Tsiq eeq 97
Eeq jaiq nail Heeqphaq pevq nail Miqyail
1 Heeqphaq Miqyail uv thaiq nail ngaol.
Miltsaq yaq juq iqsanl mail
lavqkhiq tsail dei-eiq.
Iqyaq iqma nail daolbhaq bhai
jaol nail juq iqsanl mail lavqkhiq tsail dei-eiq.
2 Nqdil khi mail nav tsee deel phaq neq
aivq bhai jaol jaoq-ai thaq nail ngaol.
Aivq-i mail uv thaiq nail phaq neq
daol coev deel phaq-i mail
daoqthaoq thaoq-ai thaq nail ngaol.
3 Miqjaq neq, aivq nail sivtavq phao ail khi
neejiav jiav nail juq bhai poiv ha gil nail ngaol.
4 Aivq nail nqmeivq nail aqbhaq neq
miltsaq bhai bhaq nail ngaol.
Al bhai ya moel-u phao
miltsaq yaq juq gee sil khi
aqjuq juq nail ngaol.
5 Miltsaq iqsanl bhai
uv thaiq nail gaq pevq nail
Heeqphaq Miqyail nail sivtavq bhai
gaoqjaoq juq neq, bhaiq haoq khe-ai
phaq gil lai nail ngaol.
6 Nqtavq neq
aivq tsaq nail daol nail ganl bhai ge gaiq bhiq khi
tsaol-aq yaq iqsanl mail
aivq nail seiqleiq khaoqsail bhai ya moel nail ngaol.
7 Thaoq phaoq aqma maolkhoel bhai
uqhuq thaoq nail juq iqsanl mail
ya haq sil nail ngaol.
Aqyu juq neq
ganl maq tsoiq nail miqyail juq bhai
neema eeq nail ngaol.
Thail hai ngaol-aoq, miqyail juq iqsanl mail
Heeqphaq Miqyail nail sivtavq bhai
ya gaol beiv gil nail ngaol.
8 Heeqphaq Miqyail-ol
naoq-i mail yalkhaq dal nail phaq bhai
Yeiq lul saiq laiq meenq yaq juq gaiq khi
lavqkhiq tsail nail ngaol.
Yuldav milkhaoq bhai jiav nail
meenq juq iqsanl lavqkhiq tsail nail ngaol.
9 Khul khi mail dai ngal-aq
Heeqphaq Miqyail-ol, naol neq
miltsaq kovtavq bhai
eeq jaiq heel jaiq nail gaq pevq nail ngaol.
Yu nail miqyail juq nee maq tsil
uv thaiq nail bhaqaoq iqsanl eeq nail ngaol.
10 Heeqphaq Miqyail bhai gaiq-a nail juq-ol
haqeiv nail phaq bhai bhe yaoq.
Aivq neq, aivq nail tsaol-aq juq nail doevqyeel bhai
hel daiq phail bhiq khi
haqeiv nail tsaol-aq juq nail aqlavq nee iqsanl
hevq kovq bhiq nail ngaol.
11 Aq bhaq bhaq nail phaq neq
tsaq nail daol nail juq nail
kovtavq bhai jiav khi
lavqkhiq tsail nail phaq neq
neema aq see aqdaol juq nail
kovq tavq bhai jiav nail ngaol.
12 Tsaq nail daol nail tsaol-aq juq-ol
Heeqphaq Miqyail nail lavqkhoel bhai
lavqkhiq tsail khi
aivq nail meeq nail haol nail
aqmil bhai tsiq eeq yaoq.