19
1 Hih in TOPA gen ahi hi: "Pai inla beelseekpa kiangah leibeel khat lei in. Tangpi upate pawlkhat le siampite tonpih in. Kongpi gei-a Ben Hinnom 2 Belthem Kuam ah pai in. Tua lai-ah kong gen thu tangko in, 3 ‘Judah kumpite le Jerusalem mite aw, TOPA thugen za un. Hih in Israel-te Pasian Thahatpen TOPA thugen ahi hi: Ngai un! Hih muna kong tunsak ding siatna pen in a za mite bil a vut ding hi. 4 Ahang in, amaute in kei hong taisan uh a, hih mun gamdang pasiante omna suahin; a pate uh le Judah kumpite in zong a theih ngei loh uh pasiante tungah kithoihna halin, mawhpengte sisan tawh hih mun a dimsak zo uh hi. 5 Amaute in ka thupiak ahi lo ka gen ngei loh, ka ngaihsut khak ngei beek loh Baal biakna-in a tapate uh hal nading Baal adingin munsang a bawl uh hi. 6 Tua ahi ciangin kidawm in TOPA in a geninah: Mite in hih mun Topheth ahikeh Ben Hinnom Kuam ci nawn loin Kigawhna Kuam a cih hun uh hong tung ding hi.7 " ‘Hih munah Judah le Jerusalem geelna ka siasak aa ding hi. Keimah in a that nuamte khutah amaute ka pia dinga a galte uh mai-ah namsau in a si ding uh hi; a luangte uh huihlak vasate le leitung ganhingte an dingin ka pia ding hi. 8 Hih khuapi a mite ka gamsak dinga mite kih ka suaksak ding hi; a nawkkhate khempeuh in a liammate uh hangin mullit-in a simmawh ding uh hi. 9 Amaute a that nuam a galte un a cihmawh laitak a lungdon hunun a tanu a tapate uh sa ka nesak dinga khat le khat a sa uh a kine ding uh hi,’ ci in.
10 "Tua ciangin na tonpihte muhin leibeel sukham inla 11 amaute kiangah, ‘Hih in Thahatpen TOPA gen ahi hi: Hih beelseekpa beel kitamzana a kipuah theih nawn loh bang tektekin hih minam le hih khuapi ka suzan ding hi. Amaute in mun-awng a om nawn loh dongin Topheth ah misi a vui ding uh hi. 12 Hih in hih mun le hih muna tengte tungah ka sep ding ahi hi, TOPA in cikhia hi. Hih khuapi Topheth ka bangsak ding hi. 13 Jerusalem a innte le Judah-te kumpite, amau innkhum tungah vana aksi honte khempeuh tunga gimnamtui a hal innte le pasian dangte tungah dawntheih-a biakna a sungsate khempeuh hih Topheth mun tawh a kibangin a nin ahi hi, ci in,’ hong ci hi," a ci hi.
14 Tua ciangin TOPA in thu gen dinga a sawlna mun Topheth panin Jeremiah kileh kika, TOPA biakinnpi tual ah dingin mi khempeuh tungah, 15 ‘Hih in Israel Pasian Thahatpen TOPA gen ahi hi: ‘Ngai un! Amaute ngawng khauh uh a, ka thugente ngai lo uh ahi manin hih khuapi le a kima om khuaneute tungah amau tungah tunsak dinga ka gensa gimna ka tungsak ta ding hi,’ ci hi," a ci hi.