Tsiq eeq 132
Uqhuq thaoq nail ilkhaol il ma bhai tsiq eeq nail daoqsel
1 Heeqphaq Miqyail-ol
Daq bhil khi aivq-i mail ya daq-a nail
haq nail aoq nail phaq bhai
noeq kev lavq yaoq.
2 Aivq neq
Yaqkov-i mail uqhuq thaoq-a nail
bhaqaoq eeq nail Heeqphaq Miqyail bhai
saljial niail hai jaq-a nail ngaol:
3-5 "Yaqkov-i mail uqhuq thaoq-a nail
bhaqaoq eeq nail Heeqphaq Miqyail
jaol nail jaol duq bhai, maq ya cov-u kev dai
yovqgavq nail ilkhaol bhai maq aol lai
iq thaiq duq bhai maq dav lai nail nee ovqtavq
maivneev iqsanl maiv khul khi
maq iq thaiq-ail" dai, saljial jaq-a nail ngaol.
6 Nv juq Bhaiqlaiqhaiq meenq-ai jaol-u phao
Yaq liq dai khaoq bhai
Miqyail nail daoqma saljial thunq jiav nail dai
ya gaiq khi haoqnao neq, ya moel-a nail ngaol.
7 Ngadao juq
Heeqphaq Miqyail nail ilkhaol bha lai gil bhel.
Aivq nail doiqbev bev ma nail sivtavq-ai
aivq bhai gaol beiv khi
uqhuq thaoq gil bhel.
8 Heeqphaq Miqyail-ol
thul lal khi, naoq nail bhaqaoq eeq nail
daoqma saljial nail thunq nee mail
naoq nail jaol duq bhai jaol lee yaoq.
9 Naoq nail philma phil yaq juq
tsaq nail daol nail phaq bhai
aqgaq aqdoi doi nail khe-ai, doi dei-eiq.
Naoq bhai saljial ivq nail tsaol-aq juq iqsanl
lavqkhiq tsail nail lavqkhoel nee gul dei-eiq.
10 Naoq nail yaqkav Daq bhil nail
maivphaoq bhai hel daiq khi
naoq-i mail
aqtseel hoel dav khi
tsel dov-ai thaq nail heeqphaq bhai
thaq khaonq ha lavq.
11 Heeqphaq Miqyail neq, Daq bhil bhai
saljial niail hai jaq-ai thaq nail ngaol.
Saljial al neq
teevq thal-iq maq phal lal nia ail.
"Naoq-ai nee mail yavq kha lee thaq nail yaq juq
naoq nail joiq jaq doiqbev bev ma bhai
ngal bhi jaol deel naol.
12 Al ovqtavq, naoq nail yaqyov juq
ngaq nail daoqma saljial bhai maqkhaiq
ngaq-i mail cavq bhiq cov bhiq-a nail
salkhil bhai maqkhaiq
nal daiq haq neq
aqyu juq nail yaqyov juq bhai iqsanl
naoq nail joiq jaq doiqbev bev ma bhai
khaq mao iqsanl ya jaol deel nail ngaol" dai
jaq-ai thaq nail ngaol.
13 Heeqphaq Miqyail neq
Yeiqlulsaqlaiq meenq bhai
tsel dov-a nail ngaol.
A bhai aivq jaol nail haqbhoil
neekhaol sil khi niail hai ge nail ngaol:
14 "Meenq al meenq neq
khaq mao iqsanl ngaq nail jaol duq pevq khi
ngal uv thaiq nail haqbhoil neekhaol sil nail ngaol.
15 A bhai jaol nail juq bhai
aqyu juq-i mail khal loq nail phaq
teevq bhee teevq lovq bivq khi
haq yaq aoq yaq juq bhai iqsanl
teevq bov bhi jaq nail ngaol.
16 A bhai jaol nail philma phil yaq juq
hevq kovq nail phaq bhai
aqgaq aqdoi doi nail khe-ai
bhi doi nail nee ovqtavq
saljial ivq nail juq iqsanl
lavqkhiq tsail khi daoqsel gul nail ngaol.
17 Ngal Daq bhil nail aqjievq liqdee teevq gaq bhai
bhaqaoq eeq nail heeqphaq bhi jiovq khi
ngaq-i mail aqtseel hoel dav khi
tsel dov-a nail heeqphaq neq
phalmanq khe-ai, khaq mao iqsanl
aqbhaq bhi bhaq nail ngaol.
18 Aivq bhai neejiav jiav nail juq bhai
haq sil nail phaq aqgaq aqdoi doi nail khe-ai
bhi doi nail ngaol.
Thail hai ngaol-aoq
aivq-i mail uv thaiq nail phaq neq
eeq lal heel lal nail ngaol" dai, ge nail ngaol.