Tsiq eeq 94
Tsaol-aq yaq iqsanl bhai yalkhaq dal nail Heeqphaq Miqyail
1 Heeqphaq Miqyail-ol, naol neq
nl kovq bhiq nail gaq pevq nail ngaol.
Nl kovq bhiq nail Miqyail-ol
naoq nail aqbhaq bhi bhaq lee yaoq.
2 Iq sanl bhai yalkhaq dal nail gaq-ol, thul lal yaoq.
Neema eeq nail heel nail juq bhai
geel-nvq nail khe-ai, yalkhaq dal bhiq yaoq.
3 Heeqphaq Miqyail-ol, khaq mao kev dai
haqeiv nail tsaol-aq juq bhai
lavqkhiq tsail tsail ail bhi jaol-ai haq nail-aiq.
Khaq mao kev dai, bhi jaol nail-aiq.
4 Aqyu juq neq, khaq mao kev dai
neema eeq daoq bhi ge-ai haq nail-aiq.
Haq eiv nail tsaol-aq juq iqsanl mail
neema eeq nail daoq teevq bhee aol nail ngaol.
5 Heeqphaq Miqyail-ol
aqyu juq neq, naoq nail tsaol-aq juq bhai
naoq peiv naoq leiv bhiq khi
naoq nail jeq-e jaq-a juq bhai
khoeq bhiq jiovq bhiq nail ngaol.
6 Aqyu juq neq
miqtsiq miqma juq khi mail
aqbhu aqma maq bhao nail juq bhai heivq khi
nv juq nail milkhaoq bhai jaol nail
daq-i juq bhai iqsanl, heivq nail ngaol.
7 Aqyu juq niail hai ge nail ngaol:
''Heeqphaq Miqyail nv juq bhai maq moel nia ail.
Yaqkov nail Miqyail neq maq hel daiq ail'' dai
ge nail ngaol.
8 Yaq jaoq khaq lal miq thoiq juq-ol
saol-nvq daiq yaoq.
Khaq mao aqgeel geel lal nail-aiq.
9 Ngadao nail naq kov bhai teivq lavq-a nail gaq neq
maq gaiq nia ail laiq.
Ngadao nail maivneev bhai
teivq lavq-a nail gaq neq, maq moel nia ail laiq.
10 Yu nail jeq-e jaq-a iqsanl bhai
khoeq bhiq jiovq bhiq nail gaq neq
nul juq bhai iqsanl
khoeq lavq jiovq lavq nail maq ngel ail laiq.
Tsaol-aq yaq iqsanl bhai
neenoeq neekha saol bhiq nail gaq neq
neenoeq neekha aol nail gaq maq ngel ail laiq.
11 Aqyu juq-i mail
noeq thaq-ai thaq nail phaq bhai
Heeqphaq Miqyail heeq nia nail ngaol.
Aqyu juq-i mail noeq nail phaq neq
aqnieivq ngaol dai, aivq heeq nia nail ngaol.
12 Heeqphaq Miqyail-ol
naoq-i mail saol bhiq khi
aolthaq kovqthaq cavq bhiq cov bhiq nail bhai
ya daq-a nail juq neq
geeqlaoq eeq nail ngaol.
13 Tsaol-aq al juq
haqeiv nail tsaol-aq juq bhai
bhi ga bhoel ail nail haqbhoil
khaq duq maq duq gaq dan-u kev dai
haq nail aoq nail phaq ya jel-ail dai
naol aivq bhai hel daiq phail bhiq nail ngaol.
14 Khul khi mail dai ngal-aq
Heeqphaq Miqyail neq
aivq nail tsaol-aq juq bhai maq khaonq ha ail.
Aivq nail jeq-e jaq-a juq bhai iqsanl
haoqnaol naol kovq maq kovq bhiq ail.
15 Aq tsaq aqdaol daol dai yalkhaq dal nail phaq
teevq pov gaoq jiav lal nail ngaol.
Neema aq see aqdaol daol nail juq iqsanl mail
al nail haoqnao tsao the nail ngaol.
16 Khaq sil gaq ngal jaol nail phao thul phaol khi
haqeiv nail tsaol-aq juq bhai lav tsoiq nail-aiq.
Khaq sil gaq ngaq-ai phao phaoq khi
aqdoil phaq nl nail juq bhai lav tsoiq nail-aiq.
17 Mal dil Heeqphaq Miqyail ngaq bhai
maq tsao jao-ai lavq-al kheel nul-uq
ngal lavqtsail mail luqdaol bhai ya sil ail nail ngaol.
18 Heeqphaq Miqyail-ol
ngal aqkhil naoq gaoq khi
ga tsuq ail-aoq nial dai, noeq-u phao
naoq-i mail gaoq haq goil gaiq-a nail phaq
ngaq bhai tsiq thul lavq-a nail ngaol.
19 Ngal neema lavqkhoel bhai khaoq laol-u phao
naol ngaq bhai nee sal bhi ya lavq-a nail ngel-i mail
lavqkhiq tsail lal-a nail ngaol.
20 Maq tsaq maq daol dai uv thaiq nail juq neq
"Miqyail nv juq phao jaol naol" dai
ge nia naol laiq.
Aqyu juq nail aol juq neq
goiqbhaoq bhaoq nail phaq bhee nail ngaol.
21 Aqyu juq neq
tsaq nail daol nail juq bhai lav tsoiq khi
oeqbal maq aol nail juq bhai iqsanl
sil nail bha kev dai, yalkhaq dal bhiq nail ngaol.
22 Thail hai ngaol-aoq, Heeqphaq Miqyail neq
ngaq nail haqbhoil
ivq nail tsao-uvq duq pevq nail ngaol.
Ngaq nail Miqyail neq
hel daiq phail lavq nail lovphail pevq nail ngaol.
23 Miqyail neq
aqyu juq-i mail nl-a nail
haqeiv nail phaq bhai nl kovq bhiq khi
aqyu juq nail oeqbal bhaq da nee
aqyu juq bhai lav luq lav seil bhiq nail ngaol.
Ngadao nail Heeqphaq Miqyail
maldil lav luq lav seil bhiq nail ngaol.