Tsiq eeq 135
Tsiq eeq nail daoqsel
1 Haq leiq lul yaq.
Heeqphaq Miqyail nail aqmil bhai tsiq eeq bhel.
Heeqphaq Miqyail nail yaqkav juq-ol
aivq bhai tsiq eeq yaoq.
2 Ngadao nail Heeqphaq Miqyail nail
ilkhaol nail khainl lavqkhoel bhai
ganl nl nail juq-ol
aivq bhai tsiq eeq yaoq.
3 Heeqphaq Miqyail neq, meeq nail ngel-i mail
aivq bhai tsiq eeq yaoq.
Aivq nail aqmil bhai
daoqsel gul khi tsiq eeq yaoq.
Al hai nl nail phaq neq
meeq dee dee nail phaq pevq nail ngaol.
4 Khul khi mail dai ngal-aq
Heeqphaq Miqyail neq
aivq nail tsaol-aq bhi pevq nail dai khi
Yaqkov nail jeq-e jaq-a juq bhai
tsel dov-a nail nee ovqtavq
aivq nail jeq-e jaq-a bhi pevq nail dai khi
Ilsaqleiqlav nail jeq-e bhai iqsanl
tsel dov-a nail ngaol.
5 Heeqphaq Miqyail neq
eeq nail heel nail ngaol dai
ngal heeq kivq nail ngaol.
Ngadao nail Heeqphaq Miqyail neq
yu nail miqyail juq nee maq tsil eeq jaiq nail ngaol.
6 Heeqphaq Miqyail neq
nqtavq khi mail miltsaq bhai maqkhaiq
iqyaq iqma khi mail
al nail daoqthaoq bhai maqkhaiq
aivq neema khal tsaq nail khe-ai
lav sav-ai thaq nail ngaol.
7 Aivq neq, nqdil bhai
nq jail mil jail nee mail oil dol lavq nail ngaol.
Maoq-aol nee mail nqjaiq tsaoq teivq bhi lee khi
oil jil-ai thaq nail jaol duq nee lilmoel
phaiq dov-ai leevq nail ngaol.
8 Aivq neq, Iljiltuv milkhaoq bhai jaol nail
tsaol-aq yaq nee mail jaiqyaq bha kev dai
uqbhao aqivq iqsanl mail bhi sil gil-a nail ngaol.
9 Milkhaoq al khaoq khe
heeqphaq Phaqlaol khi mail
aivq nail ganl nl yaq juq bhai
aivq noeq-u maq dov nail ganl juq mao dai
nl daiq bhiq-a nail ngaol.
10 Jeq-e jaq-a mao dai bhai
aivq lav luq lav seil bhiq khi
bhaqaoq eeq nail heeq phaq
mee nia gaq bhai heivq-a nail ngaol.
11 Aqmaolliv nail tsaol-aq nail heeqphaq Silhonq
Bhaqsanq milkhaoq khe
heeqphaq Aolgav khi mail
Khaqnanq milkhaoq khe jaol nail
heeqphaq juq bhai heivq gil-a nail ngaol.
12 A bhai nee ngal-aq, aqyu juq nail miltsaq
aivq nail tsaol-aq pevq nail
Ilsaqleiqlav nail tsaol-aq bhai
jaiq bhoil bhi pevq lal nail dai khi
bivq-a nail ngaol.
13 Heeqphaq Miqyail-ol, naoq nail aqmil
nqmaq maqluv halyeel ivq nail ngaol.
Naoq nail ganl, teevq yeel nee teevq yeel
heeq nia nail ngaol.
14 Aivq neq, aivq nail tsaol-aq bhai
oeqbal maq aol-ail dai, dal ceiv bhiq nail ngaol.
Aivq nail yaqkav juq bhai iqsanl
gaoq haq gaiq-a bhiq nail ngaol.
15 Yu nail jeq-e jaq-a-i mail
uqhuq thaoq nail maolkhoel neq
phul heel pevq nail ngaol.
Al neq, tsaol-aq yaq nail aqlavq-i mail
lav sav-ai thaq nail phaq pevq nail ngaol.
16 Maol khoel al juq neq
moeqthaoq covq khi ngaol-aoq
daoq maq ge nia ail.
Maiv neev covq khi ngaol-aoq
maq moel nia ail.
17 Naqkov covq khi ngaol-aoq
maq gaiq nia ail.
Aq haq gaol dav gaol kha nail iqsanl maq bhao ail.
18 Maol khoel teivq-a nail juq maqkhaiq
al bhai juq nail juq maqkhaiq
maolkhoel al khe-ai dul lal nail ngaol.
19 Ilsaqleiqlav nail tsaol-aq juq-ol
Heeqphaq Miqyail bhai geeqlaoq bivq yaoq dei-eiq.
Aqlonq nail aqjievq liqdee juq-ol
Heeqphaq Miqyail bhai geeqlaoq bivq yaoq dei-eiq.
20 Leiqbhil nail jeq-e juq-ol
Heeqphaq Miqyail bhai geeqlaoq bivq yaoq dei-eiq.
Heeqphaq Miqyail bhai gee sil khi ev nail juq-ol
aivq bhai geeqlaoq bivq yaoq dei-eiq.
21 Yeiqlulsaqlaiq meenq-ai
jaol nail Heeqphaq Miqyail bhai
Yeel ovq gaoqjaoq kovtavq nee
geeqlaoq bivq yaoq dei-eiq.
Haq leiq lul yaq.