɛmɩ ńnaa yaa kɔ́kɔ́ anɖébimɩ ka waa Unyiijapwa bo ká bɩ́ɩ́ yá yɛ. 32 Ɖoómi bɩ bɩ́ɩ́ tɔ́ wʊ ba ná sá Yahúúɖúmɩ yɛ wáá bíkpélébí ŋáánɩ. Bɩ bɩ́ɩ́ yáá lá wʊ, kɩ yáá cii wʊ, nɩ kɩ yáá tíí nɩ wʊ tɩmɔ́tá. 33 Bɩ yaa fɔ́ náá wʊ agbeŋgbí, bɔ́ɔ́nɩ́, bɩ kpɔ wʊ. Nɩ́ ńwɩɩ ńtáárɩ́ ʊ fení múkúní. 34 Amá bipinlii ká ŋú yɩ́ɩ́ nɛɛ́yɩ pombírí; ílemí nɛɛ́yɩ pombírí lɩ́ɩ́ bárɩ bɩ, nɩ́ baá la nyí yaa Yeésu káa la laá úlóloo yɛ.

Yeésu cɛ́ɛ́tɛ ʊjɔm ʊbá

35 Sáa waa Yeésu káa ɖée cúní nɩ Yerikóo yɛ, ʊjɔm ʊbá la ka ńsɛ nyɛ́ɛ́nɩ́ kɩ́ yáá bára. 36 Waá ŋú binyii káa gɛ́tɛ́ɛ́ yɛ nɩ wa barɩɩ naa: «Bá ńyáá». 37 Nɩ́ bá canɩ ʊ bɛ́ɛ́ náá Yeésu Nazarɛ́ɛtɩ yɔwʊ ńgɛ́tɛ́ɛ́. 38 Nɩ́ wa kpíí náá: "Yeésu, Dáwʊ́ɖa japwa, ŋmɔ́ nceceéŋʊ"! 39 Amá ba lá coo unyimíŋ yɛ ka péréní wʊ nɩ ńnyɛ́ ḿpwá-pwá náá ʊ́ ŋmɛ́rɛ́, amá nɩ́ wá kpée kpíi nɩ ńnyɛ́ɛ́ ḿpwá-pwá: «Ɖáwʊ́ɖa japwa, ŋmɔ́ ńwáá íceceé!» 40 Nɩ́ Yeésu ka yóre nɩ kɩ́ pé mará náá bɩ ɖáánɩ wʊ ugbeni. Sáa waa ba cúni nɩ wʊ yɛ, Yeésu ŋ́ka barɩɩ wʊ naa: 41 «Bá nɩ́ a bɔɔ́ náá ńyá kɩ teé sɩ?» Nɩ ʊjɔm ŋ́ka kɩ́ɩ naa: «Mɩ́ɖáá, yá náá ń kpéé kpaá.» 42 Yeésu ŋ́ka soó wʊ naa: Kpéé kpaá! Sɩ́wáá ɩ́jápárɩ́ pɛ sɩ. 43 Líbó-líbó nɩ́ wá búri ɖɩ́kpaárɩ ɖéé wáá pée lá kpɛɛ́ yɛ. Nɩ wá ɖe Yeésu kɩ nyɔ́ḿ Mwáátáá. Zamáa kɔ́kɔ́ káa ká ya yá yɛ, nɩ́ ba gaa íle kɩ nyɔ́m Mwáátáá.