Tsiq eeq 96
Miqyail juq iqsanl nail kovtavq bhai Heeqphaq pevq nail Miqyail
1 Heeqphaq Miqyail bhai
daoqsel aqsivq gul bhiq yaoq.
Miltsaq yaq iqsanl mail, daoqsel gul khi
Heeqphaq Miqyail bhai tsiq eeq yaoq.
2 Heeqphaq Miqyail bhai daoqsel gul bhiq yaoq.
Aivq nail aqmil bhai tsiq eeq yaoq.
Aivq-i mail hevq kovq lavq nail
lavqkhiq tsail nail geeqlaoq daoq bhai
yaoq n yaoq n nee ge gaiq bhiq yaoq.
3 Jeq-e jaq-a juq iqsanl bhai
aivq nail seiqleiq khaoqsail maqkhaiq
tsaol-aq yaq juq iqsanl bhai
aivq-i mail noeq-u maq dov nail phaq
nl-ai thaq nail juq maqkhaiq
ge gaiq ge moel bhiq yaoq.
4 Heeqphaq Miqyail neq
eeq dee heel dee dee nail gaq pevq khi
tsiq eeq geel-nvq dee dee
heeq phaq-ail tsaq nail ngaol.
Aivq neq, miqyail juq iqsanl nee maq tsil
gee sil khi ev heeq phaq-ail tsaq nail gaq ngaol.
5 Yu nail jeq-e jaq-a nail miqyail juq neq
maolkhoel teevq-eel ngaol.
Thail hai ngaol-aoq, Heeqphaq Miqyail neq
nqtavq teivq-a nail ngaol.
6 Seiq leiq khaoqsail
aivq nail teevq jaoq jiav nail ngaol.
Al ovqtavq
bhaqaoq khi mail meeq nail jaq nail phaq iqsanl
aivq nail uqhuq thaoq nail ilkhaol il ma bhai
teevq bhee jiav nail ngaol.
7 Miltsaq kovtavq bhai jaol nail
tsaol-aq juq iqsanl mail
Heeqphaq Miqyail bhai tsiq eeq tsiq heel yaoq.
Aivq nail bhaqaoq seiqleiq khaoqsail bhai
tsiq eeq tsiq heel yaoq.
8 Heeqphaq Miqyail bhai geel-nvq nail khe-ai
seiqleiq khaoqsail bivq dei-eiq.
Laol bhiq nail phaq oil khi
aivq nail uqhuq thaoq nail ilkhaol nail
khainl lavqkhoel bhai aol lai yaoq.
9 Heeqphaq Miqyail nail meeq nail haol nail phaq
seiqleiq khaoqsail eeq nail ngel-i mail
aivq bhai uqhuq thaoq yaoq.
Miltsaq yaq juq iqsanl mail
aivq nail sivtavq bhai gee sil khi aqjuq juq yaoq.
10 Jeq-e jaq-a juq iqsanl bhai
"Heeqphaq Miqyail uv thaiq nail ngaol" dai
ge gaiq bhiq yaoq.
Aivq neq, miltsaq bhai
ivq dao dai bhi ivq khi
maq ngaoq luv kivq ail.
Al ovqtavq, tsaol-aq yaq iqsanl bhai
tsaq nail daol nail lavqkhoel nee
yalkhaq dal nail ngaol.
11 Nqtavq khi mail miltsaq lavqkhiq tsail dei-eiq.
Iqyaq iqma khi mail
al nail lavqkhoel bhai jaol nail juq iqsanl mail
aqthel aqkav kav dai gul dei-eiq.
12 Dai khaoq khi mail al nail lavqkhoel khe
khal jaol nail juq iqsanl mail
lavqkhiq tsail dei-eiq.
Haqtsoiq bhai doevq nail
aqbhaol juq iqsanl mail
lavqkhiq tsail khi gul dei-eiq.
13 Heeqphaq Miqyail nail sivtavq bhai
al hai nl dei-eiq.
Khul khi mail dai ngal-aq, aivq neq
miltsaq yaq juq bhai yalkhaq dal nail dai khi
yavq kha lee-a nail ngaol.
Aivq neq, miltsaq yaq juq bhai
tsaq nail daol nail phaq-i mail yalkhaq dal khi
jeq-e jaq-a juq bhai iqsanl
maldil tsaq nail phaq-i mail
yalkhaq dal nail ngaol.