John
Thupatna
Lungdamna thu a lina zong, Jesu’ it nungzuipa a kici nungzuipi sawmlenih lakah khat ahi John’ gelh ahi hi. Jesu Christ Pasian Tapa hi a, ama min umin nuntakna na neih nadingin AD 90-100 kikal huna hih lungdamna thu a gelh ahi hi. (John 20:31)
John laibu in Jesu nuntakzia le Jesu Christ nasepna a gelh hangin lungdamna-thu bu thumte tawh kilamdang mahmah hi. Lungdamna thu bu dangte a kigen lo nalamdang nga John in na gen hi. Lungdamna-thu bu danga kigen na lamdangte lakah nih bek John in pulak hi. Hih laibu sungah gentehna kihel lo-a Jesu le mimal kithuahna limgen deuh hi.
Hih lungdamna thubu in limte, lungdamna thubu danga nalamdang a cihte pulak zaw hi. John in a gen limte in Christ pen Pasian hihna le kha vangliatna a neih lam kitelsak hi. John in Jesu pen Pasian Tapa a hihna tampitak a gen hangin Jesu pen mihing hi mahmah hi cihna amah gim thei, dah thei, gilkial thei in it thei hi, ci-in ciantakin gengen hi.
Athute tomlahna
Thupatna le a bulphuh thu (1:1-18)
Jesu a kipulakna (1:19-4:54)
Pasian’ Tapa banga Jesu sepna (5:1-10:42)
Jerusalem a lauhuaina (11:1-12:50)
Jesu le nungzuipite (13:1-17:26)
Bawlsiatna, sihna le kivuina (18:1-19:42)
Thawhkikna le thukhupna (20:1-21:25)