Lebanon ah Tamtaksing Khat
31
1 A kum sawm le khatna, a kha thumna a ni masa ni-in TOPA thu kei tungah hong tunga: 2 "Mihing tapa aw, Egypt kumpipa Pharaoh le a mipihte kiangah:"‘Na thupina kua tawh kiteh thei ding hiam?
3 Khatvei lai-a Lebanon ah tamtak sing ahi,
a teh tawh kilawm mahmah in, aliim in tulak a sung,
sangpi-ah a hiang zau a,
a teh a pha mahmah tunga a dawn dawk Assyria ngaihsun in.
4 Tui in an vaka a thukna-a
tuiphulte in sangpi in khangsak a;
a bulpi kimkot khempeuh ah
a luite luanga
a hawkguamte in
lo sunga singkung khempeuh zong a puak hi.
5 Tua hangin lo sunga singkung khempeuh sangin
sangzaw a,
a paipi khangin
kicingtakin tui ngah ahi manin
a hiangte sau in zaam hi.
6 Huih lak vasate in a dawn ah bu tom uh a,
a hiang zaam nuai-ah
gam sung ganhing khempeuh in
ta suahna-in nei uh hi;
minam liante khempeuh
a liim nuai-ah teng uh hi.
7 A zungte in
tui kicinna mun bansak ahi manin
a hiangzau tawh kilawmin
melhoih mahmah hi.
8 Pasian huana tamtaksingte
tua zahin hoih lo-a,
takkung hiangte zong
tua zahin hoih loin,
a hiangte zong taksing hiang tawh
tehkak theih ding hi lo-a -
Pasian huan sunga singkungte tawh
a melhoihna teh theih ding ahi kei hi.
9 Keimah in Pasian huan Eden sunga
singkungte khempeuh en’ dingin
kicingtakin ahiang ka phasak a,
a mel ka hoihsak hi.
10 "‘Tua ahi ciangin hih in Thupipen TOPA gen ahi hi: "A tehphate tung pekah a dawn khangto in a sanna a kisaktheihpihna hangin 11 ama gitlohna tawh kizui-in a thuaksak dingin minamte gam-ukte tungah amah ka pia hi. Amah ka pampaih a, 12 bangmah a khual lo gamdang minamte in phukpai-in nusia uh hi. A paipite mualte tung le guam sung khempeuh ah a tuk ding uh hi; a hiangte kitangawpin tua gam kuam thuk khempeuh ah kiseng hi. A liim beel leitung minamte khempeuh paikhia-in nusia uh hi. 13 Tua a puksa singkung ah huih lak vasa khempeuh giak uh a, a hiang kawmah gam sunga ganhingte khempeuh a om uh hi. 14 Tua ahi ciangin tui gei-a po singkung dang peuhmah in a tehpha tungah a dawn khangtoin a sanna uh a kisak-theihpih kei ding uh hi. Hoihtaka tui a kibuak singkung dang khat beek tua tanin a sang ngei kei ding hi. Amaute leinuai-a kawkhuka a paisa mite lakah a sih ding uh sehsa ahi hi.
15 "‘Hih in Thupipen TOPA gen ahi hi: Tua singkung hankhuk da sungah a kikhiatsuk ni-in tuithukpite thumna tawh amah ka tuam hi; a luite ka lehluansak a, a kicing mahmah ama tuite a kang hi. Tua singkung hangin Lebanon maikhinga, gamsunga singkung khempeuh a kungkeu hi. 16 Kawkhuk a paisukte tawh hankhuk-a ka khiatsuk ciangin ama pukna ging hangin minamte ka lingsak hi. Tua ciangin Eden a singkungte khempeuh Lebanon a, ahoih penpena a kitengkhiate, hoihtaka tui kibuak singkungte khempeuh leinuai-ah a kihehnem ding hi. 17 Ama limnuai-a a teng minamte laka a beelte zong namsau-a kithatte tawh kipawlin han sungah a tumsuk khawm uh hi.
18 "‘Eden sunga singkungte na ginatna le na thupina tawh a kiteh thei ding koipen om ahi hiam? Tua hi napi nang nangawn Eden singkungte tawh leinuai-ah hong kikhiasuk dinga; namsau-a kithat vun at lohte lakah na kisial ding hi.
"‘Hih in Pharaoh le ama mipihte khempeuh ahi hi, Thupipen TOPA in cikhia hi,’ ci-in gen hi,’ hong ci hi.