Lúkɩ 3

Yʊwáanɩ úlíísiili wáá wáazi

Ɖa la sá Róóma wáá ʊ́bwáyáá úkpée Tibɛ́ɛrɩ wáá tɩ́bwɛ́jére waa ábé pwí nɩ aŋmɔ tamʊʊ, Pɔ́nsɩ Piláatɩ wɩ́ɩ́ la kpɛɛ́ Yuuɖée wáá kɩ́tɩ́ɩ́ páá, Héroɖi wɩ́ɩ́ Galilée yɛkɛ nɩ úkpóo Fíílipi wɩ́ɩ́ la kpɛɛ́ lituré tɩ́ŋ́kɛ bo nɩ Tɩrasɔɔníitɩ ńtím bo, nɩ́ Lisaana wɩ́ɩ́ la kpɛɛ́ Alibilɛ́ɛnɩ tɩ́ŋkɛ paa, 2 Háánɩ nɩ Kayɩfɩ la sá saráaraamɩ wáá bikpélébi. Ɖa waa zaamáánɩ má Mwáátáá ŋ́ka lóloo nɩ Zakarɩ búu Yʊwáanɩ, kɩ́tɩ́ɩ́ kíkóŋkóókí bó. 3 Nɩ́ Yʊwáanɩ ka búri kɩ jinií Yɔrɩɖáánɩ wáá ɩ́wálɩ́-ɩ́wálɩ́ kɩ́ káánɩ́ɩ́ náá: «Kpɛ́nɩ́ maá nɩ́ ɖéérí canɩ́ maá bɩ́ lísii nɩ ka Mwáátáá ńcatɩ nɩ́wáá ɩkpɩ́ɩ́». 4 Ɖée nɩ yaa anɖébi Ezááya káa la waa ʊ́wáá tákárɩɖá pooni ŋ́ka yá:

«unyii ʊbá kpííníí kɩ́tɩ́ɩ́ kikoŋkooki páá kɩ gí náá:

kóré maá Tɩ́ɖáá wáá ńsɛ́,

lɛɛ maá wʊ ɩ́sɛnbúúmú ŋa tógó yɛ!

5 Ɩ́fɛ kɔ́kɔ́ bɩ́ɩ́ ɖáá gbé,

Ájɔ́ɔ́ nɩ ígólíímú bɩ́ɩ́ ɖáá naa

Ɩ́sɛ ya mwɛ́ɛ́ yɛ bɩ́ɩ́ ɖaa tóŋóó ɩ́sɛ ya poŋoo yɛ bɩ́ɩ́ ɖáá tɛnɩ kʊ́lááŋmɛ́. 6 Nɩ bɩ kɔ́kɔ́ bɩ́ɩ́ ká Mwáátáá wáá ɖɩpɛnɖɛ ɖa nyɛnɩ́ nɩ ugbeni yɛ!»

7 Binyii tuutúúma ŋ́ka ɖaa Yʊwáanɩ gbéni naa úlísii bɩ. Nɩ́ wa soó bɩ naa: áwáátá wáá ḿmaa nɩ́ na sá, ŋmá ńmíni nɩ ɖéé náá bɩ́ɩ́ fétéé yá ka kɩ́ siŋii Mwáátáá ŋúúɖi ɖa cooní yɛ? 8 Yá maá ɩ́jɔɔ ka kɩ́ míní náá nɩ́ kɩ́ɩ kpɛ́nɩ́ níɖéré. Ta ɖéé maá kɩ maatɩɩ́ nɩ pooni naa: «Ibiraahím sá títíkpé. N soo nɩ, nɩ ká átá nɛɛ́yɩ ɩ́lɛ máa, Mwáátáá bɩ́ɩ́ fété gba ŋɩ kɩ kpɛ́nɩ nɩ bíyáá kɩ teé Ibiraahím. 9 Ɖɩ́kpɔ́ kɩ́ɩ ɖé péré, kɩ́ bɩ́ɩ́ gíí ícíí hálɩ ɩ́wáá ícíbólé: Ícíí ŋaa kɔ́kɔ́ ká maa ácíbí ajɔjɔɔ yɛ bɩ bɩ́ɩ́ gíí yɩ kɩ́ fɛ́ yɩ ḿmíínɩ́».

10 Binyii ŋ́ka barɩɩ Yʊwáanɩ náá: batɩɩ Mwáátáá ŋ́ka laá náá tɩ́ yá?

11 Nɩ́ wa kɩ́ɩ́ bɩ naa: «Wa kpɛ́ náá tífúgátɩ́ tilé ɖa barɩɩ́ ʊ́ gbá kʊbá kɩ́ pá wa ná kpɛ́ yɛ, nɩ́ wa kpɛ́ tíjégáá yɛ ńbú kɩ́ pá.»

12 Ba fɔɔ lambúu yɛ mɛ́tɛ́ ŋ́ka ɖá náá Yʊwáanɩ ńlísii bɩ múnyúu, nɩ́ ba barɩɩ wʊ náá: «Úkpé batɩɩ nɩ́ ɖa barɩɩ́ tɩ́ yá?» 13 Nɩ́ wa kɩ́ɩ́ bɩ naa: «Ta pɔ́rɛ́ maá binyii ḿpwáá naa bɩ fɛrɛɛ nɩ ɖá poó kaa baa soó nɩ naa bɩ fɛrɛɛ nɩ yɛ.»

14 Sɔɔ́jamɩ ŋ́ka barɩɩ wʊ mɛ́tɛ́ náá, tɩmɩ nɩ́: «Lɛɛ-lɛɛ nɩ́ ta bɩ́ɩ́ yá?» Nɩ́ wa kɩ́ɩ́ bɩ naa: «ta fɔɔ maá ʊbá gbéni ajimí nɩ ḿpwáá náá kɩ pɩ́ úbó ímwamwáá, gbírí maá nɩ ajimí ŋaa báa fɛrɛɛ́ nɩ yɛ.»

15 Zamáa kɔ́kɔ́ la baa: nɩ́ báanɩ ŋmá la maatɩɩ́ náá ká bɛ́ɛ́ náá Yaáya la sá Mésááya. 16 Yʊwáanɩ ŋ́ka kɩ́ɩ́ bɩ kɔ́kɔ́ naa: «Ḿmɛ́ lísíínɩ́ nɩ múnyúu; amá wa bɩ́ɩ́ ɖa yɛ wɩ́ɩ́ kpée pwáá ɖa pó ḿmɛ́: má fóó ń bótí ʊ́wáá ɖɩnataarɩ wáá ńŋmɛ́. wɩ́ɩ́ bɩ́ɩ́ ɖaa lísii nɩ nɩ Kɩ́nɛ́ɛ́ Ɖacɩrɩ-cɩrɩ yɛkɛ ɖanɩ ḿmíí. 17 Ʊ bá kʊ́pɩ́nɩgaa ʊ́ŋáánɩ́ kɩ́ bɩ́ɩ́ pɩ́ ka kɩ lɛɛ ábí ɖabám típoo ɖabám. Kɩ́ gbá ʊ́wáá ábí kɩ́ tɔ́ kúlé pooni, amá típoo tɩ́ɩ́, ʊ bɩ́ɩ́ sɛ́ tɩ́ɩ́ ḿmíí ŋa ná gbéni ɖarɩbá-ɖarɩbá yɛ pooni.» 18 Ɖa nɩ ɖéé ɩ́sɛ́ nɛɛ́yɩ ɖabata nɩ́ Yʊwáanɩ ŋ́ka káá zamáa Mwáátáá wáá laabáárʊ ʊjɔjɔɔ. 19 Heróoɖi gba Heroɖiyáaɖɩ, úkpóo po. Ní ʊ kpée yá ílemí ɖabata ya na yá mɛ́tɛ́ yɛ, yɩ́ɩ́ kɔ́kɔ́ bó nɩ́ Yʊwáanɩ ka bɔ́sɩɩ wʊ. 20 Nɩ Heróoɖɩ ka kpée yá ɩ́kpɩ́ɩ́ kɩ́ kóte ɩ́kpɩ́ɩ́ bo: ʊ canɩ bɩ pɩɩ Yʊwáanɩ kúɖíí.

Yeésu wáá múnyúu ɖílíísiiri

21 Waá lísii binyii kɔ́kɔ́ yɛ, nɩ́ wa lísii Yeésu mɛ́tɛ́. Sáatɩ waa wáa ɖé kɩ mɛɛ́ yɛ nɩ kʊ́tápáá ka pɩɩtɩ, 22 nɩ́ Kɩ́nɛ́ɛ́ Ɖacɩrɩ-cɩrɩ yɛkɛ ka sini úbó kɩ ɖé ɖéé séé alikuku yɛ. Nɩ ba ŋú ńnyɛ́ɛ́ ŋʊbá ɖoo kʊ́tápáá náá: «Ɩ́sɛ́ ńsá mɩjapwa ʊlaŋga, síbó nɩ ma tɔ́ ńwáá ḿmwáá kɔ́kɔ́.»

Yeésu ɖɩ́náálɩ́mɩ

23 Yeésu la kpɛ́ ɖéé ábé ŋ́kóó nɩ pwí sáa waa wáa búrí Mwáátáá wáá laabáárʊ ʊjɔjɔɔ ɖɩtanɖɩ yɛ. Bɩ la maatɩɩ́ náá ʊ sá Yúúsífu, wa la sá Elíya japwa yɛ, yaa japwa, 24 Elíya sá Matáatɩ japwa, Matáatɩ sá Lefíi japwa, Lefíi sá Mɛ́lɩkíi japwa Mɛ́lɩkíi sá Janáayɩ japwa, Janáayɩ sá Yúúsífu japwa. 25 Yúúsíf sá Matatɩyáasɩ japwa, Matatɩyáasɩ sá Amɔ́ɔsɩ japwa, Amɔ́ɔsɩ sá Nahúúmɩ japwa, Nahúúmɩ sá Esɩlɩ japwa Esɩlɩ sá Nagáayɩ japwa, 26 Nagáayɩ sá Máatɩ japwa, Máatɩ sá Matatɩyáasɩ japwa, Matatɩyáasɩ sá Seméeyɩ japwa, Seméeyɩ sá Yoosɛ́ɛkɩ japwa, Yoosɛ́ɛfɩ sá Yúúɖa japwa, 27 Yúúɖa sá Yohanáánɩ japwa, Yohanáánɩ sá Résáá japwa, Résáá sá Zorobabɛ́ɛ́lɩ japwa, Zorobabɛ́ɛ́lɩ sá Salatɩyɛ́ɛ́lɩ japwa, Salatɩyɛ́ɛ́lɩ sá Neríi japwa 28 Neríi sá Mɛ́lɩ́kɩ japwa, Mɛ́lɩ́kɩ sá Aɖíi japwa, Aɖíi sá Kɔsáamɩ japwa, Kɔsáamɩ sá Elimaɖáamɩ japwa, Elimaɖáamɩ sá Ɛ́ɛrɩ japwa, 29 Ɛ́ɛrɩ sá Yeésu japwa, Yeésu sá Eliyezɛ́ɛrɩ japwa, Eliyezɛ́ɛrɩ sá Yórɩmɩ japwa, Yórɩmɩ sá Matáatɩ japwa, Matáatɩ sá Lefíi japwa, 30 Lefíi sá Simeyɔ́ɔ́nɩ japwa, Simeyɔ́ɔ́nɩ sá Yúúɖa japwa, Yúúɖa sá Yúúsífu japwa, Yúúsífu sá Yonáamɩ japwa, Yonáamɩ sá Eliyakíimɩ japwa, 31 Eliyakíimɩ sá Méléya japwa, Méléya sá Ménaa japwa, Ménaa sá Matáata japwa, Matáata sá Natáanɩ japwa, Natáanɩ sá Ɖáwúɖa japwa, 32 Ɖáwúɖa sá Yesée japwa, Yesée sá Obɛ́ɛɖɩ japwa, Obɛ́ɛɖɩ sá Bowáazɩ japwa, Bowáazɩ sá Saláa japwa Saláa sá Nasɔ́ɔnɩ japwa, 33 Nasɔ́ɔnɩ sá Aminaɖáabɩ japwa, Aminaɖáabɩ sá Aɖimíni japwa Aɖimíni sá Ariníi japwa, Ariníi sá Ɛsɩrɔ́ɔnɩ japwa, Ɛsɩrɔ́ɔnɩ sá Pérɛ́ɛsɩ japwa, Pérɛ́ɛsɩ Yúúɖa japwa, 34 Yúúɖa sá Yaakúbu japwa, Yaakúbu sá Isaáka japwa, Isaáka sá Ibiraahím japwa, Ibiraahím sá Teráa japwa, Teráa sá Nahɔ́ɔrɩ japwa, 35 Nahɔ́ɔrɩ sá Sérúugi japwa, Sérúugi sá Rewúu japwa Rewúu sá Pelɛ́ɛgɩ japwa, Pelɛ́ɛgɩ sá Hébiru japwa, Hébiru sá Seláa japwa, 36 Seláa sá Kenáanɩ japwa, Kenáanɩ sá Arɩpasáaɖɩ japwa, Arɩpasáaɖɩ sá Sɛ́ɛmɩ japwa, Sɛ́ɛmɩ sá Núhum japwa, Núhum sá Lemɛ́ɛkɩ japwa, 37 Lemɛ́ɛkɩ sá Matusalɛ́ɛmɩ japwa, Matusalɛ́ɛmɩ sá Enɔ́ɔkɩ japwa, Enɔ́ɔkɩ sá Yerɛ́ɛɖɩ japwa, Yerɛ́ɛɖɩ sá Kenáanɩ japwa, 38 Kenáanɩ sá Enɔ́ɔsɩ japwa, Enɔ́ɔsɩ sá Sɛ́ɛtɩ japwa Sɛ́ɛtɩ sá Aɖam japwa, Aɖam sá Mwáátáá japwa.