Tsiq eeq 14
Tsaol-aq yaq maq meeq maq jaq nail ganl
1 Yaq jaoq khaq lal miq thoi juq neq,
neema lavqkhoel nee
“Miqyail maq jaol ail” dai, ge nail ngaol.
Aqyu juq nail neema lavqkhoel bhai
bhi luq bhi seil ail nail phaq teevq bhee aol khi
aq jiiv aq cavq phaq nl thail thaiq nail ngaol.
Aqmeeq phaq nl nail teevq gaq ail maq jaol ail.
2 Miltsaq tsaol-aq yaq juq nail lavqkhoel
neenoeq neekha aol khi
aivq bhai hal pov nail juq jaol naol laiq dai
Heeqphaq Miqyail neq
nqtavq kovtavq nee
hel daiq thail thaiq nail ngaol.
3 Iqsanl mail gailkhaol
gail bheeq bheeq gil ail khi
teevq gaq khe-ai
bhi luq bhi seil ail nail phaq
nl nail nee ovqtavq
aqmeeq phaq nl nail gaq maq jaol ail.
Teevq gaq iqsanl maq jaol ail.
4 Haq eiv nail phaq nl nail tsaol-aq al juq
khul teevq phaq ail maq heeq nia ail laiq.
Ngaq nail tsaol-aq juq bhai
khaqmul jaq nail khe-ai
tsai gaq tsai dav dav khi
Heeqphaq Miqyail bhai iqsanl maq khul ail.
5 Thail hai ngaol-aoq
aqyu juq ya tsaoq deel-nq ail nail ngaol.
Khul khi mail dai ngal-aq
tsaq nail daol nail tsaol-aq juq phao
Heeqphaq Miqyail jaol nail ngaol.
6 Haq eiv nail tsaol-aq
neema nee nuq nee beiv aol nail juq bhai
lav tsoiq movq khi ngaol-aoq
aqyu juq bhai
Heeqphaq Miqyail hel daiq phail nail ngaol.
7 Ilsaqleiqlav bhai hevq kovq nail gaq
Yeel ovq gaoqjaoq nee lee dei-eiq.
Aqyu juq gaoq doevq jaq lal dai
Heeqphaq Miqyail tsao jao-ai bhiq-u phao
Yaqkov nail jeq-e jaq-a
lavqkhiq tsail dee dee khi
Ilsaqleiqlav nail tsaol-aq iqsanl
lavqkhiq tsail dee dee nail ngaol.