Ro Mayad nga Balita nga Ginsueat ni
Mateo
Ro Linahe ni Jesu-Kristo
(Lu 3:23-28)
1
Raya ro listahana ku kalolo-lolohan ku Maneueuwas nga si Jesus nga isaea sa mga inapo ni Haring David nga isaea man sa mga inapo ni Abraham.2 Si Abraham ro ama ni Isaac ag si Isaac ro ama ni Jacob. Si Jacob ro ama ni Juda ag ku anang mga igmanghod.
3 Si Juda ro ama nanday Fares ag Zara ag ro andang ina hay si Tamar. Si Fares ro ama ni Esrom ag si Esrom ro ama ni Aram.
4 Si Aram ro ama ni Aminadab ag si Aminadab ro ama ni Naason. Si Naason ro ama ni Salmon.
5 Si Salmon ro ama ni Boaz nga ro anang ina hay si Rahab. Si Boaz ro ama ni Obed nga ro anang ina hay si Ruth. Si Obed ma’t-a ro ama ni Jesse,
6 ag si Jesse ro ama ni Haring David.
Si David ro ama ni Solomon nga ro anang ina hay ro asawa anay ni Urias.
7 Si Solomon ro ama ni Roboam ag si Roboam ro ama ni Abias. Si Abias ro ama ni Asa.
8 Si Asa ro ama ni Josafat ag si Josafat ro ama ni Joram. Si Joram ro ama ni Ozias.
9 Si Ozias ro ama ni Jotam ag si Jotam ro ama ni Acaz. Si Acaz ro ama ni Ezequias.
10 Si Ezequias ro ama ni Manases ag si Manases ro ama ni Amos. Si Amos ro ama ni Josias.
11 Raya nga si Josias ro ama ni Jeconias ag ku anang mga igmanghod.
Sa anda nga tyempo ginbihag ro mga nagaistar sa Jerusalem ag gindaea sa nasyon it Babilonya agod mangin ulipon.b
12 Tag idto eon sanda sa Babilonya, natawo si Salatiel nga unga ni Jeconias. Si Salatiel ro ama ni Zorobabel.
13 Si Zorobabel ro ama ni Abiud ag si Abiud ro ama man ni Eliaquim. Si Eliaquim ro ama ni Azor.
14 Si Azor ma’t-a ro ama ni Sadoc ag si Sadoc ro ama ni Aquim. Si Aquim ro ama ni Eliud.
15 Si Eliud ro ama ni Eleazar ag si Eleazar ro ama ni Matan. Si Matan man ro ama ni Jacob.
16 Si Jacob ro ama ni Jose ag si Jose ngara hay asawa ni Maria nga ina ni Jesus nga ginatawag nga Kristo,c ro paadtunon iya it Dyos agod maghari.
17 Ro nakalista nga linahe ni Jesu-Kristo hay 14 ka henerasyon halin kay Abraham hasta kay Haring David. 14 man nga ka henerasyon halin kay David hasta sa tyempo nga ginbihag ro mga nagaistar sa Jerusalem ag gindaea sa Babilonya agod mangin mga ulipon. Ag 14 pa gid ka henerasyon halin ku pagdaea kanda sa Babilonya hasta sa pagkatawo ku Kristo, ro Maneueuwas nga ginpromisa it Dyos.
Ro Pagpahisayod ku Pagkatawo ku Maneueuwas nga si Jesus
(Lu 2:1-7)
18 Makaraya ro nagkaeatabo bago natawo ro Maneueuwas nga si Jesus. Si Maria nga anang ina hay kaeasaeon eon kato kay Jose.d Pero bago sanda kaslon hay hapan-uhan nanda nga naganabdos eo’t-a si Maria paagi sa gahom it Espirito Santo. 19 Si Jose nga anang mangin asawa hay masinueundon gid sa kasuguan it Dyos ngani nagakahueugan ra nga ana dapat nga bueagan si Maria.e Pero owa imaw naila nga mahuy-an si Maria, ngani nagplano imaw nga bueagan si Maria nga owa it ibang makasayod. 20 Ruyon ro anang ginapaino-ino pagtueog nana. Ginpadamgo dayon imaw it Dyos ag sa anang damgo hay may sangka anghel it GINUO nga nagpakita kana. Hambae ku anghel, “Jose, isaea sa mga inapo ni Haring David, padayuna ro pagpakasae kay Maria ay naganabdos ron imaw paagi sa gahom it Espirito Santo. 21 Magaunga imaw it eaki ag pagapangaeanan mo ro eapsag it Jesus ay imaw ro magaeuwas ku anang mga katawhan sa pina ku andang mga saea.” 22 Natabo ra tanan agod matuman ro ginpasueat kato it Dyos sa anang propeta nga,
23 “Magapanamkon ro isaeang ka daeaga nga owa pa hatabing it eaki ag magaunga it eaki ag pagapangaeanan imaw it Emmanuel nga nagakahueugan nga ‘kaibahan naton ro Dyos.’ ” f