Tsiq eeq 113
Heeqphaq Miqyail meeq nail ganl bhai tsiq eeq nail
1 Haq leiq lul yaq.
Heeqphaq Miqyail nail yaqkav juq-ol
aivq nail aqmil bhai tsiq eeq yaoq.
2 Heeqphaq Miqyail nail aqmil bhai
yaq n-gaol nee danq khi
nqmaq maqluv halyeel
geeqlaoq bivq dei-eiq.
3 Nl ma dov khoeq nee mail
nlma ga khoeq bhai kev dai
Heeqphaq Miqyail nail aqmil bhai tsiq eeq yaoq.
4 Heeqphaq Miqyail neq
jeq-e jaq-a iqsanl bhai uv thaiq nail ngaol.
Aivq nail seiqleiq khaoqsail neq
nqtavq nee maq tsil moe nail ngaol.
5 Ngadao nail Heeqphaq Miqyail nee mail
tsiq ceiv kivq nail teevq gaq iqsanl maq jaol ail.
Aivq neq, daqmoe bha jiav nail
aivq nail joiq jaq doiqbev bev ma bhai
jaol deel nail ngaol.
6 Al heel ngel-i mail, aivq neq
nqtavq khi mail miltsaq bhai ya moel dai
thaoq kovq khi hel daiq nail ngaol.
7 Aivq neq, haq nail aoq nail juq bhai
khaqlail nail lavqkhoel nee he thul khi
moevq nail sivq nail tsaol-aq juq bhai
iqsanl nail lavqkhoel nee
tsiq thul bhiq nail ngaol.
8 A bhai nee ngal-aq, aqyu juq bhai
aivq nail tsaol-aq juq nail heeqphaq nail
yaqyov juq nee teevq gaq khe-ai
bhi jaol deel nail ngaol.
9 Aivq neq, maq bhao aqma
ilkhaol bhai bhi jaol khi
lavqkhiq bhi tsail nail haqbhoil
yaq bhi jaol lee nail ngaol.
Haq leiq lul yaq.