Siampite ading Inndeite
42
1 Tua ciangin mipa in a tual puanung pen sung leilu-lam ah hong paipih a, biakinnpi tual le leilu lam panga kawm puanung tawh kigalsaina-a inndeite omna hong tun hi. 2 A kong leilu-lam nga innpi pen adung tong ca zakhat hi-a avai tong sawmnga ahi hi. 3 A tual sungnung zaw panin alangnih tuakin tong sawmnih hi-a, apuanung tual lama suangphah tawh kigalsai-in oma adawl thumin lam neu le lam neu a kimaingat dimdiam hi. 4 Tua inndeite mai sanah adung tong zakhat avai tong db sawm a pha lampi sungnung zaw a om hi. A kongkhakte leilu lamah a om hi. 5 A nuainung le a laita sualte sangin lamneute in munza khakzaw ahi manin a tungnungpen inndeite a neuzaw hi. 6 Dawl thumna-a inndeite in a tualte neih bangin khuampi a nei kei hi. Tua ahi ciangin a nuainung le a laita sangin a sual toizaw hi. 7 A puanung tual le inndeite tawh kitangin kawm puanung pen paikhawm hilhel a inndeite mai-ah om phei-in tong sawmnga mah a pha hi. 8 Apualam inntual zoma inndei kizom diudeute adung tong sawmnga a sau mah bangin munsiangtho tawh kinai pen panga kigualte tong zakhat a sau hi. 9 Inndei nuainungte in a pualama lutna tawh kibangin nisuahna lampang ah lutna khat a nei hi.10 Leitaw-lam pangah tual puanung ec pen kawm dungzui-in biakinnpi tual le a pualam tual kawm ah a kigalsai-in inndeite om a, 11 amai santak ah paikhiatna lampi a om hi. Hihte pen leilu-lam inndeite tawh kibang hi; adung avai kikima a phacia zong a kikim hi. Leilu lama kongkhakte 12 leitaw lama inndeite kongkhakte tawh kibang hi. Paikhiatna lampi bulah nisuahna lampanga kawm pai pen tawh a kibangin kongkhak khat om a, tua panin inndeite ah kilut hi.
13 Tua ciangin amah in kei kiangah, "Leilu-lam le leitaw lama biakinnpi tual lam a nga inndeite, siampite ading ahi hi. TOPA omna-a lut ding siampite in a siangthopen biaknate tua lai-ah a ne ding uh hi. Tua lai munsiangtho ahi manin an-a biakna, mawhna hanga biakna, khialhna hanga biakna-te a kipia a siangthopen biaknate tua lai-ah a koih ding uh hi. 14 Hihte a siangtho ahi manin siampite tua munsiangtho ah khatvei a lut khit uh leh biakna a piak sungua a silh uh puante tua lai-ah nusia ding uh a, tua khit ciangin a puanung tualah pai thei pan ding uh hi. Mipite om nading munah a pai ma-un puan dang silh ding uh hi," hong ci hi.
15 Biakinnpi sunglam pang a teh a man khit ciangin nisuahna kongpi ah hong paikhiatpih a, a kimkot khempeuh a teh hi. 16 A tehna ciangin nisuahna-lam pang teh a, tong fd zanga a pha hi. 17 Leilu-lam pang teh a, a tehna ge ciang in tong zanga a pha hi. 18 Leitaw-lam pang teh a; a tehna ciang in tong zanga a pha hi. 19 Tua ciangin nitumna-lam pang ah kihei-in teh a, a tehna cianga tehin tong zanga mah a pha hi. 20 Tua ciangin apang lite a phacia a teh hi. A kimkotah kawm nei-a, adung tong zanga pha-in avai tong zanga mah a pha hi. Tua pen munsiangtho le mun mawkmawk kikhenna ahi hi.