Israel Dan Piakna
9
1 Israel aw, lungnuam kei in;minam dangte bangin kipak kei in.
Ahang in, na Pasian tungah na muanhuai kei hi;
ancilna phual citengah
kizuakna thaman na iplah hi.
2 Ancilnate le lengtuisuknate in mihing vak lo ding hi;
tuate zuthak tawh kilawi ding hi.
3 TOPA’ leitangah amaute a omden kei ding uh hi;
Egypt ah Ephraim kileh kik dinga,
Assyria ah an sianglo aa a ne ding uh hi.
4 Amaute in TOPA tungah biakina-in zu sung lo ding uh a,
amau biaknate un zong amah a lungkimsak kei ding hi.
Tua bang biaknate pen amaute tungah a thum mite anlum tawh kibang ding hi;
tuate a ne khempeuh a nin suak ding uh hi.
Hih an amaute ading bek hi a,
TOPA biakinnpi sung a tung kei ding hi.
5 A kisehsa pawi nite le TOPA pawi nite-in
bang hih ding na hi uh hiam?
6 Amaute kisiatna pan a suahtak uh leh zong,
Egypt in amaute khawm dinga,
Memphis in amaute a vui ding hi.
Amaute gou ahi ngunte thanglingte in tuam ding a,
a puanbukte uh lingkung in a tuum ding hi.
7 Dan thuak ding hun tungta a,
gutut kik hun nai mahmah ta hi.
Israel in hih thu thei ta hen.
Na mawhnate tam lua-in,
na migalneihna lian lua ahi manin,
kamsangte a hai-in ngaihsunin
huumuap mipa a lungsim kicing loin ki ngaihsun hi.
8 Tua kamsangpa, ka Pasian tawh
Ephraim bb galvilpa ahi hi;
tua hi napi a lampi tengah thang kisiah a,
ama Pasian inn sungah kigalneihna a om hi;
9 Gibeah hun bangin kisiatna sungah
amaute thukpi a tumsuk khin uh hi.
Pasian in amau gitlohnate ciamtehin,
amau mawhnate hangin dan a tuaksak ding hi.
10 "Israel ka muh ciangin
sehnel-gama kimu lengguite tawh kibang hi;
na pate ka muh ciangin
theikunga a gah masa muh tawh kibang hi.
Ahi hangin amaute Baal Peor ah a pai uh ciangin
a zumhuai tua milim ah ki-ap uh a,
amaute in a iplah uh na bangin a siahuai uh hi.
11 Ephraim minthanna vasa bangin lengmang dinga, -
nausuak, naupaii, a gai kuamah a om kei hi.
12 A tate uh khoi ta le uh,
amaute khempeuh ka khansihsak ding hi.
Amaute ka lehngatsan ciangin
gimna thuak nak thuak na un cia!
13 Tyre bangin Ephraim ka mu khin a,
mun nuam ah kisuan khin hi.
Ahi hangin Ephraim in a tate uh
a that dingte tungah piakhia ding uh hi," a ci hi.
14 TOPA aw, amaute pia in -
amaute bang pia ding na hi hiam?
Amaute tatolh sul le
a zukang nawi pia in.
15 "Gilgal a, a gitlohnate khempeuh uh hangin
tua lai-ah amaute ka mudah hi.
Amaute mawhna a gamtatna uh hangin
keima inn panin ka nawhkhia ding hi.
Amaute ka it nawn kei ding hi;
a makaite khempeuh uh a lehdote ahi uh hi.
16 Ephraim maiibuak a,
a zung keugawin
amaute gah lo uh hi.
Amaute in ta a nei uh zongin
tua amau it luat suanlekhak te ka thatlum ding hi."
17 Amaute in ama thu mang lo uh ahi manin,
ka Pasian in amaute nial hi;
minamte lakah mi vakvaite hi ding uh hi.