Yeésu yíí bipinlii bíbúrígáá
5
Ńwɩɩ ŋʊbá Yeésu la ɖe Jenazarɛ́ɛ́tɩ wáá ɖínyúnbúu gbeni. Binyii tuutúúma la cígí ugbeni kɩ cíítíí tá kɩ laa bɩ́ ŋmɔ Mwáátáá wáá ńwɛ́ɛ́. 2 Nɩ́ wa ka tɩ́lʊ́ŋkpáátɩ́ tilé ɖínyúnbúú gbeni. Binyii ba mɔɔ ɩ́jɛ yɛ kɩ́ɩ sini kɩ ɖé cɔ́tɩ́ɩ́ bɩ́wáá tɩ́calatɩ. 3 Yeésu ŋ́ka kɔ́ kʊ́lʊ́ŋkpáákʊ́ kʊbá nɩ́ Siimɔ́ɔn yɔkɔ. Nɩ́ wa soó wʊ naa ʊ́jɛtɛ́ kɩ tɩ ɖátɩ nɩ ḿpámbó. Yeésu ka karɩ kʊ́lʊ́ŋkpáákʊ́nɩ́ nɩ́ kɩ búri kɩ́ yáá binyii wáazi.4 Wáa tó ɖiloloori yɛ, nɩ wa soó Siimɔ́ɔn naa: «Có ńnɛ má fʊnaa múnyúu káa kpé nyɔ́ yɛ ɩ́sɛ́ nɩ sɩ́jɔ́tɔ́lɔ́mɩ kɩ́ gbá maá nɩ́wáá tɩ́calatɩ ká kɩ́ sɛ́ ɩ́jɛ.» 5 Siimɔ́ɔn ŋ́ka kɩ́ɩ́ wʊ naa: «Ukpé tɩ tɩnɩɩ ya ɖítóó kunyɛɛ kɔ́kɔ́ ta sɛ yambá. Amá ɖáá sá naa ɩ́sɛ́ ńwɛ́ɛ náá tɩ́ gbá kʊ́calaa yɛ tɩ́ bɩ́ɩ́ gbá. 6 Nɩ́ ba gbá tɩ́calatɩ nɩ́ ba tɩnɩɩ sɛ ɩ́jɛ́ ɖa wóm nɩ́ bɩ́wáá tɩ́calatɩ ka búri ɖɩ́cɔ́tɩ́rɩ́. 7 Nɩ́ ba yíí bɩ jɔ́tɔ́lɔ́mɩ ba ɖé kʊ́lʊ́ŋkpáákʊ́ kwa ké ni yɛ naa bɩ́ ɖáá logo nɩ bɩ. Nɩ́ bɩ́ɩ́ ŋ́ka ɖá, nɩ́ ba tɔ́ ɩ́jɛ ɖa gbé tɩ́lʊ́ŋkpáátɩ́ tilé má nɩ́ ɖa búri kɩ múníí nɩ tɩ múnyúu pɔɔ́. 8 Siimɔ́ɔn Péétiro káa ká ɖéé yɛ nɩ wa gbaa úɖéyííŋ bó Yeésu nyimíní nɩ kɩ wɛ́ɛ́ náá: «Ɖatɩ́ sɩ́bá nɩmɩ, Tɩ́ɖáá, ɖoómi ń sá ɩ́kpɩ́ɩ́ráá!» 9 Tɩ́náŋgá ŋ́ka mɔ Siimɔ́ɔn nɩ ʊ́jɔ́tɔ́lɔ́mɩ báa mɔ ɩ́jɛ ɖa wéété yɛ bo. 10 Zebeɖée wáá bíyáá Záakɩ nɩ Yʊwáanɩ, Siimɔ́ɔn jɔtɔlɔmɩ mɛ́tɛ́ ŋú tɩ́náŋgá. Amá Yeésu ŋ́ka soó Siimɔ́ɔn naa: «Ta ŋmɔ́ tɩ́náŋgá wáánɩ́mɩ binyii nɩ́ a bɩ́ɩ́ yííní bɩ́ ɖé mɩ.» 11 Nɩ ba ɖáánɩ́ tɩ́lʊ́ŋkpáátɩ́ kɩ yóó múnyúu nyɛ́ɛ́nɩ́ nɩ́ kɩ canɩ ɖa kɔ́kɔ́ nɩ́ kɩ ɖe Yeésu.
Yeésu cɛ́ɛ́tɛ tɩ́jɛ́ɛ́ráá ʊbá
12 Ńwɩɩ ŋʊbá, Yeésu la ɖé ńɖó ŋʊbá nɩ́. Unyii ʊbá la bo tɩ́jɛ́ɛ́ nɩ́ wa fóóní. Wáa ká Yeésu yɛ, nɩ wa ɖáa gbaa unyimíní kɩ jɛɛ uyiigbááɖɩ nɩ kɩ́tɩ́ɩ́, kɩ ɖɔɔlɩɩ́ wʊ kɩ gí náá: «Tɩ́ɖáá ɩlaá náá ɩ bɩ́ɩ́ fétée canɩ́ ńwénte ńɖéé ɖacɩrɩ-cɩrɩ.» 13 Yeésu ka tɛnɩ ʊŋálímɩ nɩ́ kɩ jɛɛ tɩ́jɛ́ɛ́ráá má nɩ kɩ wɛ́ɛ́ náá: «N laá, cɛ́ɛ́tɛ́» nɩ tɩ́jɛ́ɛ́ ka pee wɛ́tɛ. 14 Yeésu ŋ́ka soó unyii má náá: Ta soó ʊbá ɩbá, amá coni sáráaraa ŋ́kpaá sɩ́, ka ɩ́ yá ɖacɩrɩ-cɩrɩ wáá saráa waa Múúsá wáá mará káa barɩɩ́ náá bɩ́ yá yɛ, ka bɩ bɛ́ɛ́ náá ɖa la fʊ cɛ́ɛ́tɛ sɩ» 15 Binyii lɩ́ɩ́ ɖée lólóó Yeésu lemíŋ sɛ́sɛ́ɛ́. Binyii la ɖaa kɩ́ wóḿ kɩ logotiípwáḿ nɩ wʊ naa bɩ gbirí ʊ́yɛ́yɩ ka bɩ cɛ́ɛ́tɛ bɩ bɩ́wáá ɩ́wɛɛwámɩ. 16 Amá Yeésu la paaŋ́gɩ́tɩ́ ńnaa binyii káa kpá yɛ ʊ́bámbá kɩ tɩ mɛɛ́.
Yeésu cɛ́ɛ́tɛ falam-fáláḿ ʊbá
17 Nwɩɩ ŋubá,Yeésu la ɖée mii. Fariizíitɩɩbɩ nɩ́ bɩmarámínlí ka ugbeni. Bɩ kɔ́kɔ́ nyɛnɩ Galilé nɩ Yuuɖée wáá ɩ́ɖóbúúmú, nɩ Yerúsalɛ́ɛmɩ wáá ńɖó. Tɩ́ɖáá Mwáátáá wáá ḿpwáá la ɖé Yeésu gbeni kɩ cɛɛ ʊ fétéé cɛ́ɛ́tɛ́ɛ́ bíbóólíí. 18 Binyii bɩbá ka fóóní kɩ́ bá falam-fáláḿ ʊbá pampásá paa. Bɩ bɔɔ́ náá bɩ kɔnɩ wʊ ɖícénpooni ka kɩ́ yóó wʊ Yeésu nyimíní. 19 Amá bá ná nyí fʊ́naa báa bɩ́ɩ́ kɔ́nɩ wʊ yɛ, ɖéé binyii káa weété yɛ bo, nɩ́ ba jɔ́ kúɖíí kwaa báa pí nɩ mɩ́ta yɛ, kɩ lóóti, kɩ sini úbóólí nɩ ʊ́wáá pampásá binyii wáá kéncíí Yeésu nyimíní. 20 Yeésu káa ká binyii má wáá ɩ́jápárɩ́ yɛ, nɩ́ wa soó úbóólí náá: «Mɩjɔ́tɔ́, bɩ cátɩ sɩ́wáá ɩ́kpɩ́ɩ́.» 21 Ba mii mará yɛ nɩ Farizíitɩɩbɩ ŋ́ka búri kɩ matɩɩ́ náá: «Ŋmá ńsá unyii nɛɛ́wʊ, wa cií Mwáátáá yɛ? ʊbá káá fétéé cátɩ́ ɩ́kpɩ́ɩ́, Mwáátáá bámbá ń bɩ́ɩ́ fétée yá yɩ́ɩ́» 22 Amá Yeésu pee bɛ́ɛ́ yaa báa ɖéé maatɩɩ́ yɛ nɩ́ wa wɛ́ɛ́ bɩ naa: «Batɩɩ bo nɩ́ na maatɩɩ́ ɖée?» 23 Batɩɩ ŋ́kpée jí ɖa po unyii ńwɛ́ɛ́ náá: "Bɩ cátɩ sɩ́wáá ɩ́kpɩ́ɩ́" náá bɩ soó wʊ naa "fii kʊ́tápáá kɩ coo"? 24 Amá n laá náá nɩ́ bɛ́ɛ́ yɩ́ɩ́ nɛɛ́yɩ má: «Unyiijapwa kpɛ ḿpwáá kɩ́tɩ́ɩ́ nɛ́ŋkɛ paa naa ʊ́ cátɩ́ ɩ́kpɩ́ɩ́.» Nɩ́ Yeésu ka soó falam-fálám náá: "fii kʊ́tápáá, kɩ́ gbá sɩ́wáá pampásá kɩ́ kpe sɩ́wáá!" 25 Falam-fáláḿ ŋ́ka pée fii gabááɖɩ́yá binyii kɔ́kɔ́ nyímíní, kɩ bɛ ʊ́wáá pampásá wa paa wáa bɩ ɖɔ́ yɛ, nɩ́ kɩ pá ʊ́wáá kɩ́ ɖé kɩ́ nyɔ́ḿ Mwáátáá. 26 Nɩ́ ɖa yá binyii kɔ́kɔ́ bítí nɩ́ kɩ yá bɩ tɩ́náŋgá. Nɩ́ ba ɖée nyɔ́ḿ Mwáátáá kɩ́ gí náá: «Ɖílemi tɩ ka ílemí yaa tá ná láá ká yɛ!»
Yeésu yíí Leefíi
27 Yɩ́ɩ́ bɔ́ɔ́nɩ́ Yeésu ŋ́ka nyɛ́ nɩ́ kɩ ká lambúú fɔɔlɩ ʊbá bɩ yi wʊ naa Leefíi ʊ ka útóóre fém. Yeésu ŋ́ka soó wʊ naa: «Ɖe mɩ!» 28 Leefíi ŋ́ka fii kɩ canɩ ɖa kɔ́kɔ́ nɩ́ kɩ ɖe wʊ. 29 Yɩ́ɩ́ bɔ́ɔ́nɩ́ Leefíi ŋ́ka jí Yeésu jɩ́ŋgáárɩ́ ʊ́tákpé úcénɖe ni; ba fɔɔ́ lambúu yɛ nɩ binyii ɖabata ɖé líbó wɩ́ɩ́ nɩ bɩ ɖé kɩ jo tébéru ukolóó páá. 30 Farizíitɩɩbɩ nɩ bɩmarámínlí ba la ɖé bícíígá yɛ la cɔgɔ ílemí má nɩ́ ba barɩɩ Yeésu wáá bipinlii naa: «Batɩɩ bo nɩ́ na jo kɩ nyuu nɩmɩ nɩ ba fɔɔ́ lambúu nɩ binyii ba ná ya yɛ. 31 Yeésu ŋ́ka kɩ́ɩ́ binyii má náá: «Binyii ba ná bo yɛ ɖaá barɩɩ́ bɩ́ɩ́ lɔ́kɩ́ta, bíbóólíí nɩ́ ɖa barɩɩ́ lɔ́kɩ́ta. 32 Má ɖá náá ń yíí ba maatɩɩ́ náá bɩ tógó yɛ, amá ba nyí náá bɩ sá ɩ́kpɩ́ɩ́ráá yɛ ka bɩ́ kpɛ́nɩ́ bíɖééri.»
Yeésu nɩ tɩmɔbóntí
33 Binyii ŋ́ka soó Yeésu naa: «Yʊwáanɩ wáá bipinlii nɩ Farizíitɩɩbɩ yɛbɛ bóónííŋgí kɩmɔɔ sáatɩmɩ bɩbá nɩ́ kɩ mɛɛ́. Amá ɩ́sɛ́ wáá bipinlii joŋgí kɩ nyuu.» 34 Yeésu ŋ́ka kɩ́ɩ́ bɩ naa: «Úpé ɖɩ́gbárɩ́ ɖáárɩ́ nɩ́ bɩ́ɩ́ fété kɩ́ soó ʊ́já jɔtɔlɔmɩ naa bɩ́ bóó kɩmɔɔ ɖa ké náá wa gbatɩɩ úpé yɛ ɖé bigbeni? 35 Amá ɩ́wɩɩ ŋɩbá cooní bɩ bɩ́ɩ́ lɛɛ wa gbaatɩɩ́ úpé ʊ́jɔ́tɔ́lɔ́mɩ ciiga, ɖáwáá ɩ́wɩɩ má, bɩ bɩ́ɩ́ bóó kɩmɔɔ.»
36 Yeésu ŋ́ka tɔ́ bɩ ɖíbóbírí nɛɛ́ɖɛ: «Unyii ʊbá kpá wa bɩ́ɩ́ cɔ́tɩ́ ɖícóókpéré kúfúgáá kʊ́pwanpwaŋkʊ bo naa ʊ bɩ́ɩ́ páá kʊ́kpɩ́ŋkpɩ́ɩ́kʊ́ páá naa ʊ bɩ́ɩ́ yɛ́ yɛ, ńsá náá ɖée bɩ kɩ́ɩ cɔ́tɩ kúfúgáá kʊ́pwanpwaŋkʊ ɖa ké kúfúgáá kʊ́pwanpwaŋkʊ wáá ɖícóókpéré nɩ kúfúgáá kʊ́kpɩ́ŋkpɩ́ɩ́kʊ́ yɛɖɛ kɛ́ɛ́ bɛ́nɩ ta. 37 Nɩ́ ʊbá káá sití mɩɖaa mɩpwampwamɩ kʊ́gbɛ wáá kʊ́lɛ kɩ́kpɩ́kpɩ́ɩ́kɩ́ pooni ; ka sá náá ɖée mɩɖaa ma bɩ́ɩ́ wɩɩ kʊ́lɛ kɩ púú kɩ́tɩ́ɩ́ nɩ tɩ́lɛ́tɩ́ ńbíi. 38 Amá mɩɖaa mɩpwampwamɩ mɩ́ɩ́, ɖabarɩɩ tɩ́lɛ́tɩ́ tɩpwanpwatɩ! 39 Nɩ ʊbá káa laa mɩɖaa mɩpwampwamɩ ʊ kɩ́ɩ lɩɩ nyɔ náá mɩ́kpɩ́kpɩ́ɩ́mɩ́. Bɩ gi naa: "mɩ́kpɩ́kpɩ́ɩ́mɩ́ kpée ya kɩ po".»