Ro Paghiliugyon ku mga Tumueuo nga Pinakaeawas ni Kristo
4
Ngani ako nga ginpriso tungod sa akong pagserbisyo sa Ginuo hay nagahinyo nga magkabuhi kamo kon mauno dapat magkabuhi ro mga tinawag it Dyos. 2 Dapat nga mapainubuson kamo, maeueo, mahigugmaon sa inyong isigkatawo ag mapinasensyahon sa kakueangan ku kada isaea. 3 Tinguhaa gid ninyo nga mag-ililiba nga may paghidait sa kada isaea agod ro inyong paghiliugyon nga halin sa Espirito Santo hay magapadayon. 4 Kita tanan nga mga tumueuo hay ginhugpong sa sangka eawas ag sangka Espirito Santo ro nagaistar iya katon. Ag may aton man nga sangka mayad nga paeaabuton nga hasayran gid naton nga itao it Dyos sa tanan nanang katawhan nga anang tinawag. 5 Kita tanan hay may sangka Ginuo nga si Jesu-Kristo ag imaw gid lang ro aton tanan nga ginatuuhan. Ag may sangka kahueugan eang ro pagbawtismo katon tanan. 6 May aton pa gid nga sangka Dyos nga Ama naton tanan. Imaw ro nagapangueo katon tanan agod matuman naton tanan ro anang kabubut-on ag imaw ro nagaistar iya katon tanan.7 Pero sa sobrang kabuot ni Kristo hay ana kita nga gintaw-an it eain-eain nga abilidad nga suno sa anang gusto nga bagay katon. 8 Pareho sa nasueat sa Sagrado nga Kasueatan,
“Pagkayab nana sa eangit hay dagaya ro anang gindaea nga mga bihag.
Ag may ana dayon nga ginregalo nga sari-sari nga mga abilidad sa anang mga katawhan.” a
9 Suno dikara hay nagkayab imaw sa eangit. Bukon abi it nagapakilaea ron nga nanaog anay imaw iya sa kalibutanb halin sa eangit? 10 Ro nanaog halin sa eangit hay imaw man mismo ro nagsaka idto sa pwesto nga eabaw sa tanan agod itao nana ro tanan nga pagpakamaayo agod makompleto ro tanan-tanan sa eangit ag sa eugta. 11 Ag imaw man ro nagtao sa tanan nanang katawhan it mga tawo nga may sari-saring abilidad. Ro iba kanda hay mga apostoles, ro iba hay mga propeta, ro iba hay mga manogwali nga nagaadto sa ibang lugar agod magsugid ku Mayad nga Balita, ag ro iba mat’-a hay mga pastor nga gadipara ku mga tumueuo ag gaturo man kanda. 12 Rayang mga abilidad hay gintao agod ipahaom kita nga mga katawhan it Dyos sa pagserbisyo kana ag sa atong isigkatawo ag dahil kara hay mapalig-on kita tanan nga pinakaeawas ni Kristo. 13 Sa raya nga paagi, mangin sambilog kita sa atong pagtuo ag pagkilaea sa Unga it Dyos, hasta mangin but-anan eon gid kita ag ro atong pagginawi hay mangin pareho ku ay Kristo nga owa it ikasaway.
14 Kon mangin makaruyon eon kita hay bukon eon dayon kita it pareho ku mga unga nga owa’t buot. Ro mga unga abi nga owa’t buot hay madali hipapati sa sari-sari nga mga ginaturo ku mga tuso ag manogluko ag pareho sanda it baroto sa eawod nga nagasunod-sunod eang sa humbak ag ginaapok-apok it hangin. 15 Imbis nga makaruyon kita, dapat nga magtindog kita sa matuod nga pagturo ag isugid naton ron sa atong mga kaigmanghuran bangod ginahigugma naton sanda. Kon obrahon naton ron, ro atong pagginawi hay padayon nga maganami hasta mangin pareho ku ay Kristo nga aton nga pinakaueo. 16 Sa anang pagdumaea, kita nga anang pinakaeawas hay nagaaeangot ag nagahugpong pareho ku pag-aeangot it mga kaeuta-eutahan sa mga parti it eawas. Ag kon ginahimo ku kada parti ro anang obligasyon hay magakusog ag magatubo ro bilog nga eawas. Makaruyon man ro matabo sa pinakaeawas ni Kristo kon ginahigugma naton ro kada isaea ag ginahimo naton ro gintao katon nga ueubrahon.
Ro Dati nga Kabuhi ag ro Bag-ong Kabuhi
17 Ngani sa otoridad nga gintao kakon it Ginuo, ginasugo ko kamo nga indi eon ninyo paghimuon ro ginahimo ku mga owa nagapati sa Dyos tungod ro andang ginapaino-ino hay owa it pueos. 18 Mga dungoe sanda nga owa it kalibutan parti sa Dyos ngani nadueman ro andang paino-ino ag owa sanda nakaambit sa bag-ong kabuhi nga halin sa Dyos. 19 Mga owa eon sanda it huya ag ginpasugtan eang nanda ro maeain nga kailigbon ku andang eawas, ag owa gid sanda it kabueusgan sa paghimo it mga mahigko nga buhat.
20 Pero kamo’t-a hay bukon it makaruyon nga klaseng pagkabuhi ro ginturo kinyo kat nagtuo eon kamo kay Kristo. 21 Sigurado ako nga kamo nga may maeueot nga kaangtanan kana hay nakabati gid ag hatud-an ku kamatuuran nga naghalin kana. Makasigurado kita nga matuod ron ay halin ron kay Jesus. 22 Gintud-an eon kamo kato nga dapat ninyo aywanan ro mga maeain ninyong batasan ag paino-ino. Ro inyong pagpasugot sa inyong mga maeain nga kailigbon hay nagluko kinyo ag nagsamad sa inyong kabuhi. 23 Kinahangean nga ro inyong paino-ino ag panimuot hay mabag-o it husto. 24 Ngani magkabuhi kamo suno sa bag-o nga kabuhi nga gintao it Dyos agod ro inyong kabuhi hay mangin pareho ku ana nga matarong ag balaan.
25 Ngani indi kamo magpinuril kundi sugiran ninyo kon ano eang ro matuod sa atong mga kaigmanghuran tungod kita tanan nga mga tumueuo hay sambilog eang sa pinakaeawas ni Kristo. 26 Kon naakig kamo, ayaw ninyo ron pagpabay-i nga magtueod kinyo nga makahimo it saea. Dueaa ro imong kaakig bago matunod ro adlaw. 27 Ayaw ninyo pagtaw-i it tsansa si Satanas nga matentar kamo. 28 Kon may una kinyo nga manakaw hay indi eon imaw magpanakaw kundi maghugod imaw sa pagpangita sa matarong nga paagi agod makabulig man imaw sa mga pobre. 29 Indi kamo maghambae it makasaeamad sa inyong isigkatawo kundi ro gaguwa eang dapat sa inyong ba-ba hay kon ano ro andang ikamayad ag kinahangean nanda agod maglig-on ro andang pagtuo. 30 Isaea pa gali, indi kamo maghimo it mga bagay nga makapasubo sa Espirito Santo it Dyos tungod ro anang pag-istar kinyo hay tanda nga mga katawhan kamo it Dyos ag tubson nana kamo sa pina it saea kon mag-abot eon ro adlaw it paghukom. 31 Ngani ayaw ninyo pagdumti ro inyong mga kaigmanghuran. Dueaa ro kaakig ag ro kaugot kanda. Ayaw kamo mageuyawan ag maglieibakan ag ayaw maghambae it bisan ano nga ikaeain ku inyong isigkatawo. 32 Dapat nga mabuot ag maeueuy-on kamo sa kada isaea. Patawara ro kada isaea pareho sa pagpatawad ku Dyos kinyo paagi kay Kristo.