Ginpamayad ni Jesus Ro Sangka Tawo nga Kimpay ro Alima sa Adlaw it Inogpahuway
(Mt 12:9-14; Lu 6:6-11)
3
Nag-adto it uman si Jesus sa sinagogaa ag may tawo idto nga kimpay ro anang alima. 2 May mga Pariseo man idto ag ginabantayan nanda kon pamayron ni Jesus ro tawo ngato sa Adlaw it Inogpahuway agod may anda dayon nga ikaakusar kana. 3 Gintawag ni Jesus ro tawo ngato ag anang ginhambae, �Tindog iya sa printi.� 4 Ginpangutana dayon ni Jesus ratong mga nagabantay kana, �Suno sa Kasuguan, ano ro puyding obrahon kon Adlaw it Inogpahuway? Ro mayad o ro maeain? Magtabang baea o magpatay?� Pero owa sanda magsabat. 5 Gintueok ra sanda ni Jesus nga may kaakig pero nasubuan man tungod owa gid sanda it kaeuoy. Ginhambae na dayon ro kimpay ngato, �Untayan ring alima.� Gin-untay na ro anang alima ag nagmayad eagi rato. 6 Naggueuwa eagi sa ratong sinagoga ro mga Pariseo ag nagpakigkita sa mga kaapin ni Herodes agod planohan kon paalin patyon si Jesus.Kaabo nga mga Tawo nga Halin sa Sari-saring Lugar ro Nag-adto kay Jesus
7 Pagkatapos, si Jesus ag ro anang mga sumueunod hay nag-adto sa baybayon ku Dagat it Galilea ag kaabo-abo nga mga tawo ro nagsunod kanda. Naghalin ra sanda sa probinsya mismo it Galilea. May mga naghalin man sa Judea, 8 Jerusalem, Idumea, sa tabok ku suba it Jordan, ag sa palibot ku mga syudad it Tiro ag Sidon. Kaabo-abo gid nga tawo nga nag-adto kay Jesus tungod nakabati sanda ku tanan nga mga ginaobra nana. 9 Tungod sa kaabuon ku mga tawo, ginpapahaom ni Jesus it baroto ro anang mga sumueunod ay basi magtueumpok sanda kana. 10 Dahil abo ro anang ginpamayad ngani ro iba pang mga masakiton hay nagadueotdutan paeapit kana agod hibuytan imaw. 11 Ag kon hikita ngani imaw it mga maeain nga espirito nga una sa eawas it mga tawo hay anda nga ginapahapa ag ginapasiyagit ro mga tawo nga andang ginsudlan ag ginapahambae it mabaskog, �Ikaw ro Unga it Dyos!� 12 Pero ginbinawaean gid ni Jesus ro mga maeain ngato nga espirito nga indi magsugid bisan kanyo kon sin-o imaw.
Nagpili ni Jesus it Anang Dose nga ka Apostoles
(Lu 6:12-16)
13 Ku ulihi, nagtukad si Jesus sa bukid. Tag idto imaw, ana nga gintawag ro mga tawo nga gusto nana nga mag-adto idto kana ag nag-aeadto dayon sanda.b 14 Nagpili dayon imaw kanda it dose nga gintawag nana nga mga apostoles. Ana sanda nga ginpili nga mangin kaibahan nana agod ipadaea bisan siin para magwali parti kana. 15 Gintaw-an man nana sanda it otoridad ag gahom sa pagsuboe it mga demonyo sa mga tawo nga andang ginsudlan.
16 Ro dose nga ginpili nana hay si Simon (nga ginpangaeanan nana nga Pedro), 17 ro mga unga ni Zebedeo nga sanday Santiago ag Juan. (Ginhayuan nana sanda nga Boanerges nga ro buot hambaeon hay �matsa daeugdog� dahil sanda hay mga mainiton it ueo.) 18 Kaibahan man si Andres, si Felipe, si Bartolome, si Mateo, si Tomas, si Santiago nga unga ni Alfeo, si Tadeo, si Simon (nga isaeang ka rebelde anay sa paggobyerno it Roma), 19 ag si Judas Iscariote nga nagtraidor kay Jesus ku ulihi.
Ro Gahom ni Jesus hay Halin sa Espirito Santo Bukon it kay Satanas
(Mt 12:22-32, Lu 11:14-23; 12:10)
20 Nag-adto dayon sanday Jesus sa sangka baeay. Kaabo-abo eon man nga mga tawo ro nag-aeabot idto ngani owa eon makakaon sanday Jesus ag ro anang mga sumueunod ay masako gid sanda. 21 Pagkasayod kara ku anang pamilya, gin-adtunan nanda si Jesus agod sueangon ay may nagahinambae nga nasamad eon ro anang ueo.
22 May mga maestro it Kasuguan nga naghalin sa Jerusalem nga naghambae, �Ginasudlan imaw ni Beelzebulc. Paagi eang sa gahom ku pinuno ngaron it mga demonyo imaw makasuboe it mga demonyo.� 23 Gintawag ra sanda ni Jesus ag ginsugiran it mga paanggid nga istorya nga ginkomparahan nana sa ratong sitwasyon:
�Paalin ni Satanas hipahalin ro anang kaugalingon? 24 Kon ro mga pumueuyo sa isaeang ka nasyon hay nagagrupo-grupo ag perming nagailinaway, indi pwede nga ronduyon nga nasyon hay magbuhay. 25 Makaruyon man ro matabo sa sangka panimaeay nga perming nagailinaway. 26 Ngani kon si Satanas mismo ro nagasuboe sa anang mga sinakpan nga mga demonyo sa mga tawo nga andang ginsudlan hay ginakuntra nana ro ana mismong kaugalingon. Kon matabo ron hay indi magbuhay ro anang pagdominar ag matapos gid ron.
27 Kon sudlon it manakaw ro baeay it sangka makusog nga tagbaeay hay indi imaw makatakaw it bisan ano kon indi anay nana paggapuson ro tagbaeay. Pero kon higapos na eon ngani ro tagbaeay hay dikaron eon imaw makapanakaw ku mga pagkabutang.d
28 Matuod rang ginahambae kinyo nga mapatawad it Dyos ro mga tawo sa tanan nandang mga saea ag pag-insulto sa ibang tawo, 29 pero ro nagainsulto sa Espirito Santo hay indi gid pagpatawaron. Owa gid it kapatawaran rondayang saea bisan hasta hin-uno.� 30 Ginhambae ra ni Jesus ay may naghinambae abi nga ro espirito kuno nga una kay Jesus hay bukon �t-a it ro Espirito Santo kundi tag maeain�t-a nga espirito.
Ro Nagatuman sa Dyos ro Ginakabig ni Jesus nga Anang Matuod nga Pamilya
(Mt 12:46-50; Lu 8:19-21)
31 Samtang nagahambae pa si Jesus hay nag-abot ro anang ina ag mga igmanghod. Idto sanda sa liwan it baeay nagatieindog ag ginpatawag nanda imaw. 32 Abo nga mga tawo ro nagaeilingkod palibot kana ag may mga nagsugid dayon kana, �Hato sa liwan si nanay mo ag ro imo nga mga igmanghod. Ginausoy ka nanda.� 33 Nagsabat si Jesus, �Huo, una matuod sanda pero sugiran ta kon sin-o ro akon nga ina ag mga igmanghod sa panueok it Dyos.� 34 Gintueok nana ro mga nagaeilingkod sa anang libot ag pagkatapos hay naghambae imaw, �Raya ro akon nga ina ag mga igmanghod. 35 Ro bisan sin-o nga nagatuman sa kabubut-on it Dyos hay ruyon ro akon nga ginakabig nga ina ag igmanghod.�