Yeésu cɛ́ɛ́tɛ róómatɩɩbɩ wáá sɔ́ɔ́ja úkpé ʊbá wáá útóóyálɩ́.
7
Yeésu káa tó zamáa wa logóópwa wʊ ɖílólonɖi yɛ nɩ́ wa kɔ́ Kafɛrɩnawʊ́m. 2 Sɔ́ɔ́jamɩ wáá úkpé ʊbá la kpɛ́ útóóyálɩ́ ʊbá ʊ tɩ́nɩɩ laá wʊ sɛ́sɛ́ɛ́. Útóóyálɩ́ má la bó hálɩ kɩ́ kɩ́ɩ́ cu ʊ kpó. 3 Sɔ́ɔ́jamɩ wáá úkpé má káa ŋu bɩ lólóó Yeésu lemíŋ yɛ, nɩ wa tó Yahúúɖúmɩ wáá bíkpélébí bɩbá Yeésu gbeni naa ʊ jé suúru kɩ ɖaa cɛ́ɛ́tɛ́ ʊ́wáá útóóyálɩ́. 4 Baá fóó Yeésu gbeni nɩ ba ɖé kɩ tɩ́níɩ́ ɖɔɔlɩɩ́ wʊ, nɩ́ kɩ́ gí náá: «Unyii nɛɛ́wʊ ɖa tɩ́nɩɩ barɩɩ́ ɩ lógóni wʊ. 5 Ʊ laá tɩ́wáá zamáa, nɩ́ wɩ́ɩ́ ńcanɩ bɩ má tɩ́wáá ɖícíŋííríɖííku». 6 Líbó nɩ́ Yeésu ka ɖé bíkpélébí má. Ʊ kɩ́ɩ́ pee cuni ɖɩcé, nɩ sɔ́ɔ́jamɩ wáá úkpé ka tóní ʊ́jɔ́tɔ́lɔ́mɩ naa bɩ soó wʊ naa: «Tɩ́ɖáá, ta naasɩɩ sɩ́bá. Ma bɛ́nɩ naa ɩ́ kɔ́ɔ́nɩ́ ńcénɖe pooni. 7 Yɩ́ɩ́ bó nɩ́ ma ná bɔɔ náá ńco ḿmɛ mánja sɩ gbeni. Amá lóloo ɖilembírí ɖikolóo ka ńwáá útóóyálɩ́ ńcɛ́ɛ́tɛ. 8 Ḿmɛ́ mánja ɖé ńwáá bíkpélébí pɔɔ́, nɩ́ n kpɛ sɔ́ɔ́jamɩ ba ɖé ḿmɛ́ mɛ́tɛ́ pɔɔ́ yɛ. Ń soó náá ʊbá náá: "póótí" ʊ bɩ́ɩ́ "póótí", n soó náá wa ké yɛ naa: "ɖá" ʊ bɩ́ɩ́ ɖá, nɩ́ n soó náá ńwáá útóóyálɩ́ náá: "yá yɩ́ɩ́ nɛɛ́yɩ", ʊ bɩ́ɩ́ yá yɩ.» 9 Sáa waa Yeésu káa ŋu ɖé yɛ nɩ́ sɔ́ɔ́jamɩ wáá úkpé lemíŋ ŋ́ka mwáŋgɩɩ wʊ. Nɩ́ wa kɛɛtɛ ʊ́bá nɩ kɩ soo ba ɖe wʊ yɛ naa: "n soó nɩ: ma láá ká ɩ́jápárɩ́ nɛɛ́yɩ, báanɩ Isɩrayɛ́ɛlɩ nɩ".» 10 Nɩ́ baa sɔ́ɔ́jamɩ wáá úkpé kaa tó yɛ káa gɔ́rɛ áɖííní yɛ nɩ́ ba ká útóóyálɩ́ káa ɖé alaafɩ́ya yɛ.Yeésu feni úpíípó ʊbá japwa
11 Yɩ́ɩ́ bɔ́ɔ́nɩ́ Yeésu ŋ́ka co ńɖó ŋaa baa yi naa Nayííni yɛ ʊ nɩ ʊ́wáá bipinlii nɩ́ zamáa ʊtakpé ka cɛ́ɛ́nɩ́ wʊ. 12 Sáatɩ waa báa kɩ́ɩ cu ńɖó wáá ɖɩ́kɔ́nɖɛ́ fém, bɩ cú unyiikpíí kɩ́ pánɩ akúmbó: ɖa la sá úpíípó ʊbá wáá ɖɩmɔjarɩ ʊ́bámbá nɩ úpé ma ka kpɛ, ńɖó má wáá binyii ɖabata la cɛ́ɛ́ úpé má. 13 Tɩ́ɖáá Yeésu káa ká wʊ yɛ, nɩ́ wa ŋu uceceéŋ nɩ́ wa soó wʊ naa: «Ta wíi!» 14 Nɩ wa jɛtɛ kɩ tɩ jɛɛ aɖákáá nɩ́ ba cú yɛ ka siri. Yeésu ka wɛ́ɛ́ náá: "Ɖɩmɔjarɩ fii, ḿmɛ́ ńwɛ́ɛ́ sɩ́!" 15 Nɩ úkpíí ka fii kɩ karɩ nɩ kɩ́ búri ɖílóloori nɩ Yeésu ka tee wu únyí. 16 Tɩnáŋga ka mɔ bɩ́ kɔ́kɔ́; nɩ́ ba nyɔ́m Mwáátáá kɩ gí náá: "Anɖébi ʊ́tákpé fóóní tɩ́wáá nɩ́ mɛ́tɛ́ "Mwáátáá ɖá ʊ́ pɛ ʊ́wáá zamáa.» 17 Nɩ́ binyii la ɖé kɩ́ lólóó yaa Yeésu káa la yá Yuuɖée wáá ńɖó kɔ́kɔ́ pooni nɩ ŋʊ́wáá ŋ́kóŋkó.
Yʊwáanɩ tó binyii Yeésu gbeni
18 Nɩ́ Yʊwáanɩ wáá bipinlii ka taŋ ílemí má kɔ́kɔ́ bɩ́wáá Úkpé. Nɩ́ Yʊwáanɩ ka yíí bícíígá bilé 19 nɩ́ kɩ́ tó bɩ Yeésu gbeni naa bɩ tɩ barɩɩ wʊ naa: "Ɩ́ sá wa bɩ́ɩ́ ɖá yɛ náa tɩ baanɩ́ ʊbá?" 20 Báa fóó Yeésu gbéni yɛ nɩ ba soó wʊ naa: "Yʊwáanɩ úlíísiili tó tɩ́ naa tɩ́ barɩɩ sɩ naa: "Ɩ́sɛ́ ńsá wa bɩ́ɩ́ ɖá yɛ náá tɩ́ baanɩ́ ʊbá?" 21 Ɖá tám má Yeésu ɖée ca bíbóólíí ɖabata, kaa kɔ́kɔ́ caarɩɩbɩ yɛ, falam-fáláḿ, kɩ ji bɩ́wáá ɩ́nɛ́ɛ́mʊ ɩ́kpɩ́ŋkpɩ́ɩ́mʊ́ nɩ́ wa canɩ bɩjɔm ɖabata ka kpɛɛ́. 22 Nɩ Yeésu ka kɩ́ɩ́ baa Yʊwáanɩ káa tó yɛ naa: «Coó tɩ taŋ maá kɩ soó Yʊwáanɩ yaa náa ká ka kɩ́ ŋu yɛ: bɩjɔm kpɛɛ́, ba bo anatá yɛ coo, tɩ́jɛ́ɛ́ráámɩ́ ká ɖacɩrɩ-cɩrɩtɩ, biwo gbii, bíkpíí gɔrɛnɩ́ mɩfɛɛnɩ, biceceeli fɔɔ́ Mwáátáá wáá laabáárʊ ʊjɔjɔɔ. 23 Alɩbárɩ́ka kɩ tee wa ná bɩ́ɩ́ fɛ́ ɩ́jápárɩ́ ḿmɛ́ bó yɛ.»
24 Baa Yʊwáanɩ káa tóní yɛ, káa póóti yɛ, nɩ́ Yeésu ka ɖé kɩ́ lólóó nɩ zamáa Yʊwáanɩ lemíi kɩ soo bɩ naa: «Batɩɩ nɩ́ na coo tɩ ká kɩ́tɩ́ɩ́ kíkóŋkóókí páá? ɖɩbatáláá ɖaa kúbúlúú káa cigí yɛ? 25 Ɖée batɩɩ nɩ́ na co naa nɩ kpaá? unyii wa fú kúfúgáá kʊjɔjɔɔkʊ yɛ?Amá ba fúbí ajimí fúgáátɩ́ ka kɩ ɖé árízikí pooni yɛ ɖé bɩ́bwɛ́ɛ́bɩ wáá ácé pooni nɩ́. 26 Ɖée batɩɩ nɩ́ na co naa nɩ́ kpaá? anɖébi? ɛɛ́n n soo nɩ hálɩ wa kpée po anɖébi yɛ. 27 Ɖoómi Yʊwáanɩ sá waa báa waa tákárɩɖá pooni naa:
"Mwáátáá wɛ́ɛ́ náá ń bɩ́ɩ́ tɔ́ ńwáá anɖébi sinyimíní
ka ʊ́ pɩɩtɩ́ sɩ́ ńsɛ".
28 Yeésu ŋ́ka kpée wɛ́ɛ́ náá: "unyii ʊbá kpá waa úpé káa ma yɛ, wa kpée sá úkpé ɖa po Yʊwáanɩ yɛ; ɖa ké náá, unyii wa kpée sá kɩ́wáákɩ́ɩ́ Mwáátáá Bwɛ́tɩ́ŋkɛnɩ yɛ sa úkpé ɖa po wʊ. 29 Zamáa kɔ́kɔ́ gbiri nɩ Yʊwáanɩ kɩ pwɛɛnɩ bɩlambúufɔɔlɩ, nɩ́ ba bɛ́ɛ́ náá Mwáátáá tógó nɩ́ ba canɩ Yʊwáanɩ lísii bɩ. 30 Amá Farizíitɩɩbɩ nɩ bɩmarámínlí yɩ́ɩ́ kaa Mwáátáá káa la laa nɩ bɩ yɛ, nɩ́ ba yɩ́ɩ́ náá Yʊwáanɩ ńta lísii bɩ.»
31 Yeésu ka kpée wɛ́ɛ́ náá: "ŋmá nɩ́ ma bɩ́ɩ́ gbá kɩ kɛɛsɛɛ nɩ ɖílemi wáá binyii? ŋmá nɩ́ ba nyɛ́? 32 Bɩ nyɛ́ bíyáá ba ka ńɖó wáá ɖícíŋíírífém kɩ lólóó nɩ ta kɩ gí náá: "tɩ yi íwoló amá na wɔ, kɩ gaá ɖíkpó wáá íle ná wíi!" 33 Ɖoómi Yʊwáanɩ Úlíísiili káa ɖa yɛ, ʊ yɩ́ɩ́ tíjégáá ɖíjérí kɩ́ yɩ́ɩ́ mɩɖaa ɖɩnyɔrɩ, nɩ́ na ɖé kɩ lólóó náá: "ʊ kpɛ kɩ́nɛ́ɛ́ kɩ́kpɩ́ŋkpɩ́ɩ́kɩ́!" 34 Unyiijapwa ɖá, kɩ jo kɩ nyu, nɩ́ na lólóó náá: "kpaá maá unyii wa barɩ́ maatɩɩ́ ɖíjérí nɩ ɖɩnyɔrɩ bo yɛ, kɩ́ sá bɩlambúufɔɔlɩ nɩ ɩ́kpɩ́ɩ́ráá jɔ́tɔ́!" 35 Amá Mwáátáá wáá ńcɩ́ɩ́ sá ɩ́já kɩ tee ba kɔ́kɔ́ kɩ́ɩ́ ŋɩ yɛ.»
Yeésu jo tíjíwɛ́ɛ́ Siimɔ́ɔn farizíiraa wáa ɖícémpooni
36 Farizíiraa ʊbá yíí Yeésu naa ʊ nɩ wʊ ńjé tíjégáá ʊ́wáá. Yeésu ŋ́ka co ʊ́wáá nɩ́ kɩ karɩ tébéru nyɛ́ɛ́nɩ́, kɩ́ ɖée jo tíjégáá. 37 Ńɖó má pooni úpé ʊbá la ɖé líbó kɩ sá ɩ́kpɩ́ɩ́ráá. Wáa ŋú náá Yeésu ɖé Farizíiraa wáá kɩ jo tíjégáá yɛ. Nɩ́ wa ɖáánɩ tɩlaarʊ́ ɖa gbé kpálɩ́bá ʊjɔjɔɔ ʊbá. 38 Nɩ́ wa ɖáa yóre Yeésu bɔ́ɔ́nɩ́, ʊnatáŋ pɔɔ́ kɩ́ ɖé kɩ́ wíí ɖa ké náá ʊ́wáá munyunyúu sɛ́ɛ́nɩ́ɩ́ Yeésu natáŋ, yɩ́ɩ́ bɔ́ɔ́nɩ́ wa píti ŋɩ nɩ uyiíŋ, nɩ́ wa lɛ́ɛ́ ŋɩ, nɩ́ wa pɩ́ tɩlaarʊ́ ŋɩ́ bóa. 39 Farizíiraa wa yíí Yeésu naa bɩ jé tíjégáá yɛ káa ká ɖée yɛ, nɩ́ wa wɛ́ɛ́ upooni naa: "Unyii nɛɛ́wʊ lafʊ sá maá anɖébi ʊ bɩɩ́ bɛ́ɛ́ kaa úpé wa jɛɛ́ wʊ yɛ káa sá yɛ. Ʊ bɩɩ́ bɛ́ɛ́ naa ɩ́kpɩ́ɩ́ráá nɩ́ wa sá. 40 Nɩ́ Yeésu ka soó Farizíiraa naa: «Siimɔ́ɔn, n kpɛ ɩbá ń bɩ́ɩ́ soó sɩ́.» Siimɔ́ɔn ŋ́ka kɩ́ɩ́ wʊ naa: «Lóloo úmíńlí.» 41 Nɩ́ Yeésu ka wɛ́ɛ́ náá: "ʊbá la kpɛ nɩ binyii bilé bɩbá ajimí, ukolóo bɩ́ɩ́ fɛrɛɛ ajimí ákúbí íkpó ilé nɩ́ ɩŋmɔ (500) wa ké yɛ bɩ́ɩ́ fɛrɛɛ akubi íkuulé nɩ pwí (50). 42 Amá bícíígá ʊbá ka la bɩ́ɩ́ fétéé fɛrɛɛ wʊ nɩ wa cátɩ bɩ. Tɔɔ, bɩ́ɩ́ bilé má cíígá ŋmá ń bɩ́ɩ́ laa wʊ ɖá poó?" 43 Siimɔ́ɔn ŋ́ka kɩ́ɩ́ wʊ naa: "Ń kpɛɛ́ náá waa wáá ɖɩ́pwá wéété ka bɩ cátɩ wʊ yɛ nɩ́. Yeésu ka kɩ́ɩ́ wʊ naa: «Ɩ kpɛ ɩ́já.» 44 Nɩ́ Yeésu ka kɛɛtɛ ʊbá úpé gbeni nɩ kɩ soó Siimɔ́ɔn naa: «kpaá ɩ́ ká úpé nɛɛ́wʊ? ń kɔ́ɔ́nɩ́ sɩ́wáá á pé mɩ múnyúu naa ń fúní nnatám, amá wɩ́ɩ́ fúni nnatám nɩ ʊ́wáá munyunyúu kɩ́ píti ŋɩ nɩ ʊ́wáá íyií. 45 A lɛ́ɛ́ mɩ́, amá ɖoo máa kɔ́ɔ́nɩ́ ɩ́lɛ yɛ, wɩ́ɩ́ barɩ́ yeni kɩ́ lɛ́ɛ́nɩ́ɩ́ nnatám nɩ́. 46 Á yá ŋkpɔ ńsɔ́ɔ́líí nÿiiɖi paab, amá wɩ́ɩ́ pɩ́ tɩlaarʊ́ nnatám paa. 47 Yɩ́ɩ́ bó nɩ́ ma soo sɩ́ naa: ɖɩlaarɩ ɖɩtakpéréɖí ɖaa wáa míni yɛ, mii naa bɩ catɩ ʊ́wáá ɩ́kpɩ́ɩ́ ɖabata. Amá waa báa cátɩ ɩ́kpɩ́ɩ́ pɔmɩ́ yɛ mii ʊ́wáá ɖɩlaarɩ pɔmɩ́. 48 Yeésu ŋ́ka soó úpé má náá: «Bɩ cátɩ sɩ́wáá ɩ́kpɩ́ɩ́.» 49 Baa ʊ nɩ bɩ káa ɖé kɩ jo yɛ ŋ́ka matɩɩ́ bipooni naa: «Ŋmá ńsá unyii wa láásɩ́ɩ́ náá ʊ catɩɩ́ ɩ́kpɩ́ɩ́ yɛ?» 50 Yeésu ŋ́ka soó úpé má náá: «Sɩ́wáá ɩ́jápárɩ́ pɛ sɩ. Coni ɖiwonɖi pooni.»