Kham Meivak Tunna le Olive Kung Nih
4
1 Tua ciangin kei hong hopih van sawltak hong kileh kika a ihmu mi khat phot bangin kei hong phong hi. 2 Tua ciangin, "Bang na mu hiam?," ci-in kei hong dong hi."Kham citak tawh kibawl meivak tunna, a dawnah kuangkum khat kithuahin meivak khau sagih dawnah meivak sagih ka mu hi. 3 Tua kiangah olive kung nih zong om a, khat kuangkum taklam pangah omin adang khat a veilam pangah a om hi," ci-in ka dawng hi.
4 Kei hong hopih vansawltak kiangah, "Ka topa aw, hihte bang hiam?" ci-in ka dong hi.
5 Amah in, "Hihte bang hiam cih thei lo na hiam?" ci-in hong dawng hi.
"Topa aw, thei keng," ci-in ka dawng hi.
6 Tua ciangin amah in kei kiangah, "Hih in Zerubbabel tunga tung TOPA thu ahi hi: Thahatna hi lo, vangliatna zong hi loin keima Kha hang ahi hi,’ Thahatpen TOPA in ci hi.
7 "A thahat mualliante aw, no bang aa na hi uh hiam? Zerubbabel mai-ah zangtam na suak ding uh hi. Tua ciangin, "Pasian in thupha pia ei! Pasian in thupha pia ei! " ci-a ot na tawh inn tungkhupna suang a puakhia ding hi,’ ci in," a ci hi.
8 Tua ciangin TOPA thu kei tungah hong tunga: 9 Zerubbabel khut in hih biakinnpi bulpi phut khin hi; ama khut mah in a zosiang ding hi. Tua ciangin Thahatpen TOPA in note tungah kei hong sawl ahilam na thei ding uh hi.
10 Kua in a neu nate’ ni simmawh ahi hiam? Mite in Zerubbabel khuta khaukhai a muh ciangin a nuam ding uh hi.
"(Hih sagihte, leitung khempeuh a en TOPA mittangte ahi uh hi,)" a ci hi.
11 Tua ciangin vansawltak kiangah, "Hih meivak tunna veilam le taklama olive kung nihte bang ahi hiam?" ci-in ka dong hi.
12 Ama kiangah, "Kham sathau luankhiatna kham penglawngte gel gei-a hih olive kung nihte bang ahi hiam?" ci-in ka dotbeh hi.
13 Amah in, "Hihte bang ahi hiam cih thei lo na hi hiam?" ci-in hong dawng hi.
"Thei keng, topa aw," ka ci hi.
14 Tua ciangin amah in, "Hihte gel in leitung khempeuh’ Topa nasem dinga sathau kinilhte bb ahi uh hi," hong ci hi.