Tsiq eeq 130
"Tsao jao-ai lavq yaoq" dai, hal nail geeqlaoq hal daoq
1 Heeqphaq Miqyail-ol
ngaq nail neema
haq aoq nl dee dee nail lavqkhoel nee
naoq bhai gul nail ngaol.
2 Heeqphaq-ol
ngaq-i mail gul nail aqthel bhai gaiqlaq yaoq.
"Tsao jao-ai lavq yaoq" dai
ngaq-i mail hal nail geeqlaoq hal daoq bhai iqsanl
nal daiq lavq yaoq.
3 Heeqphaq Miqyail-ol
naol nv juq nail oeqbal bhai
gevq thaq-ai thaq-al kheel nul-uq
khaq sil gaq
yalkhaq dal nail lavqkhoel nee
tsaoq jel nia nail-aiq.
4 Thail hai ngaol-aoq
nv juq naoq bhai gee sil khi ev kivq dai
naol neq, nv juq nail oeqbal
phaiq lavq-a nail ngaol.
5 Ngaq nail neema aqmaol
Heeqphaq Miqyail bhai daonq khi
aivq nail daoq bhai noeq thunq nail ngaol.
6 Meenq nail ilkhaol daqmoe bha lovq nail juq
nqbhaq bhaq lal nail bhai
noeq thunq nail nee maq tsil, ngal neq
Heeqphaq Miqyail bhai noeq thunq jaiq nail ngaol.
7 Ilsaqleiqlav nail tsaol-aq juq-ol
Heeqphaq Miqyail bhai noeq thunq yaoq.
Khul khi mail dai ngal-aq
aivq neq gaoq haq goil gaiq-a nia nail phaq khi
hevq kovq nail phaq
teevq bhee teevq lovq aol nail ngaol.
8 Aivq neq
Ilsaqleiqlav nail tsaol-aq juq bhai
oeqbal iqsanl nee ul kovq dov bhiq nail ngaol.