Biakinnpi ah Minthanna Ciahkik
43
1 Tua ciangin mipa in nisuahna lam pang a nga kongpi ah kei hong paipih a, 2 nisuahna-lam pana hong tung Israel-te Pasian minthanna ka mu hi. Ama awging tuizeu hawk tawh kibanga a minthanna in leitung a taan hi. 3 Ka mangmuhna pen khuapi a aa suksiat ding lai-a, le Kebar Gunpi gei-a ka muhte tawh kibanga ka khupbawh suk hi. 4 Nisuahna-lam nga kongpi tawnin TOPA minthanna biakinnpi sungah a lut hi. 5 Tua ciangin Kha in kei hong khaangto-in tual sungnungah hong lutpih a, TOPA minthanna biakinnpi a dim hi.6 Mipa ka kiangah a din laitakin biakinnpi sunglam panin mi khat in kei hong hopihna ka za hi. 7 Amah in, "Mihing tapa aw, hih mun ka kumpi tokhom hi-a, ka khepek ngakna mun ahi hi. Hih mun in Israel-te laka ka ten tawntung nading mun ahi hi. Israel innkuante - amaute le a kumpite uh a paktatna bb uh le amaute munsang ah nuntakna a nei lo kumpite milimte cc in ka min siangtho a ninsak ngei nawn kei ding uh hi. 8 Amaute in ka kongpi zomah a kongpi uh koihin, ka kongmung gei-ah a kongmung uh a phuh uh ciangin amaute tawh kawm bek in hong hala a kihhuai gamtatna tawh ka min siangtho a ninsak uh hi. Tua ciangin ka heh suaka amaute ka susia hi. 9 Tu-in ahileh amaute paktatna le nuntakna a nei lo a kumpite uh milimte ka paikhiasak dinga amaute lakah ka teng tawntung ding hi.
10 "Mihing tapa aw, Israel mite a mawhna uh hangin a maizum theih nadingun biakinnpi thu a cingin gen inla 11 a gamtatnasate uh hangin a maizum uhleh biakinnpi a kilamzia - a kigualhzia, tumna le pusuahna, a buppi kigeelzia, a zat dingzia dd le thukhamte theisak in. Amaute in a kigeelzia tawh kizui-in a ngeinate khempeuh muanhuai-a a zuih theih nadingun amaute mai-ah gelh in.
12 "Biakinnpi tawh kisai thukham hih ahi hi: Mualtung a om huang kimkot khempeuh a siangthopen hi ding hi. Biakinnpi thukham hih bang ahi hi.
Biakna-tau
13 Hih biakna-tau tong kiteh hi a, tong ee khat a kici pen tong khat le zapek ff a sau hi. A kingakna tong khat thukin tong khat zai-a, a gei kimkota a geivial khap gg khat-a puam nei hi. Tua hi-a hih in biakna-tau sanna ahi hi. 14 Lei-a a kingakna pan a vial nuainung ciang tong nih sanga, tong khat zai-in, tawitawm neuzaw pan a zaizaw lama tehin asanna tong li hi-a tong khat a zai hi. 15 Biakna-tau taptung teng a sanna tong li hi-a a taptung kiu ah ki li a poto ding hi. 16 Biakna-tau taptung a ningkim hi-a, adung tong sawm le nih, avai tong sawm le nih mah ahi hi. 17 A sangtuam pen zong a ningkim mah hi a, adung tong sawm le li hi-in avai zong tong sawm le li mah ahi hi. A kimkot ah tong lang a sah geihual le tong khat a pha a ngakna a om ding hi. Biakna-tau kahlei nisuahna-lam a nga hi," a ci hi.
18 Tua ciangin amah in kei kiangah, "Mihing tapa aw, hih in Thupipen TOPA gen ahi hi. Hihte in biakna-tau a kidawh khit ciangin meihal biakna piakna le sisan theh nading ngeinate ahi hi: 19 Ka kianga hong pai ka mai-a biakna hong pia Levi mi Zadok innkuan pana siampite tungah mawhna hanga biakna-in bawngtal no khat na pia ding uh hi, Thupipen TOPA in cikhia hi. 20 A sisan tawm na la dinga biakna-tau ki lite nuhin a tau tungnungzaw pen kiu lite, a kimkota a geivialte khempeuh na nuh dinga tua bangin biakna-tau thoihdam in kisiangsak ding hi. 21 Mawhna hanga biakna dingin bawngtal khat na la dinga munsiangtho pualam biakinnpi huang sunga tua hih nadinga kisehna munah na hal ding hi.
22 "A ni nih ni ciangin kawkbaang lo keeltal khat mawhna hanga biakna-in na pia dinga, bawngtal-a siansuah bangin biakna-tau kisiansuah ding hi. 23 A kisiansuah khit ciangin ganhon lak panin bawngtalno khat le tuutal khat na pia ding hi; a nihin a kawkbaang lo hi ding hi. 24 TOPA mai ah na pia dinga, siampite in tuate tungah ci thehin TOPA tungah meihal biakna-in a pia ding uh hi.
25 "Ni sagih sung mawhna hanga biakna-in nisimin keeltal na zang ding uh hi. Ganhonte lak pan bawngtalno khat le tuutal khat na pia ding uh a, a nihin kawkbaang lo hi ding hi. 26 Amaute in ni sagih sung biakna-tau siansuahna bawl ding uh a, siangsak ding uh hi; tua bangin biakna-tau ap ding uh hi. 27 Hih nite a bei khit a nigiat ni-a kipanin siampite in meihal biakna le kilawmtakna biaknate hh biakna-tau tungah pia ding uh hi. Tua ciangin note kong sang ding hi, Thupipen TOPA in cikhia hi," hong ci hi.