Jang biking orang jatu dalang dosa
17:1-4
17
1 La Yesus bilang par Antua pung murid-murid kata, “Salalu sa ada hal-hal yang biking sampe orang jatu dalang dosa! Mar cilaka orang yang biking hal-hal itu, sampe orang laeng jatu dalang dosa, tagal Allah nanti hukum dia paleng barát paskali.* 2 Masi labe bae par dia kalo dia pung leher dapa ika deng batu basar la dapa lempar dalang aer masing daripada biking sampe satu dari orang-orang yang parcaya Beta ni jatu dalang dosa. 3 Jadi, jaga kamong pung diri bae-bae!Kalo ale pung basudara yang parcaya ada biking sala par kamong, tagor dia. La kalo dia minta ampong, kasi ampong dia. 4 Mala kalo dia biking sala par ale tuju kali dalang satu hari la tuju kali dia datang minta ampong dari ale, ale musti kasi ampong dia tuju kali lai.”*
Parcaya Allah
17:5-6
5 La Yesus pung utusang sapulu dua orang tu bilang kata, “Tuang Guru e, bantu katong par labe tamba parcaya lai!”
6 La Tuhan Yesus bilang kata, “Kalo kamong ada pung parcaya par Allah, biar kata kacil sa macang deng biji yang paleng kacil, kamong bisa bilang par pohong ara ni, ‘He pohong! Tacabu la pinda ka lautang!’ La akang nanti pinda.”
Karja sunggu-sunggu par Allah
17:7-10
7 Yesus bilang lai kata, “Kalo kamong pung jongos baru pulang dari kabong ka jaga domba, sapa dari kamong yang bilang par dia, ‘Mari makang sama-sama’? Seng ada to? 8 Mala dia nanti bilang par jongos tu kata, ‘Kasi siap beta pung makanang! Baganti pakiang barsi la badiri tunggu sampe beta abis makang deng minong do, baru ose makang!’ 9 Kira-kira, waktu bos tu su abis makang, dia minta dangke dari jongos tu? Seng to? Barang, jongos tu cuma biking apa yang dia pung bos suru sa. 10 Bagitu lai deng kamong. Kalo kamong su abis biking Allah pung parenta samua, kamong musti bilang, ‘Katong ni cuma jongos sa! Seng pantas Allah minta dangke dari katong, tagal katong cuma biking apa yang katong musti biking.’ ”
Yesus kasi bae sapulu orang yang saki lepra
17:11-19
11 Waktu Yesus bajalang ka kota Yerusalem, Antua langgar di propinsi Samaria deng propinsi Galilea pung sipat. 12 Waktu Antua sampe di kampong satu, sapulu orang yang saki lepra datang par Antua, mar dong badiri jau-jau sa. 13 Dong bataria, “Yesus! Tuang Guru e! Kasi unju Tuang Guru pung hati bae par katong jua!”
14 La Antua lia dong la bilang kata, “Pi par imam-imam biar dong bisa lia kalo kamong su bae!”a
Abis dengar bagitu, dong pi. Waktu dong ada di tenga jalang, skrek bagini, dong pung panyaki tu ilang. Dong samua su bae.
15 Satu dari dong tu, waktu lia kalo dia su bae, dia bale par Yesus la puji-puji Allah deng suara basar. 16 Tarus, dia tikang lutu di muka Yesus pung kaki la minta dangke dari Antua. Dia tu orang Samaria, bukang orang Yahudi.
17 La Yesus bilang kata, “Beta su kasi bae dong sapulu to? La mana sambilang yang laeng tu? 18 Mangapa kong dong seng bale par puji-puji Allah, cuma orang dagang ni sa?”
19 La Antua bilang par orang Samaria tu kata, “Badiri! Pi jua! Tagal ale parcaya Beta, ale su bae.”
Yesus, Orang yang Datang dari Allah nanti bale kombali
17:20-37
20 Satu kali bagini, babarapa orang dari kalompok Farisi tanya Yesus kata, “Tuang Guru, apa tempo Allah datang pegang parenta jadi Raja?”
Yesus jawab dong kata, “Waktu Allah datang pegang parenta jadi Raja, akang seng mulai deng tanda-tanda yang kamong bisa lia deng kamong pung mata kapala sandiri. 21 Jadi, orang nanti seng bisa bilang, ‘He mari lia do! Antua ada pegang parenta di tampa ni.’ Ka, ‘He, Antua ada pegang parenta di tampa tu.’ Barang, Allah su mulai pegang parenta jadi Raja dalang orang pung hati.”
22 Abis itu, Yesus bilang par Antua pung murid-murid kata, “Satu waktu, kamong nanti inging paskali par lia Beta Ana Manusia ni biar kata cuma satu hari sa. Mar, kamong seng bisa. 23 La orang nanti bilang par kamong kata, ‘He, Antua ada di sini!’ ka ‘He, Antua ada di situ!’ Mar, jang kamong parcaya dong, ka pi ka tampa yang dong bilang tu. 24 Barang kalo Beta Ana Manusia ni bale kombali ka dunya, samua orang nanti tau. Itu sama deng kilat yang tapancar di ujung langit satu bisa dapa lia di ujung langit laeng. 25 Mar, Beta musti pikol macang-macang sangsara deng seng dapa tarima dari orang-orang yang hidop sakarang ni do, baru Beta nanti bale kombali.
26 Apa yang jadi di dunya waktu Beta Ana Manusia ni bale kombali, akang sama deng apa yang jadi dolo di jamang Nuh.* 27 Waktu itu, orang-orang seng pastiu deng Allah. Dong tinggal kong makang-minong deng kaweng macang biasa sa, sampe waktu Nuh maso kapal, la skrek bagini banjir basar datang la kasi binasa samua orang yang ada di luar.* 28 Akang jua sama deng apa yang jadi dolo di jamang Lot. Waktu itu, orang-orang seng pastiu deng Allah. Dong tinggal kong makang-minong, jual-bali, biking kabong, deng biking ruma macang biasa sa. 29 Mar, waktu Lot pi kasi tinggal kota Sodom, skrek bagini ujang api deng walirang turung dari langit la kasi binasa dong samua di kota tu.*
30 Waktu Beta Ana Manusia ni bale kombali ka dunya, orang-orang di dunya hidop macang bagitu lai. 31 Hari itu, sapa yang ada di teras ruma,b jang maso ambe barang-barang lai, mar langsung lari sa. Bagitu lai, sapa yang ada di kabong, jang pulang ambe apapa lai.* 32 Inga apa yang jadi deng Lot pung bini tu!c
33 Sapa yang usaha par kasi salamat dia pung diri, dia seng bisa hidop tarus-tarus deng Allah. Mar sapa yang siap mati tagal iko Beta, dia nanti hidop tarus-tarus deng Allah.*
34 Dengar Beta bilang par kamong. Waktu Beta bale kombali ka dunya, dari dua orang yang ada di satu tampa tidor, satu nanti dapa angka mar satu lai dapa kasi tinggal. 35 Dari dua parampuang yang ada giling gandum sama-sama, satu nanti dapa angka mar satu lai dapa kasi tinggal. [ 36 Dari dua laki-laki yang ada di kabong, satu nanti dapa angka mar satu lai dapa kasi tinggal.]”
37 Waktu Yesus pung murid-murid dengar bagitu, dong tanya Antua, “Tuhan e, Tuhan nanti bale di sabala mana?”
La Yesus bilang par dong kata, “Kalo Beta bale kombali ka dunya, samua orang nanti tau. Itu sama deng orang biasa bilang, ‘Kalo lia burung makang bangke bakumpul, pasti ada bangke di situ.’ ”