Tsiq eeq 112
Tsaq nail daol nail tsaol-aq juq neq, geeqlaoq eeq nail ngaol
1 Haq leiq lul yaq.
Heeqphaq Miqyail bhai
gee sil nail lavqkhoel nee ev khi
aivq-i mail bivq-ai thaq nail
aoldaoq kovqdaoq bhai
tsao the nail haqbhoil neekhaol sil nail juq neq
geeqlaoq eeq nail ngaol.
2 Aqyu juq nail yaqmiq yaqyov juq neq
milkhaoq bhai bhaqaoq jiav nail nee ovqtavq
tsaq nail daol nail ngel-i mail
yaq juq juq iqsanl
geeqlaoq ya nail ngaol.
3 Aqyu juq nail ildaoq neq
hulmeeq hul bhao bhao lal khi
khaq mao iqsanl
tsaq nail daol nail phaq ivq nail ngaol.
4 Daol coev dai doevq nail juq nail haqbhoil neq
aqnav nail lavqkhoel nee
aqbhaq dov lal nail ngaol.
Aqyu juq neq, gaoqhaq goil gaiq-a nia khi
tsaq nail daol nail ngaol.
5 Yu bhai tsao jao-ai khi
aqnieivq-ail bivq nail nee ovqtavq
yovqgavq nail ganl bhai
aq see aqdaol daol dai nl nail juq neq
geeqlaoq eeq nail ngaol.
6 Tsaq nail daol nail juq neq
sunq ail nail maq bhao ail.
Yu iqsanl, aqyu juq bhai
teevq thal-iq maq nioil peivq ail.
7 Al heel ngel-i mail, aqyu juq neq
naq gaiq maq meeq nail phaq
gaiq lal nail bhai maq gee sil ail.
Aqyu juq Heeqphaq Miqyail bhai
neema thaq tsaol khi ivq dao dai jiav nail ngaol.
8 Aqyu juq neq, neema ivq dao dai jiav khi
gee sil nail phaq maq jiav ail.
Aqyu juq-ai neejiav jiav nail juq
sunq ail nail bhai ya moel nail ngaol.
9 Aqyu juq neq
haq nail aoq nail tsaol-aq juq bhai
neema kev nail lavqkhoel, aqnieivq ail bivq khi
tsaq nail daol nail phaq
khaq mao iqsanl ivq nail ngaol.
Al ovqtavq, aqyu juq neq
bhaqaoq eeq khi, ev nail bhai ya daq nail ngaol.
10 Haq eiv nail tsaol-aq juq neq
ganl al bhai ya moel-u phao
neema phail lal bhiq-a nail lavqkhoel nee
aqhaoq keivq thaiq khi, ail peivq ail boev nail ngaol.
Aqyu juq-i mail
noeq thunq-ai thaq nail phaq iqsanl
aqnieivq-ail peivq ail gil-a nail ngaol.