Jeremiah Lungkimlohna
12
1 TOPA aw, nang tungah thu kong tut cianginna thumaan tawntung hi.
Tua hita leh na thutang thu kong kikuppih nuam lai hi:
Bang hangin migilote daupai uh ahi hiam?
Bang hangin upna nei lo khempeuh nuamtakin om uh ahi hiam?
2 Amaute nangma suansa hi uh a,
amaute in zungkha-in khangin a gah uh hi.
A kamun hong gen den napi
a lungsim uh tawh na kigamla hi.
3 Tua hita leh TOPA aw, kei nong thei a;
hong mu-in kong ngaihsutna nong sittel hi.
A kisehsat ding tuu bangin amaute kaikhiagawp in!
A kigawh ding uh ni ngakin tangkoihkhia in!
4 Bangtan vei gamsung vuaigawpin aa
lo sunga lopate vulgawp lai ding ahi hiam?
Bang hang hiam cih leh tua gama tengte gilo uh a,
vasate le gamsate mangthang khin ta uh hi.
Tua tham loin mite in,
"Ei tunga piangte hong mu kei na’nteh," ci uh hi.
Pasian Dawnna
5 "Mite tawh tai kidem a,
nang hong bahsak uh ahileh
sakol bangci dem theih ding na hi hiam?
Gamsung bb a nopna ah kimuktu na hileh
Jordan gei-a cc gampha lakah bang suak ding na hi hiam?
6 Na sanggamte le na innkuanpihte -
amaute nangawn in nang hong lehhek uh a;
nang hong langpangin nakpi-in awng uh hi.
Hong phatgen uh hangin
muang kei in.
7 "Ka inn ka nusia-a ka gouluahte
ka phiatmang ta hi;
Ka it ka mite,
tuanu galte khut sungah ka pia ding hi.
8 Ka gouluahte kei tungah
tulaka humpinelkai bang uh hi.
Tuanu in kei hong hawksana,
tua ciangin ka mudah hi.
9 Ka gouluah dingte kei tungah
sasial ne vasa gial khat,
sasial ne vasa dangte in a kimkot pan a tuk nainai uh bang hi lo hiam?
Pai-in gamsa gilote khawm inla,
a valhtum ding hong puak in.
10 Tuucing tampi in ka lenggui lo susia ding uh a,
ka lo a tuancilgawp ding uh hi;
a nuam mahmah ka lo
a kikhul lotul a suaksak ding uh hi.
11 Lotul kisuaksakin lei gawtakgawp a,
ka muhna-ah kinusia-in
a kem ding om lo ahi manin
gambuppi kinusiacip hi.
12 TOPA namsau in gammong khat panin
mong khat dong a vatmai nadingin
sehnel-gam khosang khempeuh panin
a susiate hong kuan ding uh a;
khat beek a suakta kei ding uh hi.
13 Amaute in mangbuh a vawh uh hangin lingkungte at ding uh a;
amaute a hahkat luat uh hangin bangmah a lawhtak kei ding uh hi.
Tua ciangin TOPA hehluatna hangin
maizumna bek na kaikhawm ding uh hi," a ci hi.
14 TOPA gen hih ahi hi, "Ka mi Israel-te ka piak gouluah a matsak ka veng migilote; amaute leitang panin ka botkhia dinga, amaute laka Judah innkuante ka botkhia ding hi. 15 Ahi hangin ka bawhkhiat khit ciangin amaute khuatuah kikin ama gam a luahna munuah ka puak kik ciat ding hi. 16 Tuateh ka mite omzia a sin ding uh a, Baal tunga kiciamzia ding ka mite nangawn a hilh bangun - ‘TOPA nuntakna lo-in,’ ci-a na kiciam uh leh - tua ciangin ka mite lakah amaute ka kipsak pan ding hi. 17 Ahi hangin minam khat peuhpeuh in ka thu a ngaih kei leh ka botkhia kiuhkeuh dinga, ka susia ding hi," TOPA in cikhia hi.