10
1 Israel pen lenggui zaam ahi hi;amah mah in gah a gahkhia hi.
A gah a khanna tawh kizui-in
biakna-tau a tamzaw a dawh hi;
a gam a daupaina tawh kizui-in
a suang siangthote a zem hi.
2 Amaute lungsim khemhat a,
tu-in amaute khialhna thaman a thuak ding uh hi.
TOPA in amau biakna-taute phiatmang dinga,
a suang siangthote uh a susia ding hi.
3 Tua ciangin amaute in, "Eite in TOPA kihta lo
i hi manin kumpi i nei kei hi.
Ahi hangin kumpi nei taleng zong
ei adingin bang sem thei ding ahi hiam?" ci ding uh hi.
4 Amaute in kamciam tampi nei uh a,
a maan loin kiciamin
thukimna a bawl uh hi;
tua ahi ciangin lokhawhna-a gunei kiakte bangin
thu kineihna a khangkhia hi.
5 Samaria a teng mite in
Beth Aven aa a bawngno lim a kihta uh hi.
Tua pen amau kiang pan kila in saltang ahi manin
ama thupina nuam a sa mite hangin thum ding uh a,
tua milim bia siampite zong a tuaci ding uh hi.
6 Tua pen Assyria ah
kumpi lianpa adingin siah in kipuak ding hi.
Ephraim maimawl ding hi;
Israel in a sing milimte bb a maizumpih ding hi.
7 Samaria le a kumpipa, tui maitang-a
selkang bangin tui in taimang ding hi.
8 Gitlohna cc munsangte kisusia ding hi -
tua in Israel mawhna ahi hi.
Lingkungte le thangling kungte khangin
a biakna-taute uh a khuh ding hi.
Tua ciangin amaute in mualliante tungah, "Ko hong khuh un’" ci ding uh a,
mualneute tungah, "Ko hong cipnelh un!" ci ding uh hi.
9 Israel aw, Gibeah huna kipan na mawh khin zo a,
tua lai ah na om suak hi. dd
Gibeah-ah gilo-a gamtate
gal in pha lo ahi hiam?
10 Ka lungkim ciangin amaute dan ka tuaksak ding hi;
amaute in mawhna a bawlthuahte uh hangin
a thuaksak dingin amaute langah minamte kikaikhawm ding uh hi.
11 Ephraim in a kisinsa
an cil nuamsa bawngla ahi hi;
tua hi-a, a ngawng hoih ah
hakkol ka suan ding hi.
Ephraim ka hawl dinga
Judah in pelloin kho dinga,
Jacob in leitang a kalkaang pelmawh ding hi.
12 Thumaan note a dingin vawh unla,
a kip tawntung itna at un.
Na leitang sitlaite uh kalkaang un;
ahang in ama hong pai mateng leh
thumaan guahpi hong zuksak mateng
amah TOPA zon hun ahi hi.
13 Ahi hangin gitlohna na suan uh a,
gitlohna atin,
zuauphuahna gah na ne hi.
Nangma thahatna le na galhang tampite tungah
na kingak manin,
14 Shalman in gal do ni-in Beth Arbel vatmai a,
nupite le a tate uh tawh leilak a denna hun lai-a bangin
na kulh muanhuai khempeuh a kiphiat mai nadingin
na mite langkhat ah gal husa a hawk ding hi.
15 Bethel aw, na gitlohna lian ahi manin
tua bangin nang tungah hong tung ding hi.
Tua ni a suah ciangin
Israel kumpipa a kisusia kiuhkeuh ding hi.