Siitáánɩ báá Yeésu kɩ kpaá.
4
Yeésu gbé Kɩ́nɛ́ɛ́ Ɖacɩrɩ-cɩrɩ yɛkɛ nɩ wa nyɛ́nɩ́ Yɔrɩɖáánɩ wáá ŋ́kpéní, Kɩ́nɛ́ɛ́ ŋ́ka kpam wʊ kɩ coni wʊ kɩ́tɩ́ɩ́ kíkóŋkóókí páá. 2 Nɩ Siitáánɩ ká báá wʊ kɩ kpaá ɩ́wɩɩ íkuulé. Ɩ́wɩɩ ma pooni, waá la jo yambá, nɩ́ ɩ́wɩɩ má bɔ́ɔ́nɩ muko ŋ́ka bá wʊ. 3 Líbó nɩ́ Siitáánɩ ka soó wʊ naa: «ńsa náá ɩ́já náá ɩ́ sá Mwáátáá japwa soó ɖɩ́tá nɛńɖɛ naa ɖɩ́ kpɛ́nɩ́ tíjégáá.» 4 Yeésu ŋ́ka kɩ́ɩ́ wʊ naa: «Bɩ waa Mwáátáá wáá tákárɩɖá pooni naa: «Ɖaá sá tíjégáá bámbá nɩ́ unyii ka bɩ́ɩ́ jé ka kɩ́ pɛ"».5 Siitáánɩ ŋ́ka co nɩ wʊ ɖɩtɛntɛɛrɛ ɖa kpée gá yɛ kɩ́ míni wʊ ɖikolóó ḿbó kɩ́tɩ́ɩ́ páá wáá ɩ́bwɛ́ɛ́tɩ́ɩ́mʊ́ kɔ́kɔ́. 6 Nɩ́ wa soó Yeésu naa: «Ń bɩ́ɩ́ pá sɩ ḿpwáá kɔ́kɔ́ nɩ ɩ́bwɛ́ɛ́tɩ́ɩ́mʊ́ nɛɛ́yɩ wáá árízikí, ɖoómi ḿmɛ́ nɩ́ ba tee ɖa kɔ́kɔ́ nɩ́ ń bɩ́ɩ́ fétéé teé waa máa laá yɛ. 7 Ɖée gbaa síɖéyiŋ bo nnyimíní kí yá mɩ bɔɔtá ka ńteé sɩ́ ɖá kɔ́kɔ́ ńsáá sɩ́yɛ́tɛ.» 8 Nɩ́ Yeésu ka kɩ́ɩ́ wʊ naa: «Bɩ waa Mwáátáá wáá tákárɩɖá pooni naa: Sɩ́ɖáá Mwáátáá nyimíní nɩ́ a bɩ́ɩ́ gbaa nɩ ʊ bámbá nɩ́ a bɩ́ɩ́ yá bɔɔtá.»
9 Siitáánɩ ka coni Yeésu Yerúsalɛ́ɛmɩ nɩ kɩ yóó wʊ Mwáátáá cénɖe páá nɩ́ kɩ soó wʊ naa: «Ńsá náá náá ɩ lafʊ sá Mwáátáá japwa yugú ɩ́lɛ hálɩ kɩ́tɩ́ɩ́! 10 Ɖoómi bɩ waa Mwáátáá wáá tákárɩɖá pooni naa: «Mwáátáá bɩ́ɩ́ soó ʊ́wáá malááyɩ́kamɩ naa bɩ peré sɩ. 11 Nɩ́ mɛ́tɛ́: "bɩ bɩ́ɩ́ bá sɩ́ bɩ́ŋáánɩ ka ɖɩ́tá ńta gbɛ́ɛ́tɛ́ sɩ́".» 12 Yeésu ŋ́ka kɩ́ɩ́ wʊ naa: «Mwáátáá waa tákárɩɖá pooni bɩ waa naa: «Ta báá Sɩ́ɖáá Mwáátáá kɩ́ kpaá.» 13 Siitáánɩ káa báá Yeésu nɩ́ ɩ́sɛ ɖabáḿ ɖabáḿ kɩ tó yɛ, nɩ wa kóté póótí ɖáánɩ́.
Yeésu búrí útóóɖi Galilée tɩ́ŋkɛ paa
14 Yeésu ŋ́ka gɔ́rɛnɩ́ Galilée tɩ́ŋkɛ paa kɩ́ gbé Kɩ́nɛ́ɛ́ Ɖacɩrɩ-cɩrɩ yɛkɛ wáá ḿpwáá. Nɩ́ binyii ka búri kɩ́ lólóó ulemíi ńɖó kɔ́kɔ́. 15 Ʊ la mii ɖícíŋíírí ɖíítini nɩ báanɩ ŋmá ɖé kɩ́ nyɔ́ḿ wʊ.
Baá gbirini Yeésu Nazarɛ́ɛtɩ ɖóŋuni.
16 Yeésu ŋ́ka co Nazarɛ́ɛtɩ fʊ́naa wáa bé yɛ. Ɖiwonɖi wɩɩŋʊ, nɩ́ wa kɔ́ ɖícíŋííríɖííkuni ɖéé wáa peé la yáá yɛ. Nɩ wa fíí kɩ́ɩ́ kaa ɩ́waa. 17 Nɩ́ ba tee wʊ anɖébi Ezáaya wáá tákárɩɖá. Nɩ́ wa kpɛ́tɛ́ tákárɩɖá nɩ́ kɩ kaa fʊ́naa báa waa naa:
18 «Tɩ́ɖáá nɛ́ŋkɛ ɖé ḿbó,
Ʊ lɛɛ mɩ naa ńɖáánɩ biceceeli laabáárʊ Ʊjɔjɔɔ.
Ʊ tó mɩ́ naa ń ɖáá soó ba ɖé sárɩ́ka pooni yɛ naa bɩ bɩ́ɩ́ ká ɖɩ́cátɩ́rɩ́, nɩ́
bɩjɔm bɩ́ɩ́ kpaá,
nɩ́ baa báa náásɩ́ɩ́ yɛ, bɩ́ɩ́ ká ɖɩ́cátɩ́rɩ́,
19 ka kɩ́ káá náá ɖíbé ɖaa Tɩ́ɖáá káa bɩ́ɩ́ míní uceceéŋmɔrɛ yɛ fóóní.
20 Nɩ Yeésu ka kpɛ́ tákárɩɖá kɩ gɔrɛnɩ́ kɩ tee ɖícíŋííríɖííku wáá útóóyálɩ́, nɩ́ kɩ karɩ. Nɩ́ báanɩ ŋmá wáá anyimí ka cú úbó. 21 Nɩ́ wa soó bɩ naa: «Ɖílemi ɩ́waa nɛɛ́yɩ la fʊ yá kɩ tee nɩmɩ ba gbiri yɛ.» 22 Bɩ́ kɔ́kɔ́ la lólóó ʊ́wáá ɩ́jɔɔ nɩ́ ɖa yáá bɩ bítí íceceéŋmɔ́rɛ wáá ɩ́wɛ́ɛ́ ŋa nyɛnɩ nɩ ʊmɔɔkɩ pooni yɛ. Nɩ́ ba barɩɩ́ tá náá: «Ɖaá sá Yúúsífu japwa sɔ?» 23 Yeésu ŋ́ka sɔɔ́ bɩ naa: «Ń nyí náá nɩ́ bɩ́ɩ́ tɔ́ mɩ ɖíbóbírí nɛńɖɛ: "lɔ́kɩ́ta cɛ́ɛ́tɛ́ sɩ́bá" nɩ́, nɩ́ bɩ́ɩ́ soó mɩ́ mɛ́tɛ́ náá: "tɩ́ ŋú yaa kɔ́kɔ́ áa yá Kafɛrɩnawʊ́m yɛ, yá yɩ́ɩ́ má nɔ́ɔ́ sɩ́wáá ńɖó pooni ɩ́lɛ má".» 24 Nɩ Yeésu ka kóte naa: «n soo nɩ ɖa sá ɩ́já: anɖébi ʊbá kpá waa báa fɔɔ́ kʊ́lááŋmɛ́ ʊ́wáá ńɖó ŋaa pooni báa ma wʊ yɛ. 25 Ɩ́já nɩ́ ma soo nɩ: anɖébi Elíya wáá zaamáánɩ bípíípɩ́ɩ́bɩ la wéété Isirayɛ́ɛlɩ wáá zamáa pooni. Ɖátám má kʊ́táá la canɩ ɖɩnyɛrɩ ábé ata nɩ ɖɩ́wárɩ́ nɩ́ muko mɩbá ka kɔ́ɔ́nɩ́ ńɖo kɔ́kɔ́ nɩ́. 26 Nɩ́ Mwáátáá ká tó Elíya Isirayɛ́ɛlɩ wáá úpíípó ʊbá wáá. Ʊ tó wʊ úpíípó ʊbá bámbá wá ɖé Sarɛpɩtáa ɖóŋu ŋwa ɖé Siɖɔ́ɔnɩ tɩ́ŋkɛ paa yɛ. 27 Anɖébi Elisée wáá zaamáánɩ tɩ́jɛ́ɛ́ráámɩ́ la wéété Isɩrayɛ́ɛlɩ tɩ́ŋkɛ paa. Amá, Elisée ká cɛ́ɛ́tɛ bícíígá ʊbá ɖaké kɩ cɛ́ɛ́tɛ Naamáanɩ Sííriyaraa.
28 Ba kɔ́kɔ́ bɩ ɖé ɖícíŋííríɖííkúnɩ kɩ gbii ʊ́wáá ɩ́wɛ́ɛ́ yɛ ka tɩ́nɩɩ pi ɖíŋúu. 29 Nɩ́ ba fii kɩ lɛɛ Yeésu bɩ́wáá ńɖó ní kɩ coni wʊ ɖɩ́jɔ́ɔ́ ɖaa paa báa la má Nazarɛ́ɛ́tɩ yɛ yiiɖi paa naa bɩ bɩ́ɩ́ cíí wʊ ʊ́lɛ́ hálɩ kɩ́tɩ́ɩ́. 30 Amá Yeésu ŋ́ka gbanɩ bícíígá kɩ́ sɔ́ŋɔɔ ʊsɛm.
Unyii waa kɩ́nɛ́ɛ́ kɩ́kpɩ́ŋkpɩ́ɩ́kɩ́ káa náásɩ́ɩ́ yɛ.
31 Yeésu ŋ́ka co Kafɛrɛnawʊ́m Galilée wáá ńɖóní, nɩ kɩ mii binyii ɖiwonɖi wɩɩŋʊ. 32 Ɖa la ɖé binyii bítí baa la gbii ʊ́wáá ɖímínɖí ɖoómi ʊla lólóó nɩ íko. 33 Ɖícíŋíírí ɖííku má nɩ́ ʊ́já ʊbá la ɖé líbó kɩ́nɛ́ɛ́ kɩ́kpɩ́ŋkpɩ́ɩ́kɩ́ kɩ́ɩ kɔ́ wʊ. Nɩ́ wa ɖé kɩ́ kpííníí nɩ ḿpwáá: 34 «Óo! Yeésu Nazarɛ́ɛtɩ yɔwʊ ɩ́lá nɩ́ ya bɔ́ɔ́ nɩ tɩ? ɩ́ ɖá náá ɩ́ nogó tɩ gɛɛ? ń tɩ́nɩɩ nyí waa áá sá yɛ: ɩ́ sá ɖacɩrɩ-cɩrɩ nyiiwu wáá Mwááta káa tóní yɛ. 35 Nɩ́ Yeésu ka soó kɩ́nɛ́ɛ́ kɩ́kpɩ́ŋkpɩ́ɩ́kɩ́ má nɩ ḿpwáá náá: «Ŋmɛ́rɛ́ ka kɩ nyɛ́ unyii má pooni» nɩ́ kɩ́nɛ́ɛ́ má ka mɛ́ɛ́ wʊ kɩ́tɩ́ɩ́ binyii kɔ́kɔ́ nyímíní nɩ́ kɩ́ nyɛ́ upooni amá kaá yá wʊ yambá. 36 Nɩ́ bɩ kɔ́kɔ́ ka kɔ́ bítí. Nɩ́ ba ɖé kɩ barɩɩ́ tá náá: «ʊ́wáá ńwɛ́ɛ́ má mii naa lɛɛ? «Ʊ soo ɩ́nɛ́ɛ́mʊ́ mʊ́kpɩ́ŋkpɩ́ɩ́mʊ́ nɩ íko nɩ ḿpwáá náá bɩ́ nyɛ́ nɩ ba nyɛ. 37 Nɩ Yeésu yííɖi ŋ́ka kpíí ńɖó wáá báa nɩ lambó.
Yeésu cɛ́ɛ́tɛ bíbóólíí ɖabata
38 Yeésu ŋ́ka nyɛ́ ɖícíŋííríɖííkuni kɩ co Siimɔ́ɔn cénɖeni. Siimɔ́ɔn capo la bo, tíwé kɔ́kɔ́ pígí, nɩ́ ba barɩɩ Yeésu naa ʊ́ yá yambá. 39 Nɩ Yeésu ka ɖá kɩ gbaa úbó nɩ́ kɩ já nɩ ɩ́wɛɛ má, nɩ́ ɩ́wɛɛ ŋ́ka póóte, nɩ wa pee fii kɩ fɔɔ bɩ kʊ́caŋkʊ.
40 Ńwɩɩ kaa líti yɛ, ba kɔ́kɔ́ kpɛ bíbóólíí ba bo ɩ́wɛɛ báanɩ ɩ́lá yɛ ɖáánɩ́ bɩ Yeésu gbeni. Nɩ wa páánɩ́ɩ́ ɩ́ŋálɩ́ báanɩ úbóólí ʊ́lá bó kɩ cɛ́ɛ́tɛ́ɛ́ bɩ. 41 Ɩ́nɛ́ɛ́mʊ́ mʊ́kpɩ́ŋkpɩ́ɩ́mʊ́ ŋ́ka nyɛ́ bíbóólíí ɖabata pooni nɩ kɩ́ kpííníí kɩ́ gí náá: «Ɩ́ sá Mwáátáá japwa!» Amá Yeésu ká pé bɩ ɖáámá, kɩ́ peré nɩ bɩ naa bɩ́ ta lóloo, ɖoómi bɩ nyí náá Yeésu sá Mesííya.
Yeésu ɖée káánɩ́ɩ́ laabáárʊ ʊjɔjɔɔ ɖícíŋíírí ɖíítini
42 Kʊ́táá káa pɩɩtɩ yɛ Yeésu ŋ́ka nyɛ́ ńɖó ní kɩ́ póóti ńnaa binyii káa kpá yɛ. Nɩ́ binyii ka búri kɩ bɔɔ́ wʊ nɩ́ kɩ́ ɖáa tɩ́ fóó ńnaa waa ɖé yɛ. Nɩ ba tɩ pwánɩ wʊ kɩ laa naa bɩ bá wʊ ʊ ta póóti kɩ canɩ́ bɩ. 43 Amá Yeésu ŋ́ka soó bɩ naa: «ɖa barɩɩ́ náá ń tɩ káá kɩ soó Mwáátáá Bwɛ́ɛ́tɛ́ŋkɛ wáá laabáárʊ ʊjɔjɔɔ íɖó ŋa ké yɛ, ɖoómi yɩ́ɩ́ bó nɩ́ Mwáátáá ka tóní mɩ́. 44 Nɩ wa káa laabáárʊ ʊjɔjɔɔ Yuuɖée wáá ɖícíŋíírí ɖíítini.