Habakkuk
1
1 Kamsang Habakkuk ngah thusuak.Habakkuk Phunna
2 TOPA aw, ken nong huh ding bangtan vei hong ngenin,
nang hong za lo lailai ding na hi hiam?
Ahikeh, "Ngongtatna" ci-a kong kiko hangin
hong hon lo na hi hiam?
3 Bang hangin thutanglohnate hong musak na hi hiam?
Bang hangin thukhial thuak keikai na hi hiam?
Siatna le ngongtatna ka maingat hi.
Kitotna le kilangneihna in hong umcih hi.
4 Tua ahi ciangin thukham in thu nei nawn loin
thumaanna a tungnung ngei kei hi.
Thutang a kikawnghek theih nadingin
migilote in thumaan mite a umcih uh hi.
TOPA’ Dawnna
5 "Minamte enin vil dih un -
lamdang na sa mahmah ding uh hi.
Ahang in, note tungah hong kigen taleh
na uploh ding uh thu,
no hunin kong tungsak ding hi.
6 A cikzia lo, a hiamgamh mi Babylon-te aa ka tawisang dinga,
amaute in leitung khempeuh zo khinin
amau aa ahi lo mite tenna munte nangawn
a laksak ding uh hi.
7 Amaute kihtak huai-in a mulkimhuai mi hi uh a,
amau mah thukham hipahin
amau kipahtawina a thupisak uh hi.
8 A sakolte uh gialbem sangin manlangzaw a,
khuamial kuana keivom sangin kihtakhuai zaw hi.
A sakol tuangte uh gamlapi panin hong kipan uh a,
a sakolte un a khecin uh phutin a kop dian uh hi.
Amaute, sa ne dinga bawhsuk musane lengte tawh kibang uh hi,
9 a vekun a ngongtatsa-in a kuan uh hi.
Sehnel-gama huih bangin a sakolte bb un mainawt uh a,
sehnel bangin thongkiate a khawm uh hi.
10 Kumpite ciamnuihbawl uh a,
gam-ukte a selpho uh hi.
Kulh a ki-um khuapite nuihsan uh a,
lei sungvumin laziau uh hi.
11 Tua ciangin huih nung bangin paisuak uh a -
amau hatna pasian-a a nei mikhialte ahi uh hi," ci-in a dawng hi.
Habakkuk Nihveina Phun
12 TOPA aw, mong nei lo hi lo na hi hiam?
Ka Pasian, keima Siangtho Pa, ka si kei ding uh hi.
TOPA aw, kote thukhen dingin amaute na seh hi;
ka Suangpi aw, amaute dan pia dinga na kipsak ahi hi.
13 Gitlohna et nadingin na mitte ciim lua-a,
khialhna na thuak zo kei hi.
Tua ahileh bang hangin a zuautatte thuakzo lai na hi hiam?
Bang hangin migilote in
amaute sanga a thumaanzawte a valhtum laitakun dai hithiat na hi hiam?
14 Nang in tuipi sunga ngasa bangin mite na bawla,
a uk om lo tuipi sunga ganhing bangin na bawl hi.
15 A gilo a galte un a vekun ngathang tawh kaikhia uh a,
a len uh tawh huai khinin,
a domlen un a khawm uh hi;
tuateh amah nuamin a lungdam hi.
16 Tua ahi ciangin a len ah ki-ap a,
a domlen gimnamtui a hal hi;
ahang in, a len uh hangin noptat zo uha,
an a duh bangbang uh a ne uh hi.
17 Amah in minamte lainat het lo a,
susiasia-in a lente hawmsak lailai ding ahi hiam?