Yeésu tó bipinlii íkuuta nɩ pwí nɩ bilé (72) naa bɩ coo tɩ káá Mwáátáá wáá ńwɛ́ɛ́
10
Yɩ́ɩ́ bɔ́ɔ́nɩ Yeésu ŋ́ka lɛɛ bipinlii íkuuta nɩ pwí nɩ bilé (72) bɩbá kɩ́ tó bɩ bilé-bilé íɖó nɩ atɛntɛ ŋwa pooni wáá bɩ́ɩ́ co ʊ́mánja yɛ. 2 Yeésu ŋ́ka wɛ́ɛ́ bɩ náá: «Tíjégáá ɖɩ́gbárɩ́ wéété, amá bítóóyálɩ́ ká wéété. Ɖée bo mɛɛ maá náá waa jégáátɩ báa bɩ́ɩ́ gbá yɛ ńtɔ́nɩ́ bítóóyálɩ́ ka bɩ́ gbá tɩ. 3 Póótí maá n tó nɩ́ ɖéé séé ípiíbúúmú kúponi wáá ɩ́bwɛ́ cíígá. 4 Ta Bá maá ajimí, náá ɖíléfú, náá anataa. Ta bíí maá tám ɩ́ɖɔ́ɔ́ pooni nɩ́ pá náá ńsɛmpaa. 5 Nɩ́ yaa tɩ kɔ́ náá ɖícé ɖɩbá pooni, lɩɩ́ wɛ́ɛ́ maá náá: ɖiwonɖi ńɖéé ɖícé nɛńɖɛ bo. 6 Ńsá náá unyii wa laa ɖiwonɖi ɖé náá líbó nɩ́wáá ɖiwonɖi waa ɖɩmɛɛrɩ bɩ́ɩ́ siní úbó; ká sá náá ɖéé nɩ́wáá ɖɩmɛɛrɩ bɩ́ɩ́ gɔ́rɛ́nɩ́ níbó. 7 Karɩ́ maá ɖícé ma pooni, jé maá kɩ́ nyɔ maá kaa bɩ pa náá nɩ́, ɖoómi ɖa barɩɩ́ bɩ fɛrɛɛ útóóyálɩ́. Ta nyɛ́ maá ɖícé má nɩ́ kɩ́ co nɛɛ́ɖɛ pooni. 8 Nɩ́ kɔ́ náá ńɖó ŋʊbá pooni nɩ́ binyii ka fɔɔ nɩ, jé maá kaa bɩ pa náá nɩ́; 9 Cɛ́ɛ́tɛ maá bíbóólíí ba ɖé líbó yɛ kɩ́ soó bɩ naa: "Mwáátáá Bwɛ́ɛ́jérí kɩ́ɩ cuni nɩ. 10 Amá nɩ co náá ńɖó ŋʊbánɩ́ nɩ́ baá fɔɔ náá nɩ, co maá abembe paa kɩ́ soó maá bɩ naa: 11 "Nɩ́ wáá ńɖó wáá ɖígúgúrí ɖa náŋaa nɩ tɩ natám mánja yɛ tɩ́ pítíí ɖi kɩ tee nɩ, amá bɛ́ɛ́ maá náá Mwáátáá Bwɛ́ɛ́jérí cuni nɩ." 12 N soo nɩ, ɖícúgúrí wɩɩŋʊ, Sóɖɔ́ɔmɩ wáá binyii bɩ́ɩ́ ká sooci ɖá póo ńɖó má wáá binyii.»íɖó ŋa ná laá bɩ́ pá ɩ́já yɛ
13 Mbusú baa sɩ Koraasɛ́ɛnɩ wáá ńɖó, ɩ́sɛ́ mɛ́tɛ́ sá mbusú baa sɩ Bɛtɩsáyɩ́ɖa wáá ńɖó ɖoómi maamáácimɩ ba yá nɩ́wáá yɛ ńsá maá náá Tíiri nɩ Siɖɔɔ́nɩ nɩ́ ɖa yá maá, ɖa peé kɛ́ɛ́lɛɛ maá báa bɩɩ́ kpɛ́nɩ́ bíɖérí yɛ, bɩ bɩɩ́ yɛ́ fɔrɔtɔmɩ kí fú bɩ karɩ́ maá mɩfanáa pooni kɩ míní bɩ́wáá ɖɩ́kpɛ́nɖɩ́. 14 Yɩ́ɩ́ bó nɩ́ ɖícúgúrí ɖáárɩ́ Siɖɔ́ɔnɩ nɩ Tíiri bɩ́ɩ́ ká sóócí nɩ nɩmɩ. 15 Nɩ́ ɩ́sɛ́ kafɛrɩnawʊ́m wáá ńɖó ɩ maatɩɩ́ náá Mwáátáá bɩ́ɩ́ jɔ́ɔ́nɩ́ sɩ kʊ́tápáá? Tɔ́ɔ, ʊ bɩ́ɩ́ sini nɩ́ sɩ́ bíkpíí cíígá. 16 Yeésu ŋ́ka kpée soó ʊ́wáá bipinlii naa: «Unyii gbírí náá nɩ nɩmɩ ḿmɛ́ nɩ́ wa gbírí nɩ, wa yɩ́ɩ́ náá nɩ́, ḿmɛ́ nɩ́ wa yɩ́ɩ́, nɩ́ wa yɩ́ɩ́ náá mɩ́ yɩ́ɩ́ wa tó mɩ yɛ.»
Bipinlii íkuuta nɩ pwí nɩ bilé wáá ɖɩ́gɔ́rɛ́nɖɩ́
17 Yɩ́ɩ́ bɔ́ɔ́nɩ́ bipinlii íkuuta nɩ pwí nɩ bilé (72) má ká gɔ́rɛnɩ́ kɩ́ tɩ́nɩɩ ɖé ḿmwáá pooni kɩ́ gí náá: "Tɩ́ɖáá, ɩ́nɛ́ɛ́mʊ́ mʊ́kpɩ́ŋkpɩ́ɩ́mʊ́ mánja yáá yaa táa barɩɩ́ bɩ naa bɩ yá yɛ, tí yíí náá síyííɖi. 18 Yeésu ŋ́ka wɛ́ɛ́ náá: «N bɩ kpɛɛ́ kʊ́tápáá siitáánɩ káa nyɛ́nɩ nɩ kɩ lú ɖéé ɖɩmɛlɛmɛ́lɛɛ́ yɛ. 19 Gbirí maá, ń pé nɩ́ ḿpwáá náá nɩ coo íkoo nɩ ɩ́nyɔ́ɔ́ páá nɩ kɩ po kʊ́bááráá wáá ḿpwáá kɔ́kɔ́ bó, nɩ́ Yambá káá fété yá nɩ ɩ́kpɩ́ɩ́. 20 Amá nɩ bɩ́ɩ́ ɖéé náá ḿmwáá pooni ta ɖéé maá ḿmwáá pooni naa ɩ́nɛ́ɛ́mʊ́ mʊ́kpɩ́ŋkpɩ́ɩ́mʊ́ yáá yaa naa barɩɩ́ bɩ yɛ amá ɖéé maá ḿmwáá pooni ɖoómi Mwáátáá waa níyííŋ ugbeni kʊ́tápáá.»
Yeésu ɖé ḿmwáá pooni
21 Tám má pooni Kɩ́nɛ́ɛ́ Ɖacɩrɩ-cɩrɩ yɛkɛ canɩ ɖa mwáŋgɩɩ Yeésu páán nɩ́ wa wɛ́ɛ́ náá: "Mɩ́ɩ́náá, Tɩ́ɖáá kʊ́tápáá nɩ kɩ́tɩ́ɩ́ ráá, ńnyɔ́m sɩ́ áa míní bíyáá yaa áa bárɩ ńcɩ́ɩ́ráámɩ́ nɩ bɩ́bɛ́ɛ́lɩ́ yɛ. Ɛɛ́n, Mɩ́ɩ́náá, ɖée nɩ́ a tɩ́nɩɩ bɩ laá naa ɖa ɖéé.
22 «Mɩ́ɩ́náá tee mɩ báanɩ batɩɩ. Ʊbá ká nyí náá ŋmá ńsá Ájapwa ɖáá sá náá Áɖɩ́náá, nɩ́ ʊbá ká nyí Áɖɩ́náá ká sá náá Ájapwa, nɩ baa Ájapwa káa laá bɩ́ bɛ́ɛ́ wʊ́ yɛ.» 23 Nɩ́ Yeésu ka kɛɛ́tɛ ʊbá kɩ soó ʊ́wáá bipinlii bámbá náá: «Nɩ́ ɖé ḿmwáá pooni náa ká kaa náa ɖée ka yɛ. 24 Ɖoómi n soo nɩ: anɖébimɩ nɩ bɩ́bwɛ́ɛ́bɩ ɖabata laá náá bɩ́ ká kaa náa ka ńnɛ yɛ amá baá ká yɩ, bɩ bɩ laá bɩ gbirí yaa naa gbirí nnɛ yɛ amá baá gbiri!» 25 Ʊmarámínlí ŋ́ka fii kɩ soó Yeésu ka ʊ́ gbá wʊ kʊ́tápáá: «Úkpée lɛɛ-lɛɛ nɩ́ ma bɩ́ɩ́ yá kɩ́ ká Mwáátáá gbeni mɩfɛɛ ma ná tóó yɛ?» 26 Yeésu ŋ́ka kɩ́ɩ́ wʊ naa: «Ɩ́lá nɩ́ ba waa mará pooni? lɛɛ-lɛɛ nɩ́ a ŋú ɩ́waa má pooni?" 27 Nɩ ʊmarámínlí má ka kɩ́ɩ́ wʊ naa: «Ɖa barɩɩ́ ɩ laa Tɩ́ɖáá sɩ́wáá Mwáátáá nɩ sɩkpɛŋgɛlɛ́ɛ́ɖɩ kɔ́kɔ́, nɩ sɩ́nɛ́ŋkɛ́ kɔ́kɔ́, sɩ́pwáŋ kɔ́kɔ́, nɩ sɩ́wáá ɖɩ́bɛ́ɛ́rɩ́ kɔ́kɔ́. Nɩ ɖa barɩɩ́ ɩ laa sɩ́tɔ́wʊ ɖée sɩ́ mánjá.» 28 Yeésu ŋ́ka soó wʊ naa: ɩ kpɛ ɩ́já. Yá yɩ ka kɩ́ ká mɩfɛɛ. 29 Amá ʊmarámínlí bɩ laá úmíní náá ʊ kpɛ ɩ́já. Nɩ́ wa barɩɩ Yeésu naa: «Ŋmá ńsá ńtɔ́wʊ?» 30 Yeésu ŋ́ka kɩ́ɩ́ wʊ naa: "Unyii ʊbá la gba ńsɛ Yerúsalɛ́ɛmɩ kɩ pá Yerikóo nɩ wa tɩ nyɛ́ mɩtakpɩ́ɩ́ráámɩ bɩbá bo bɩ́ɩ́ ŋ́ka fɔɔ kaa kɔ́kɔ́ wáa ba yɛ, kɩ bwaa wʊ hálɩ ʊ cúni múkú nɩ́ ba pooti kɩ canɩ wʊ. 31 Nɩ ɖá yá náá saráaraa ʊbá ɖée gbaatɩɩ́ nɩ ńsɛ má. Wáa ká unyii má yɛ, wa gbanɩ ńsɛ wáá ɖɩ́wárɩ́ ɖaké yɛ kɩ sɔ́ŋɔɔ. 32 Lefíiraa ʊbá mɛ́tɛ́ ŋ́ka fóóní ɖɩtɛntɛɛrɩ má, nɩ́ wa ká unyii má, nɩ wa gbanɩ ńsɛ wáá ɖɩ́wárɩ́ kɩ́ sɔ́ŋɔɔ. 33 Amá Samarɩ́yaraa ʊbá bɩ pá ńsɛ kɩ gbanɩ líbó bó, wáa fóó unyii má gbeni yɛ, ka kɩ́ ká wʊ yɛ, ɖa tɩ́nɩɩ yá wʊ íceceé. 34 Nɩ́ wa cúni wʊ, kɩ tɔ́ ŋkpɔ nɩ mɩɖaaa ʊ́wáá íbóóní ka ɖa kpó nɩ wa gbe wʊ ɖícóókpéré. Kɩ gba wʊ kɩ páá ʊ́wáá aŋɔɔ́ páá kɩ coni wʊ bɩcambɩ cénɖeni, nɩ́ kɩ kpaá wʊ. 35 Ɖáwáá kʊpɩɩtɩ́nɩ́ samarɩ́yaraa ŋ́ka lɛɛ ajimí, ákúbí alé kɩ tee ɖícé má ráá nɩ́ kɩ soó wʊ naa: "Kpaá unyii má, ajimí má ká fóó náá sɩ́ ń bɩ́ɩ́ ɖáá fɛrɛɛ sɩ kaa aa púú ka kɩ kpaá nɩ wʊ yɛ ńgɔ́rɛ́nɩ́ náá.
36 Nɩ́ Yeésu ka barɩɩ naa: "sɩkpaárɩ́ pooni binyii bɩta má pooni ŋmá ń yá unyii wa baa bwaa ńnɛ yɛ ɖéé séé ʊ́tɔ́wʊ yɛ. 37 Ʊmarámínlí ka kɩ́ɩ́ wʊ naa: «Wa ŋú ʊ́wáá íceceé yɛ.» Nɩ Yeésu ka wɛ́ɛ́ wʊ naa: «Coni kɩ́ yá ɖéé mɛ́tɛ́.»
Máarɩtɩ nɩ Márɩ́yám fɔɔ Yeésu
38 Yeésu nɩ ʊ́wáá bipinlii káa ɖé ńsɛmpaa kɩ́ pá yɛ, nɩ wa kɔ́ kíɖóbíi kɩba pooni úpé ʊbá ɖé líbó bɩ yi wʊ naa Máarɩtɩ wɩ́ɩ́ ŋ́ka fɔɔ Yeésu ʊ́wáá ɖícénpooni. 39 Ʊ la kpɛ ʊnaarɩ úpé ʊ́bá bi yi wɩ́ɩ́ naa Márɩ́yám. Márɩ́yám má ka Tɩ́ɖáá natáŋ pɔɔ́ kɩ gbii yáá wáá la mii yɛ. 40 Máarɩtɩ wɩ́ɩ́ bɩ gbiini áɖííní tóóre nɩ wa ɖa Yeésu gbeni kɩ wɛ́ɛ́ wʊ naa: «Tɩ́ɖáá ɖáa soo sɩ ɩbá nnaarɩ káa canɩ nɩ mɩ átóó nɛɛ́yɩ ńbámbá naa ńyá ŋɩ yɛ? soó wʊ yaŋkɔ́ náá ʊ́ ɖáá logó nɩ mɩ.» 41 Tɩ́ɖáá ŋ́ka kɩ́ɩ́ wʊ naa: «Máarɩtɩ, Máarɩtɩ á woḿ nɩ́ á yáá salam ílemí ɖabata bo, 42 Amá ílemí íkolóo ńpo. Márɩ́yám lɛɛ ya ya yɛ nɩ ʊbá káá fété fɔɔ yɩ ugbeni.»