50
1 Yi tilol Ẍep yi quimeꞌn yi taj nintzun bentz tan kꞌaleꞌn yi wankil nin tan stzꞌubleꞌn yi xak stziꞌ. Wiꞌnin tzun tokꞌeꞌn iꞌ. 2 Cawuneꞌn nintzun scyetz yi eꞌ ajtzꞌac tan cyoqueꞌn tan xtxꞌajleꞌn yi wankil yi taj, nin tan cuꞌseꞌn tul balsamo. Yaꞌstzun cyulejtz tan qui kꞌayeꞌn chan. 3 Caꞌwunak tzun kꞌej eꞌ bantz tan tocseꞌn balsamo teꞌj, na yaꞌstzun tiemp yi na taj tan cuꞌseꞌn wankil jun yi na quim. Tan yi bis yi quimeꞌn Israel qui eꞌ akꞌuj yi eꞌ aj Egipto oxcꞌal tu lajuj kꞌej.a 4 Itzun yi jeꞌmpon yi oxcꞌal tu lajuj kꞌej bisaꞌtz nintzun jilon Ẍeptz scyetz yi eꞌ yi najlcheꞌ teꞌj faraón, itzun taltz:
—Yi ko ja jal imbalajil ẍchiwutzuꞌ, na tzun kloꞌ waj yil chibanuꞌ pawor tan talcheꞌn tetz faraón yi xtxolbileꞌj: 5 “Taꞌ je yol Ẍepeꞌj: Te yi itzꞌ tzaj yi kꞌajtzun intaj, nin yi txant tan quimeꞌn, nintzun jak iꞌ swetz tan imbeneꞌn tan mukleꞌn tcꞌuꞌl yi nich yi bnixnak cyen taꞌn. Poro yi jun nichaꞌtz choꞌn at tcꞌuꞌl jun picy jalen tziꞌn Canaán.b Chaꞌstzun te nink ltakꞌuꞌ amaꞌl swetz tan imbeneꞌn tan mukleꞌn yi wankil yi kꞌajtzun intaj. Ej nin yil mukx cyen waꞌn, chimpakxok junt tir tzoneꞌj,” cheꞌchuꞌ sban cyen, stzun Ẍep scyetz yi eꞌ yi najlcheꞌ-tz teꞌj faraón. Ej nin yaꞌtz nintzun cyulejtz.
6 Yi tbital faraón nintzun taltz:
—Baꞌn, baꞌn cẍben tan mukleꞌn yi wankil tal kꞌajtzun ataj, quib yi tal iꞌ tzawetz, stzun faraón bantz.
7 Yi tbital Ẍep yi yol faraón nintzun ben tan mukleꞌn yi wankil yi kꞌajtzun taj. Ej nin eꞌ xomnin cyakil cuꞌn yi eꞌ ẍchakum faraón yi at chikꞌej. 8 Nchaꞌtz eꞌ ben cyakil yi najal Jacow, nin cyakil yi najal Ẍep. Nchaꞌtz cyakil yi eꞌ stzicy. Ntin eꞌ nitxaꞌ tu yi cyawun, eꞌ cyaj cyen le amaꞌl Gosén. 9 Wiꞌnin tzun wunak eꞌ xomnin teꞌj Ẍep tan mukleꞌn yi taj. At eꞌ cyꞌaꞌn careꞌt cyaꞌn, nin at eꞌ yi choꞌn ateꞌ teꞌj chej. 10 Yi cyoponeꞌn le amaꞌl yi na biꞌaj Goren-ha-atad, yi choꞌn at swutz len aꞌ Jordán, choꞌn tzun eꞌ cyajeꞌn cyen juk kꞌejtz tan bis oꞌkl, le jun amaꞌlaꞌtz. 11 Itzun yi quilol yi eꞌ aj Canaán yi najlcheꞌ le amaꞌlaꞌtz, yi bis oꞌkl yi ateꞌ cuꞌnt yi eꞌ aj Egipto nintzun cyaltz: “At jun chin mukuꞌn yi chin bisbil nin chixoꞌl yi eꞌ aj Egipto.” Chaꞌstzun te yi toqueꞌn biꞌ yi jun amaꞌlaꞌtz cyaꞌn tetz Abel-mizraim. Yi jun amaꞌlaꞌtz choꞌn at swutz len yi aꞌ Jordán.
12 Yaꞌstzun cyulej yi eꞌ cyꞌajl Jacow tan mukleꞌn yi wankil chitaj. Ja chixom te yi tajbil Jacow quib yi talnak scyetz, 13 na nin eꞌ ben tan mukleꞌn yi wankil yi tal kꞌajtzun chitaj jalen Canaán. Choꞌn tzun toqueꞌn cyen cyaꞌn le picy yi at le amaꞌl Macpela, yi amaꞌl yi lokꞌnak Abraham tetz Efrón yi aj Het, na yaꞌtz nin xac yi lokꞌol Abraham. Na ja lokꞌ i tetz chimukbil cyakil cuꞌn eꞌ najal. Yi jun amaꞌlaꞌtz choꞌn at swutzlen Mamre.c
14 Itzun yi wiꞌt mukxeꞌn yi wankil Jacow nin eꞌ pakxij Ẍeptz tu yi eꞌ stzicy. Xomcheꞌ cyakil yi eꞌ ẍchakum faraón yi at chikꞌej scyeꞌj.
Yi txant tan quimeꞌn Ẍep
15 Itzun yi quilol yi eꞌ stzicy Ẍep yi nsken quim yi chitaj nintzun cyaltz: “Ma jaluꞌ, quiꞌct yi kataj at skaxoꞌl. Quicunin batz na chiꞌch cꞌuꞌl Ẍep skeꞌj tan yi eꞌchk takleꞌn cachiꞌ yi banakoꞌ teꞌj, yi sajeꞌn kacꞌayil,” cheꞌch tzun bantz. 16 Nintzun ben mantar tan talcheꞌn tetz Ẍep: “Yi ntaxk quim kataj, nin cawun cyen sketz tan kalol yi yoleꞌj teruꞌ. Je yol iꞌeꞌj: 17 ‘Ma jaluꞌ Ẍep, nink tzaban pawor tan cuyleꞌn chipaj yi eꞌ awutzicy yi chin cachiꞌ nin banakeꞌ tzaweꞌj,’ chij iꞌ ban. Chaꞌstzun te na katzan tan jakleꞌn cuybil kapaj swutzuꞌ yi oꞌ yi atoꞌ jakꞌ caꞌwl yi Ryosil yi kataj.”
Wiꞌnin tzun tokꞌeꞌn Ẍeptz te yi na tzan yi chakum tan xtxoleꞌn cyen yi xtxolbilaꞌs tetz. 18 Cyoponeꞌn tzun yi eꞌ mero tetz stzicy tan jakleꞌn cuybil chipaj tetz. Ej nintzun eꞌ baj cuꞌ jokloktz jalen cuꞌn cweꞌn poneꞌn yi wutz chiplaj wuxtxꞌotxꞌ. Itzun cyaltz:
—Je oꞌeꞌj, baꞌn koꞌc tetz esclawuꞌ.
19 —Quil cxobwok, stzun Ẍep ban scyetz. —Na quiꞌc cuj yi nink noꞌc tetz Ryos tan maꞌleꞌn itajtzaꞌkl yi ko at ipaj nka quiꞌ. 20 Bintzi loꞌ yi mero itajbil iꞌtz kloꞌ tan imbiyleꞌn cuꞌn, poro Ryos ntxꞌixpuneꞌn yi xtxolbileꞌj tetz balaj tan chiclaxeꞌn wiꞌnin wunak. 21 Chaꞌstzun te quil cxobwok na swakꞌeꞌ iwaꞌ, tuml chiwaꞌ yi eꞌ initxaꞌ, stzun Ẍep bantz. Chin putzpujnin yol nxcon taꞌn tan chimayseꞌn yi eꞌ stzicy.
Yi quimeꞌn Ẍep
22 Choꞌn tzun eꞌ najeweꞌn Ẍep tu yi najal yi kꞌajtzun taj le amaꞌl Egipto. Na tzun xon Ẍep tul jun cient tu lajuj yob te yi jun tiempaꞌtz. 23 Tajskej iꞌ chiwutz chicyꞌajl yi eꞌ mamaj Efraín. Nchaꞌtz tajskej Ẍep chiwutz yi eꞌ nitxajil yi mamaj iꞌ, yi Maquir yi cyꞌajl Manasés.
24 Itzun yi nachoneꞌn Ẍep te yi txant tan quimeꞌn, nintzun taltz scyetz yi eꞌ stzicy: “Yi in wetz txant tan inquimeꞌn, poro Ryos tzꞌocopon tan ichꞌeyeꞌn, tan itelseꞌn le jun tnumeꞌj. 25 Ej nin je jun xtxolbileꞌj yi na waj yil tzibanwok. Yil tzꞌoc Ryos tan itelseꞌn tzoneꞌj tan itoponeꞌn junt tir le amaꞌl yi sukiꞌnt taꞌn tetz Abraham, Isaac tu Jacow, na kloꞌ waj yi tzicyꞌajwok nin inwankil tziteꞌj,”d stzun Ẍep bantz.
26 Jun cient tu lajuj yob Ẍep yi quimeꞌn. Choꞌn tzun quimeꞌntz Egipto, nintzun oc tzꞌacꞌbil te yi wankil tan qui kꞌayeꞌn chan. Nin cuꞌ-tz cyakꞌun tcꞌuꞌl jun cajón.