Lúkɩ 15

Upii wa fɛ́ nɩ́ bɩ ká wʊ yɛ wáá ɖɩkɛɛsɛɛrɩ

Ba fɔɔ́ lambúu nɩ binyii ba ɖééri ká ya yɛ bɩ́ kɔ́kɔ́ ŋ́ka cúni Yeésu ka kɩ́ gbirí ʊ́wáá ńwɛ́ɛ́. 2 Farizíitɩɩbɩ nɩ bɩmarámínlí wáá bíkpélébi ŋ́ka cɔ́gɔ Yeésu, kɩ gi naa: Ʊ́já nɛɛ́wʊ fɔɔ́ kʊ́lááŋmɛ́ binyii ba ɖééri ká ya yɛ nɩ kɩ jo wʊ nɩ bɩ! 3 Amá Yeésu ŋ́ka kɛɛsɛɛ bɩ ɖɩkɛɛsɛɛrɩ nɛńɖɛ: 4 Nícíígá ʊbá kpɛ náá ípií íkuu ŋmɔ (100) nɩ kɩ cánɩ́ úkólóo fɛ́, wáa bɩ cánɩ́ íkuu naa nɩ pwi nɩ bɩwɛ (99) baké bɩ wáá ɖɩkpánɖɩ fémi kɩ póótí tɩ bɔɔ wa fɛ́ yɛ hálɩ kɩ yáá tɩ́ kánɩ wʊ? 5 Nɩ́ sáa waa ʊká náá wʊ, ʊ páá wʊ úbúpɛ́ɛ́tɩ paa ḿmwáá pooni. 6 Nɩ́ ʊ gɔ́rɛ́ náá ʊ́wáá, ʊ́ yíí ʊ́jɔ́tɔ́lɔ́mɩ nɩ ba cúnɩ wʊ yɛ ka kɩ soó bɩ naa: "tɩ ɖéé maá ḿmwáánɩ ɖoómi ń kánɩ́ ńwáá upii wa bɩ wɛ́tɛ́ yɛ" 7 Ɖée ma mɛ́tɛ́, ń soo nɩ, ḿmwáá bɩ́ɩ́ tɩ́nɩ́ɩ́ ɖéé kʊ́tápáá sáa waa ɩ́kpɩ́ɩ́ráá ukolóo káa bɩ́ɩ́ kpɛ́nɩ ʊ́wáá ɖíɖéérí kɩ poó ayaa ikuu naa nɩ pwí nɩ bɩwɛ (99) baá ɖa na tɩ barɩɩ bɩ́ kpɛ́nɩ́ bíɖéérí yɛ.

Ajímí ɖíkúbírí ɖa fɛ́ ka bɩ ká ɖɩ yɛ

8 Kokoó, úpé ʊlá, ŋ́kpɛ náá ajimí ákúbí pwí nɩ́ kɩ canɩ́ ɖikolóo fɛ́, káa sɛ́ fɩ́tɩ́la, kɩ́ yatɩ́ ɖícé kɩ bɔɔ kʊ́lááŋmɛ́ hálɩ kɩ́ yáá tɩ ká ɖɩ? 9 Nɩ́ sáa waa ʊ ká náá ɖɩ, ʊ́ yíí ʊ́pɔ́tɔ́lɔ́mɩ nɩ bɩ́pɩ́ɩ́ ba cúnɩ wʊ yɛ, kɩ soó náá: "tɩ́ ɖéé maá ḿmwáánɩ́ ɖoómi ń ká ńwáá ajimí ɖíkúbíri ɖaa máa bɩ fɛ́ yɛ! 10 Ɖée mɛ́tɛ́, nɩ́ ma soo nɩ, ḿmwáá ɖé Mwáátáá wáá malááyɩ́kamɩ ciiga sáa waa ɩ́kpɩ́ɩ́ráá ukolóo kpɛ́nɩ́ náá úɖééri.

Ájapwa wa wɛ́tɛ, ka bɩ ká wʊ yɛ

11 Nɩ́ wa kpée wɛ́ɛ́ náá: Ʊ́já ʊbá la kpɛ́ bíyáá bɩ́já bilé. 12 Nɩ́ ʊ́wáá ŋ́ka soó wɩ́ɩ́náá náá: "Mɩ́náá téé mɩ tɩ́wáá tííbí pooni ka sá ńyɛ́kɛ yɛ". Nɩ́ áɖɩ́náá ka bú ʊ́wáá tííbí ʊ́jápɔ́lɔ́mɩ bilé nɛmbɛ ciiga. 13 Nɩ́ ɩ́wɩɩ ɩ́kaŋga bɔ́ɔ́nɩ́, ájapwa ʊ́wáá ŋ́ká nyɛ́bɛ kaa kɔ́kɔ́ wa kpɛ́ yɛ nɩ́ kɩ póótɩ́ nɩ ujimíŋ ńɖó ŋwa ɖátɩ yɛ pooni. Líbó nɩ́ wa karɩ yɛ́rɛ́-yɛ́rɛ́ pooni nɩ kɩ́ jí ujimíŋ kɔ́kɔ́. 14 Sáa waa wá jí ɖá kɔ́kɔ́ yɛ, muko mɩtakpɩ́ɩ́mɩ́ mɩbá ŋ́ka kɔ́ɔ́nɩ́ ńɖó má pooni, nɩ wá búrí ka tɩ ka kaa kɔ́kɔ́ ɖaá barɩɩ́ wʊ yɛ. 15 Nɩ́ wa co naa ʊ tɩ́ yá ɖítóó ʊ́já ʊbá gbéni ńɖó má pooni. Ʊ́já má ŋ́ka tó wʊ ʊ́wáá tɩ́satɩ́nɩ naa ʊ́kpaá afamɩ. 16 Nɩ́ ʊ la laá náá ʊ́ jé afamɩ jégáátɩ́ amá ʊbá ka la pe wʊ. 17 Nɩ́ wa kɔ́ ɖɩmaatɩɩrɩ nɩ yaa pooni wá ɖé ńnɛ́ yɛ, kɩ wɛ́ɛ́ ʊ́bá náá: "Mɩ́ɩ́náá wáá bítóóyálɩ́ kɔ́kɔ́ mɩ́ɩ́náá tɩ́nɩ́ɩ́ kpɛ́ tíjégáá ɖéé ɖaá barɩɩ yɛ, ɖa ké, ḿmɛ́ muko ń bɩ́ɩ́ kpɔ mɩ ɩ́lɛ. 18 Ń bɩ́ɩ́ póóté kɩ co mɩ́ɩ́náá wáá nɩ́ kɩ́ tɩ soó wʊ naa: "Mɩ́ɩ́náá ńcútɩ́ nɩ Mwáátáá nɩ ɩ́sɛ́ mɛ́tɛ́." 19 Má tɩ bɛ́nɩ naa ɩ́ yíí mɩ náá sɩ́búu fɔɔ mɩ ɖéé sɩ́wáá bítóóyálɩ́ pooni ʊbá. 20 Nɩ́ wa póótí kɩ gɔ́rɛ́nɩ́ wɩ́ɩ́náá wáá.

Ɖa ké náá wáa kpée bɩ ɖátɩ nɩ ɖícé yɛ, ʊ́ɖɩ́náá ŋ́ka ká wʊ nɩ́ wá tɩ́nɩɩ yá wʊ íceceé. Nɩ́ wá síŋii tó wʊ ńsɛ, nɩ́ kɩ́ lɛ́ɛ́ wʊ. 21 Ájapwa ŋ́ka soó wʊ naa: "Mɩ́ɩ́náá! ńcútɩ nɩ Mwáátáá nɩ ɩ́sɛ́ mɛ́tɛ́, má tɩ bɛ́nɩ naa bɩ yíí mɩ naa síbúu. 22 Amá áɖɩ́náá ŋ́ka soó ʊ́wáá bítóóyálɩ́ náá: "wéré ɖaamaá nɩ kúfúgáá kʊjɔjɔkʊ kɩ fú wʊ; jé maá wʊ ʊ́ŋámbírí ɖɩnyɔn-nyɔnbírí nɩ kɩ jé wʊ anataa ʊ́natáŋ. 23 Ɖaamáa nɩ kɩnanbíí ka kpɛ́ ŋ́kpɔ́ yɛ, kɩ́ kpɔ́ kɩ tɩ́ yá jíŋgáárɩ́. 24 Ɖoómi ḿbúu waa náa kpɛɛ́ ńnɛ́ yɛ la kpe nɩ́ kɩ́ gɔ́rɛ́nɩ mɩfɛɛnɩ; ʊ la wɛ́tɛ nɩ ma ká wʊ! Nɩ́ ba búrí jíŋgáárɩ́ ɖɩ́yárɩ́.

25 Ɖá sáatɩ, ʊ́já má búu úkpée la ɖé nɩ́ tɩ́satɩnɩ. Ʊ́wáá ɖɩ́gɔ́ɔ́rɛ́ɖɩ́ nɩ, sáa waa wáa cúní ɖícé yɛ, nɩ́ wá ŋú íle nɩ áwɔ́. 26 Nɩ́ wa yíí útóóyálɩ́ ʊbá kɩ barɩɩ wʊ ya yáá yɛ. 27 Útóóyálɩ́ má ŋ́ka kɩ́ɩ́ wʊ naa: "sínarɩ́ ńgɔ́rɛnɩ́, nɩ́ sɩ́ɩ́náá ŋ́ka cánɩ́ bɩ ku kɩnanbíí ka kpɛ́ ŋ́kpɔ yɛ, ɖoómi ʊ ká úbúu nɩ alaafíya. 28 Nɩ́ wɩ́ɩ́ ŋ́ka kɛ́tɛ ɖíŋúu nɩ́ kɩ́ yɩ́ɩ́ ɖɩ́céní ɖɩ́kɔ́rɩ́. Wɩ́ɩ́náá ŋ́ka nyɛ́ kɩ ɖɔɔlɩɩ wʊ. 29 Amá ábú ŋ́ka kɩ́ɩ́ wɩ́ɩ́náá náá: "Gbirí, ábé ɖabata sɔ maá yáá sɩ́ ɖítóó ka yɩ́ɩ́ ɖarɩbá-ɖarɩbá náá maá ɖe síwáá mará báanɩ ukolóo, nɩ ɖarɩbá-ɖarɩbá á tee mɩ kɩŋɔɔbɩ́ɩ́ naa ńyá jíŋgáárɩ́ mɩ nɩ ńjɔ́tɔ́lɔ́mɩ. 30 Amá kpaá náá sɩjapwa nɛɛ́wʊ káa gɔ́rɛnɩ́ yɛ, wɩ́ɩ́ wa jí sɩ́wáá tííbí ʊ nɩ bɩ́pɩ́ɩ́ bíjíńlí yɛ, wɩ́ɩ́ bó ɩ canɩ bɩ ku kɩnambɩ́ɩ́ ka kpɛ́ ŋkpɔ yɛ? 31 Nɩ́ áɖɩ́náá ŋ́ka kɩ́ɩ wʊ naa: ḿbúu, mɩnɩ sɩ ńɖéé bámbaɖáárɩ, nɩ́ káa kɔ́kɔ́ máa kpɛ́ yɛ sá sɩ́yɛ́kɛ́ mɛ́tɛ́. 32 Amá ɖa tɩ́nɩɩ barɩɩ́ tɩ́ yá jíŋgáárɩ́, kɩ ɖéé ḿmwáánɩ́, ɖoómi sɩnaarɩ waa áa kpɛɛ́ ńnɛ yɛ, la kpe nɩ́ kɩ́ gɔ́rɛnɩ́ mɩ́fɛɛnɩ, ʊ la wɛ́tɛ nɩ́ má ká wʊ.