Lúkɩ 17

Ɖícútírí nɩ́ ɖícatɩrɩ

Yeésu ŋ́ka soó upinliibi naa: «Ka bɩ́ɩ́ kɔ́ nɩ unyii ɖícútírí pooni yɛ káá tó ɖarɩbá-ɖarɩbá. Amá mbusú baa waa gbeni ɖícútiri má bɩ́ɩ́ nyɛ́nɩ yɛ. 2 Ɖa bɩ́ɩ́ yamɩ ńsá náá bɩ gbe náá uciŋ ɖítá ɖɩtakpéréɖí kɩ mɛ́ɛ́ wʊ teŋkúnɩ kɩ́ po naa ʊ́ canɩ́ unyii wa jíní ʊ́bá ńcútí. 3 Gɔrɛ́ maá nɩ laákarɩ! «Sɩ́tɔ́wʊ yá náá ya na ya yɛ: Yíí wʊ kɩ soó wʊ; ʊ kɩ́ɩ́ náá náá u cúti, ɩ́ catɩ́ wʊ. 4 Nɩ́ mɩnyɔnlolé nɩ́ wá cúti náá nɩ sɩ ńwɩɩ nɩ, nɩ́ mɩnyɔn lolé nɩ́ wá gɔ́rɛ́nɩ́ náá sigbeni kɩ barɩɩ́ ɖɩ́cátɩ́rɩ́, ɩ́sɛ́ cátɩ́ wʊ.»

Ɩ́jápárɩ́

5 Nɩ́ bipinlii ka ɖáa soó Tɩ́ɖáá náá: «Púú tɩ ɩ́jápárɩ́.» 6 Nɩ́ Tɩ́ɖáá ka kɩ́ɩ́ bɩ naa: Nɩ́wáá ɩ́jáɖɩ́párɩ́ fóó náá ɖíbírí ɖɩ́wááɖɩ́^a, nɩ bɩ́ɩ́ fété kɩ soó búcí nɛḿbʊ naa: ŋa sɩ́wáá agbe ɩ́lɛ kɩ́ tɩ́ fúú sɩ́bá teŋkúni, nɩ́ bʊ́ yá yaa náa barɩɩ bʊ yɛ.

Útóóyálɩ́ tóóre

7 Tɩ gbá náá: Nɩ́ cíígá ʊbá kpɛ útóóyálɩ́ wá ko ʊ́wáá tɩ́satɩ kókoó ʊ kpaḿ ʊ́wáá ɖaábamɩ yɛ, ʊ ɖaa ká náá wʊ wáa gɔ́rɛ́nɩ́ nɩ tɩ́satɩ́nɩ yɛ, ʊ́ peé soó wʊ naa: "Kpɛkpɛɛnɩ́ kɩ́ ɖáá jé tígégáá"? 8 Aayí ʊ bɩ́ɩ́ soó wʊ naa: coo tɩ yá mɩ́ tíjégáá, ɖa bé náá ɩ́ tɩ́ kpɛ́nɩ́ sɩ́wɛ́ntɛ́ kɩ ɖáá tɔ́ mɩ ńjé kɩ nyɔ, yɩ́ɩ́ bɔ́ɔ́nɩ́ ɩ́ tɩ́ jé kɩ nyɔ, ɩ́sɛ́ mɛ́tɛ́. 9 Waá kpɛ ʊ bɩ́ɩ́ ɖɔ́ɔ́ ʊ́wáá útóóyálɩ́ naa wáa yá yaa wáa jé wʊ yɛ, náá lɛɛ? 10 Ɖée nɩ́ nɩmɩ mɛ́tɛ́, sáa waa nɩ́ ɖaa yá náá yaa ba jé nɩ yɛ, wɛɛ maá náá: "Tɩ́ barɩ́ sá bítóóyálɩ́ nɩ́; tɩ́ yáá tɩ́tóóre nɩ́."

Yeésu cɛ́ɛ́tɛ tɩ́jɛ́ɛ́ráámɩ́ pwí

11 Yeésu káá la pá Yerúsalɛ́ɛmɩ yɛ, ʊlá gbanɩ Samááríya nɩ Gaalilée ciiga. 12 Wáá bɩ́ɩ́ bɩ́ɩ kɔ́ kíɖobííyáa kɩbá pooni nɩ tɩ́jɛ́ɛ́ráámɩ́ pwí bɩbá ŋ́ka ɖáa tó wʊ ńsɛ́. Nɩ́ bɩ yó kɩ ɖátɩ nɩ wʊ kɩ kpíí kɩ wɛ́ɛ́ náá: 13 Úmínlí Yeésu ŋmɔ́ tɩ wáá íceceé 14 Nɩ́ sáa waa wáa ká bɩ yɛ, nɩ wa soó bɩ naa: Coó míní maá nɩ́bá saráaraamɩ. Nɩ sáa waa baá bɩ pá yɛ, nɩ́ ba cɛ́ɛ́tɛ 15 Bícíígá ʊbá káa ká náá ʊ cɛ́ɛ́tɛ yɛ, nɩ́ wa gɔ́rɛnɩ́ ʊ́bɔ́ɔ́nɩ́, kɩ́ nyɔ́m Mwáátáá nɩ ńnyɛ́ɛ́ ḿpwá-pwá. 16 Nɩ kɩ́ ɖáa lú Yeésu natáŋ pɔɔ́ kɩ jɛɛ ɖiyiigbáa nɩ kɩ́tɩ́ɩ́ kɩ́ ɖɔ́ɔ́ wʊ. Ʊ́já má la sá samááriya nyiiwu. 17 Nɩ́ Yeésu ka barɩɩ naa: «Bɩ́ɩ́ ayi pwí má ká cɛ́ɛ́tɛ? Nɩ ayi awɛ ba ké yɛ ɖé lá? 18 Bícíígá ʊbá ka maatɩɩ naa ʊ́gɔ́rɛ́nɩ́ kɩ nyɔ́m Mwáátáá, nɩ́ ɖáá sá náá ʊcaa nɛɛ́wʊ bámbá?» 19 Nɩ́ Yeésu ŋ́ka soó wʊ naa: «Fii kɩ póóté, sɩ́wáá ɩ́jápárɩ́ pɛ sɩ́.»

Mwáátáá Bwɛ́ɛ́jérí wáá ɖífóórí

20 Farizíitɩɩbɩ ŋ́ka barɩɩ Yeésu naa: sáá ʊ́lá nɩ́ Mwáátáá Bwɛ́ɛ́jérí ka bɩ́ɩ́ fóóní, nɩ wa kɩ́ɩ́ bɩ naa: «Mwáátáá Bwɛ́ɛ́jérí káa bɩ́ɩ́ fóóní yɛ, baá bɩ́ɩ́ fété ká wʊ nɩ anyimí. 21 Nɩ́ baá bɩ́ɩ́ wɛ́ɛ́ ɖarɩbá náá: ʊ ɖé ɩ́lɛ kókoó ʊ ɖé ńnɛ́ ɖoómi Mwáátáá Bwɛ́ɛ́jérí ɖé nícíígá.»

22 Nɩ́ wa soó bipinlii naa: Ɖa bɩ́ɩ́ fóó sáa ʊbá ɖa bɩ́ɩ́ ɖéé nɩ ńnyɛ́ɛ́ náá nɩ ká Unyiijapwa wáá ɩ́wɩɩ ŋaa wáa karɩ nɩ nɩ yɛ ŋ́kolóó, amá náá tɩ ká ŋʊ. 23 Bɩ bɩ́ɩ́ ɖaa soó nɩ naa: «Ʊ ɖé ɩ́lɛ kókoó ʊ ɖé ńnɛ ; Ta co maá, nɩ́ ta kpɛkpɛɛ maá 24 Ɖoómi ńwɩɩ ŋwaa Unyiijapwa káa bɩ́ɩ́ ɖá yɛ, ɖa bɩ́ɩ́ ɖéé ɖéé ɖɩmɛlɛɛ-mɛ́lɛɛ́ káa pee fibí kʊ́tápáá ɖɩtɛntɛɛrɩ ɖɩbá hálɩ ɖɩtɛntɛɛrɩ ɖa ké yɛ nɩ. 25 Amá ɖa barɩɩ́ náá ʊ́ tɩ́nɩ́ɩ́ yá wahála, nɩ́ wáánɩmɩ wáá binyii ńyɩ́ɩ́ wʊ. 26 Nɩ́ ya la yá Núhum sáátɩ́wʊ ńyá ńwɩɩ ŋwaa Unyiijapwa káa bɩ́ɩ́ ɖá yɛ nɔ́ɔ́. 27 Binyii la jo kɩ nyuu, bɩ́já nɩ bɩ́pɩ́ɩ́ la gbaatɩɩ́ tá, hálɩ ńwɩɩ ŋwaa Núhum káa kɔ́ kʊ́lʊ́ŋkpáákʊ pooni nɩ múnyúu mɩtakpɩ́ɩ́mɩ́ ka ɖáa jí kɩ́tɩ́ɩ́ kɔ́kɔ́ kɩ ku binyii kɔ́kɔ́. 28 Náá ya la yá Lɔɔ́tɩ wáá sáatɩ ńyá ɖoómí binyii la jo kɩ nyuu, kɩ ɖa nɩ kɩ nyɛ́bɛ́, kɩ fúúníí ícíí nɩ kɩ ma; 29 amá ńwɩɩ ŋwaa Lɔɔ́tɩ káa fii Soɖɔɔmɩ yɛ, Mwáátáá canɩ ḿmíí nɩ fárángútá nyiníni kʊ́tápáá ɖéé kʊ́táá kɩ ku binyii kɔ́kɔ́. 30 Ɖéé má nɔ́ɔ́ ɖa bɩ́ɩ́ ɖáá yá ɖaarɩ Unyiijapwa káa bɩ́ɩ́ lɛɛ ʊ́bá kɩ́ míní yɛ. 31 Ɖá ɖáárɩ́ɩ́ wá bɩ́ɩ́ ɖée ɖɩfafarɩ pɔɔ́ bísa páá yɛ ńta tɩ siní kɩ tɩ bɔɔ́ ʊ́wɛ́ntɛ́ úcénɖéni; ɖée mɛ́tɛ́ nɩ́ wa bɩ́ɩ́ ɖéé tɩ́satɩnɩ ńta tɩ gɔ́rɛ́ úcénɖéni. 32 Nyúní maá Lɔ́ɔ́tɩ po bo! 33 Wa bɩ́ɩ́ laa naa ʊ pɛ ʊfɛɛmɩ bɩ́ɩ́ fɛ́ mɩ. Amá wa bɩ́ɩ́ fɛ́ ʊfɛɛmɩ bɩ́ɩ́ pɛ mɩ. 34 N soo nɩ, kʊ́nyɛ́ɛ́ má pooni, binyii bilé bɩ́ɩ́ ɖéé gáɖó ukolóó bó, bɩ bɩ́ɩ́ gbá ʊbá kɩ́ canɩ́ ʊ́tɔ́wʊ. 35 Bɩ́pɩ́ɩ́ bilé bɩ́ɩ́ ɖéé ta gbeni kɩ naá ábí: bɩ bɩ́ɩ́ lɛɛ ʊbá kɩ póóté nɩ kɩ canɩ́ wa ké yɛ. 36 Bɩ́já bilé bɩ́ɩ́ ɖée kʊ́saa kʊbá pooni: bɩ bɩ́ɩ́ lɛɛ ʊbá nɩ́ kɩ canɩ́ wa ké yɛ. 37 Nɩ bipinlii ŋ́ka barɩɩ Yeésu naa: «Tɩ́ɖáá lambó nɩ́ yɩ́ɩ́ nɛɛ́yɩ ka bɩ́ɩ́ yá?» Nɩ́ wá kɩ́ɩ́ bɩ naa: «Ńnaa ɖíkpírí ɖé náá líbó nɩ agúlaŋgúmɩ ŋ́ka cigi.»