Sapa yang paleng basar
18:1-5
18
1 Waktu itu, Yesus pung murid-murid datang par Antua la tanya kata, “Tuang Guru e, waktu Allah pegang parenta jadi Raja, sapa yang paleng basar dari Allah pung orang-orang samua?”*2 Tarus, Antua panggel ana kacil satu la taru dia di tenga-tenga dong, 3 la bilang kata, “Dengar bae-bae tagal apa yang Beta bilang ni batul! Kalo kamong seng roba kamong pung hidop deng seng biking diri macang deng ana kacil, jang harap kamong bisa jadi Allah pung orang-orang waktu Antua pegang parenta jadi Raja.* 4 La sapa yang biking diri seng pung arti apapa macang deng ana kacil ni, dia nanti jadi yang paleng basar dari Allah pung orang-orang samua, waktu Allah pegang parenta jadi Raja. 5 Deng kalo orang yang parcaya Beta tarima satu dari orang-orang yang seng pung arti apapa macang deng ana kacil ni, itu dia su tarima Beta.”
Jang biking orang jatu dalang dosa
18:6-9
6 Yesus bilang par dong lai kata, “Mar sapa yang biking sampe satu dari orang-orang yang seng pung arti apapa macang deng ana kacil yang parcaya Beta ni jatu dalang dosa, dia nanti dapa hukum barát dari Allah. Masi labe bae par dia kalo dia pung leher dapa ika deng batu basar la dapa kasi tinggalang dalang aer masing kadalang daripada dia biking bagitu. 7 Cilaka orang-orang di dunya, tagal ada hal-hal yang biking sampe orang jatu dalang dosa! Memang hal-hal itu salalu ada, mar cilaka orang yang biking hal-hal itu, sampe orang laeng jatu dalang dosa, tagal Allah nanti hukum dia paleng barát paskali.
8 Jadi, kalo kamong pung tangang ka kaki biking kamong bardosa, potong la buang akang. Tagal labe bae kamong maso sorga deng tangang ka kaki sabala, daripada musti dapa buang deng tangang ka kaki dua-dua dalang naraka, tampa api manyala tarus-tarus.* 9 Deng kalo kamong pung mata biking kamong bardosa, cungkel la buang akang! Tagal labe bae kamong maso sorga deng mata sabala, daripada musti dapa buang deng mata dua-dua dalang api naraka.”*
Ande-ande soal domba yang ilang
18:10-14
10 Yesus bilang lai kata, “Ingatang! Jang anggap enteng orang-orang yang seng pung arti apapa macang deng ana kacil ni. Satu jua jang! Tagal Beta bilang par kamong: Ada dong pung malekat yang salalu badiri di muka Beta pung Bapa di sorga. 11 [Barang, Beta Ana Manusia ni datang par kasi salamat orang-orang yang ilang jalang.]
12 Kalo satu orang ada pung domba saratus ekor la satu ekor ilang, dia pasti kasi tinggal yang sambilang pulu sambilang tu di gunung la pi cari satu yang ilang tu to? 13 Dengar bae-bae tagal apa yang Beta bilang ni batul! Kalo dia su dapa domba yang ilang tu, dia pung hati labe sanang par akang dari par sambilang pulu sambilang ekor yang seng ilang tu. 14 Bagitu lai deng kamong pung Bapa di sorga. Antua seng inging satu lai dari orang-orang yang seng pung arti apapa macang deng ana kacil ni ilang jalang.”
Cara kasi bicara par basudara yang biking sala
18:15-20
15 Yesus bilang lai, “Kalo kamong pung sudara yang parcaya biking sala par kamong, kamong musti bicara ampa mata deng dia par kasi tau dia pung sala. La kalo dia dengar kamong, itu pung arti kamong su bale dapa dia kombali.* 16 Mar kalo dia seng mau dengar, bale par dia deng satu dua orang sudara yang parcaya lai par jadi saksi, biar deng dua ka tiga saksi yang bilang hal yang sama, parkara tu jadi jelas.* 17 Mar kalo dia seng mau dengar dong lai, kasi tau parkara tu par jamaat. La kalo dia jua seng mau dengar jamaat pung nasehat lai, anggap dia tu macang deng orang yang seng kanal Allah ka orang bardosa macang deng tukang tagi pajak.
18 Dengar bae-bae tagal apa yang Beta bilang ni batul! Apa yang kamong larang di dunya ni, Allah di sorga jua larang akang lai. Deng apa yang kamong mau orang biking di dunya ni, Allah di sorga jua kasi ijin akang lai.* 19 Beta bilang lai par kamong! Di dunya ni, kalo ada dua orang dari kamong satu hati par minta apa sa, Beta pung Bapa di sorga pasti kasi akang par dong. 20 Barang, kalo ada dua ka tiga orang yang parcaya Beta bakumpul sama-sama, Beta ada sama-sama deng dong.”
Orang-orang parcaya musti kasi ampong orang yang biking sala par dong
18:21-35
21 Abis itu, Petrus datang par Yesus la tanya Antua kata, “Tuang Guru e! Kalo beta pung basudara yang parcaya biking sala par beta, beta musti kasi ampong dia barapa kali? Tuju kali?”
22 Antua jawab dia kata, “Dengar Beta bilang par kamong: Bukang tuju kali, mar tuju pulu kali tuju kali.* 23 Kamong musti biking bagitu, tagal Allah pegang parenta jadi Raja tu sama deng ande-ande satu ni:
Satu kali bagini, ada raja satu yang mau rekeng dia pung orang-orang karja pung utang-utang samua. 24 Waktu dia mulai rekeng akang, ada orang karja satu yang bautang banya paskali.a Dia dapa bawa ka muka raja. 25 Tagal dia seng kuat bayar akang, raja kasi parenta par jual dia lapis deng dia pung bini, anana, deng dia pung harta samua par bayar dia pung utang-utang tu. 26 Pas dengar bagitu, orang karja tu langsung tikang lutu di muka raja tu la minta deng sunggu-sunggu kata, ‘Sio bapa raja e! Kasi waktu par beta sadiki jua biar beta bisa bayar beta pung utang-utang samua.’ 27 La raja rasa kasiang paskali par orang karja tu la kasi lapas dia deng hapus dia pung utang-utang.
28 Mar waktu orang karja tu kaluar, dia baku dapa deng raja pung orang karja laeng, yang bautang sadiki paskalib di dia, kalo banding akang deng dia pung utang di raja. Tarus, dia hela la caka dia pung tamang tu la bilang kata, ‘He! Bayar se pung utang kamari!’
29 Dia pung tamang tu tikang lutu di muka dia la bilang kata, ‘Sio tamang e! Kasi waktu par beta sadiki jua biar beta bisa bayar beta pung utang tu.’ 30 Mar dia seng mau tarima apa yang dia pung tamang tu bilang. Mala dia kasi maso dia pung tamang tu dalang bui sampe tamang tu bayar dia pung utang do.
31 Waktu raja pung orang-orang karja laeng lia apa yang su jadi tu, dong pung hati susa la pi kasi tau samua yang jadi tu par bapa raja. 32 Tarus, bapa raja suru panggel dia la bilang par dia kata, ‘Hoe orang karja jahat e! Beta su hapus se pung utang-utang samua tagal se minta beta kasiang se. 33 Jadi, mangapa kong se seng kasiang se pung tamang tu macang deng beta su kasiang se?’
34 Raja tu paleng mara paskali la kasi dia par orang yang jaga bui par siksa dia sampe dia kasi lunas dia pung utang-utang samua.”
35 La Yesus bilang kata, “Jadi, Beta pung Bapa di sorga jua nanti biking par kamong macang deng apa yang raja tu biking par orang karja yang jahat tu, kalo kamong seng mau kasi ampong kamong pung basudara deng hati antero-antero.”