Tsiq eeq 121
Ilsaqleiqlav nail jeq-e jaq-a bhai hel daiq phail nail Miqyail
1 Ngaq bhai tsao jao-ai nail phaq
khaq bha nee dov lee ail meeq dai
gaoqjaoq juq bha
ngal gaol lel khi hel daiq-a nail ngaol.
2 Nqtavq khi mail miltsaq teivq-a nail
Heeqphaq Miqyail jaol nail nee taivq-ail
dov lee nail ngaol.
3 Aivq neq, naoq nail aqkhil bhai
maq bhi naoq gaoq lavq ail.
Naoq bhai hel daiq phail nail gaq neq
teevq thal-iq maq iq thaiq kov ail.
4 Ilsaqleiqlav nail jeq-e jaq-a bhai
hel daiq phail nail gaq neq
teevq thal-iq iq thaiq nul khi
iq thaiq kov nail maq bhao ail.
5 Heeqphaq Miqyail neq
naoq bhai hel daiq phail lavq nail ngaol.
Aivq neq, naoq nail aqjail bhai jaol khi
naoq bhai uv thaiq nail aq haiq pevq nail ngaol.
6 N gaol phao nl ma-i mail maqkhaiq
nqkiv phao bha la-i mail maqkhaiq
naoq bhai khul maq khi lal nia ail.
7 Heeqphaq Miqyail neq
haqeiv nail phaq iqsanl nee mail
naoq bhai hel daiq phail lavq khi
aqdoevq bhi doevq lavq nail ngaol.
8 Heeqphaq Miqyail neq
yanqgaol nee danq khi
nqmaq maqluv halyeel
naol ya ail ya lal nail gailkhaol bhai
hel daiq phail lavq nail ngaol.