Lúkɩ 16

Útóóyálɩ́ wa ɖé péré yɛ wáá ílemí ɖɩkɛɛsɛɛrɩ

Yeésu ŋ́ka soó ʊ́wáá bipinlii naa: unyii árízikíráá ʊbá la kpɛ́ útóóyálɩ́ wa kpɛɛ́ ʊ́wáá amáána bo, nɩ ʊbá ŋ́ka ɖaá soó wʊ naa: sɩ́wáá útóóyálɩ́ ɖéé bíí sɩ́wáá amáána. 2 Nɩ ʊ́wáá úkpée ŋ́ka yíí wʊ nɩ́ kɩ soó wʊ naa: Ɩ́lá nɩ́ ma gbii sɩ bó yɛ? Yá mɩ amáána kɔ́kɔ́ wáá akɔ́ntáá, ɖoómi a tɩ bɩ́ɩ́ fété kpaá ńwáá amáána bo. 3 Nɩ́ wa kpɛɛ́ amáána bó ŋ́ka wɛ́ɛ́ ʊ́bá náá: Ńwáá úkpée laá ʊ́ fɔɔ ńtóóre. Lɛɛ-lɛɛ nɩ́ ma bɩ́ɩ́ yá? Ma kpɛ ḿpwáá kɩ́ bɩ́ɩ́ kpa kɩ́tɩ́ɩ́ nɩ́ ɖa bɩ́ɩ́ ɖéé mɩ ɩ́fɛ́ naa ńyá bára. 4 Tɔ́ɔ! Ńnyi yaa máa bɩ́ɩ́ yá yɛ! Nɩ́ ka bɩ ɖaa jɛ́ náá mɩ ńtoorenɩ, binyii ńfɔɔmɩ bɩ́wáá! 5 Nɩ́ wa yíí ba kɔ́kɔ́ jí ɖɩpwa ʊ́wáá úkpé gbeni ukolóo-ukolóo. Nɩ́ wá barɩɩ úbúrígáá náá: Aŋá nɩ ńwáá úkpée ŋ́ka kpɛ nɩ sɩ? 6 Nɩ wɩ́ɩ́ ka kɩ́ɩ́ wʊ naa: ŋkpɔ áŋkʊrámɩ ɩ́kuu ŋmɔ (100). Útóóyálɩ́ ŋ́ka soó wʊ naa: Kpaá sɩ́wáá tákárɩ́ɖá; wéré, karɩ́ kɩ́ waa íkuulé nɩ pwí (50). 7 Nɩ wa barɩɩ ʊbá mɛ́tɛ́: Ɩ́sɛ́ nɩ́, aŋa nɩ wa kpɛ nɩ sɩ? Wɩ́ɩ́ ŋ́ka kɩ́ɩ́ wʊ naa bɩlée fɔɔrɔtɔmɩ íkuu ŋmɔ (100). Útóóyálɩ́ ŋ́ka soó: Kpaá sɩ́wáá tákárɩ́ɖá; waa ɩ́kuunaa (80) 8 Nɩ́ úkpée ŋ́ka nyɔ́m útóóyálɩ́ úcínlí, ɖoómi ʊ́ ɖé péré. Ɩ́já mwá, ɖúlínya nɔɔ́wʊ wáá binyii tɩ́nɩɩ ɖé péré bɩ́tɔ́bɩ nyimíŋ kɩ po ba ɖé Mwáátáá wáá ɖɩ́mátɩ́rɩ́ pooni yɛ.

9 Yeésu ŋ́ka kóte naa: «Nɩ́ ḿmɛ ka soo nɩ: "Yá maá nɩ́bá kʊ́jɔ́tɩ́ɩ́ nɩ ajimí ŋa cíníí yɛ, ka ajimí má ɖaa kpá náá bɩ fɔɔ nɩ áɖíí ŋa ná kpɛ ɖɩ́kɔ́ɔ́ yɛ. 10 Waa bɩ pa náá ɩ́já átóó áwáánɩ, bɩ bɩ́ɩ́ pá wʊ ɩ́já átóó átákpéní mɛ́tɛ́, nɩ́ wa ná tóŋóó náá átóó áwáánɩ́ káá tóŋóó mɛ́tɛ́ átóó atakpéní 11 Yɩ́ɩ́ bó nɩ́, baá bɩ́ɩ́ fété náá kɩ́ pá nɩ́ ɩ́já ɖéé naa nɩ ajimí ŋa cíníí yɛ bo, ŋmá ń bɩ́ɩ́ canɩ́ nɩ árízikí mánja. 12 Nɩ́ baá fété pá náá nɩ ɩ́já ba kée wáá árízikímɩ ba ná sá nɩ yɛ́bɛ bo, ŋmá ńbɩ́ɩ́ teé nɩ́ árízikímɩ ba sá nɩ yɛ́bɛ?

13 Útóóyálɩ́ ʊbá káá fété yá ɖítóó bíkpélébí bilé pɔɔ́. Ɖoómi, ʊ bɩ́ɩ́ laa ʊbá káá laa wá ké yɛ, kókoó ʊ bɩ́ɩ́ náŋáa nɩ ʊbá kɩ́ yɛɛnɩ wa ké yɛ. Náá fété kɩ́ sáá Mwáátáá wáá bítóóyálɩ nɩ kɩ́ peé sáá ajimí wáá bítóóyálɩ́.

Yeésu wáá ɩ́wɛ́ɛ́ ŋɩbá

14 Farizíitɩɩbɩ ba laá ajimí yɛ káá ŋú ɩ́wɛ́ɛ́ nɛɛ́yɩ kɔ́kɔ́ nɩ́ ba ɖé kɩ la Yeésu. 15 Yeésu ŋ́ka soó bɩ naa: Nɩmɩ nɩ́ sá binyii ba yáá ɖéé ba tógó binyii nyimíní, amá Mwáátáá nyí nɩ́bém. Ɖoómi kaa binyii káa kpɛɛ́ náá kɩ́ fɔ́ɔ́sɩ́ɩ́ yɛ sá kaa Mwáátáá ka ná tɩ́nɩɩ laá unyimíŋ.

16 Kɩ́ ɖáá sánɩ Yʊwáanɩ Úlíísiili sáatʊ, ɖa la sá Múúsá nɩ anɖébimɩ wáá mará sáatʊ. Amá kɩ gbá Yʊwáanɩ Úlíísiili, bɩ káánɩ́ɩ́ Mwáátáá bwɛ́ntɛ́ŋkɛ wáá laabáárʊ ɩ́jɔjɔɔ́, nɩ́ unyii báanɩ ʊlá ŋ́ka tɔ́rɛ́ŋɩ́ ʊbá nɩ ʊ́wáá ńpwa ka kɩ́ kɔ́. 17 Amá kɩ́tɩ́ɩ́ nɩ kʊ́tápáá wáá ɖɩ́wɛ́ɛ́tɛ́rɩ́ ká pée wi kɩ fóó mará wáá ɩ́waa kɩ́wáákɩ́ɩ́ ŋ́kolóó.

18 Ʊ́já báanɩ ʊlá jɛ náá úpó nɩ kɩ gba ʊbá ʊ nyɛ́ úpó bɔ́ɔ́nɩ́ nɩ wa gba náá úpé waa ʊ́cɛ́ kaa ji yɛ ʊɖáŋgɩ́ɩ́ yá ziná.

Ajimíráá nɩ Laazáarɩ

19 Ɖa la kpɛrɛ unyii ʊbá ajimíráá, wá la fúbí tɩ́fúgátɩ́ tɩjɔjɔɔtɩ, ta pwa kʊ́ɖáá yɛ. Nɩ́ báanɩ báɖáárɩ́ ʊ yáá jíŋgáárɩmɩ bɩmɔntɩɩ. 20 Unyii uceceeli ʊbá waa baá yi naa Láazaarɩ, wa wénté bó pɔ́ɔ́ íbóó yɛ, la ɖɔ́ ʊ́wáá ḿbɔmbɔ nyɛ́ɛ́nɩ́. 21 Ɖa la tɩ́nɩɩ ɖé wʊ ńnyɛ́ɛ́ naa ú jé tá nyɛnɩ ajimíráá wáá tébéru paa kɩ́ lúríí yɛ. Amá ɩ́bwɛ́ ńgɔrɛ ɖaa laga ʊ́wáá íbóó. 22 Nɩ́ ɖa ɖá náá uceceeli ŋ́ka kpé nɩ́ malááyɩ́kamɩ ŋ́ka co ni wʊ ɖiwonɖi nɩ Ibiraahím gbeni. Ajimíráá mɛ́tɛ́ ŋ́ka kpe, nɩ́ ba sí wʊ. 23 Ajimíráá tɩ ɖé wahálanɩ bíkpíí gbeni; wáa ɖáátɩ anyimí nɩ wá ká Ibiraahím ńɖánɖa bó, ɖa ké Laazáarɩ ɖé ugbeni. 24 Nɩ wá kpíí náá: ""Mɩ́ɩ́náá Ibiraahím, ŋmɔ́ nceceéŋ; tɔ́ Laazáarɩ ʊ́ tɩ sɛ́ ʊ́ŋámbírí mɔɔkɩ múnyúú nɩ́ kɩ ɖáá sɔmɩ ńlóntóbírí, ɖoómi ń tɩ́nɩɩ yáá wahála ḿmíí nɛɛ́yɩ nɩ́. 25 Amá Ibiraahím ŋ́ka kɩ́ɩ́ wʊ naa: ḿbúu, nyuni naa sɩ́wáá mɩfɛɛnɩ ɩ fɔɔ síwáá ɖiwonɖi ɖawómi, ɖaké náá Lazáarɩ wɩ́ɩ́ tɩ́nɩɩ yɛ́lɛm. Amá wáánímɩ ʊ ɖé kʊ́pɔ́lɔ́sɔmɩ pooni ɖa ké ɩ́sɛ yɛ́lɛ́ḿ. 26 Ɖabáŋ nɩ yɩ́ɩ́, ńfɛ ńtakpé ɖé tɩmɩ nɩ nɩmɩ ciiga. Ka ba bɩ́ɩ́ laa bɩ fii ɩ́lɛ kípóóté kɩ co nigbeni bó yɛ ńta fété. Nɩ́ ka bɩ́ ta gɛ́tɛ́nɩ́ nɩ níbóbó kɩ́ ɖá tigbeni bo. 27 Ajimíráá ŋ́ka soó wʊ naa: Ɖée ń tɩ́nɩɩ mɛɛ́ sɩ́ mɩ́ɩ́náá Ibiraahím, tɔ́ Laazáarɩ ʊ́ gɔ́rɛ mɩ́ɩ́náá cénɖe pooni, 28 Ɖoómi minyibíbi bɩŋmɔ ɖé líbó, ʊ tɩ lɛɛ bɩ yɩ́ɩ́ nɛɛ́yɩ wáá seríya, ka bɩ́ɩ́ mɛ́tɛ́ ńta ɖá ɖɩtɛntɛɛrɩ ɖɩ́yɛ́lɛnɖɩ yɛɖɛ nɛńɖɛ pooni. 29 Nɩ Ibiraahím ŋ́ka kɩ́ɩ́ wʊ naa: Sinyibíbi kpɛ́ Múúsá wáá mará nɩ anɖébimɩ ba ké yɛ wáá ɩ́waa, bɩ́ gbirí nɩ yaa bɩ́ɩ́ kaa waa yɛ! 30 Nɩ́ Ajimíráá ka kóte naa: Aayɩ́ Mɩ́ínáá Ibiraahím, baá bɩ́ɩ́ gbirí nɩ bɩ, ɖaá sá náá nɩ ʊbá ńnyɛ́nɩ́ nɩ bíkpíí wáá kɩ tɩ káá kɩ́ soó bɩ baá bɩ́ɩ́ kpɛ́nɩ́ bíɖééri. 31 Nɩ́ Ibiraahím ŋ́ka kɩ́ɩ́ wʊ naa: Baa bɩ́ɩ́ ŋmɔ́ náá nɩ Múúsá nɩ anɖébimɩ ba ké yɛ, baánɩ ʊbá fii múkú pooni baá bɩ́ɩ́ pá wʊ ɩ́já.