4
1 "Israel aw, nong kileh kik leh,kei kiangah hong kileh in,"
TOPA in cikhia hi.
"Ka muhna panin a kihhuai na milimte uh hemmang-in
gammang nawn lo-a,
2 thumaan thutang le a maan lampi ah tomlo in,
"TOPA nuntakna ka lo hi" ci-a na kiciam nak uh leh
tua ciangin amah in minamte thupha pia dinga
amaute ama sungah a minthang ding uh hi," ci hi.
3 TOPA in Judah mite le Jerusalem mite tungah a gen hih ahi hi:
"Na lotulte uh kal unla
linglakah vawh nawn kei un.
4 No Judah mite le Jerusalem mite aw,
TOPA tungah no le no vun ki-at unla,
na lungtang vun uh at un,
na tua cih kei uh leh na gitloh gamtatnasate uh hangin
ka heh suakin mei bangin kuang dinga -
kuama phelh theih lohin a kang ding hi.
Leilu Panin Siatna
5 Judah ah zasak unla, Jerusalem ah tangko in:
‘Gamsung bupah pengkul va mut un!
Nakpi in awng unla:
‘Na vekun kikaikhawm un!
Kulh nei khuapite ah tai ni!’ ci un.
6 Zion a pai nadingin dialkhai khai un!
A suakta dingin manlangin tai un!
Ahang in, leilu panin siatna hong tungsak a,
a lauhuai siatna lianpi ahi hi," ci un.
7 Humpinelkai khat a kua panin paikhia khin a,
minamte a susiapa kuankhia khin hi.
Na gam uh susia dingin,
a omna mun nusia khin hi.
Na khuapite uh kuamah teng loin
kisiacip ding hi.
8 Tua ahi ciangin ippi puansilh unla
kapin taamlo un,
ahang in, TOPA hehluatna
eite tawh kipelh nai lo hi.
9 "Tua ni ciangin kumpipa le
a uliante in a cih nading uh thei loin,
siampite lau mahmah ding uh a,
kamsangte a lauthawng ding uh hi," TOPA in cikhia hi.
10 Tua ciangin, "Ah, Thupipen TOPA aw, ka gawluah namsau kitah napi, ‘Lungnopna na ngah ding uh hi’ ci-in hih mite le Jerusalem-te khem cihtakin a khem na hi hi" ka ci hi.
11 Tua hun ciangin hih mite le Jerusalem a mite tungah, "Sehnel gama munsangte panin ka mite tungah 12 huihsa mahmah khat nung dinga, ahi hangin ansi zaapna le siansakna ahi kei hi; kei aa kiang pana nung huih a khauh lua mahmah hi. Tu-in amaute tungah ka thukhenna ka zasak hi," kici ding hi.
13 En un! Amah meii bangin hong kuankhia-a,
a sakollengte pingpei bangin hong pai in,
a sakolte, muvanlai sangin a manlang zaw uh hi.
Gimna hong tung ei! A kisia hi ta hang ei!
14 Jerusalem aw, na lungsim a gitlohna sawp inla, suakta in.
Na gitlohna lungsimte bang tanvei kemcip lai ding na hi hiam?
15 Thuzaksakna aw khat in,
Dan panin Ephraim mualneute pana siatna a tang ko hi.
16 "Hih thu minamte tungah gen inla,
Jerusalem tungah tangko in:
"Gamlapi panin a umcih ding galkap hong kuana,
Judah khuapite langkhatah galphuangin a kiko uh hi.
17 Tuanu in kei hong lehdo ahi manin,
amaute in lo hon bangin a kimkotah mite a umcih uh hi.’ ci in,"
TOPA in cikhia hi.
18 "Na gamtatna le na sepnate
nang tungah hong tu ahi hi.
Hih in na tuah ding dan ahi hi.
Bang a ci khaat tazen tam!
Na lungtang bang hong ci vutlet tam!" a ci hi.
19 Lunggim si’ng! Lunggim lua si’ng!
Lunggimin ka kilumlet hi.
Oh, ka lungsim gim lua!
Ka sungah ka lungtang kisai-a,
ka om hithiat thei kei hi.
Ahang in, pengkul aw ka za a;
gal husa ka za hi.
20 Siatna nungah siatna in nungzuih a,
gambuppi kisia ta hi.
Tomkha kalin ka puanbukte kisia a,
thakhatin ka kidalna a kisia hi.
21 Galsimna bangtan vei mu lai-in
pengkul aw bangtan vei ka za lai ding hiam?
22 "Ka mite hai uh a;
kei hong thei lo uh hi.
Amaute naupang thu thei lo hi uh a;
theihtelna a nei kei uh hi.
Amaute gitloh siam uh a,
a hoih sep ding a thei kei uh hi," a ci hi.
23 Leitung ka en a, lim le meel nei loin
a hawmpi hi a;
tua teh vantungte ah
khuavakte a om kei hi.
24 Mualliante ka en a,
kiliing damdamin;
mualneute a kivei kawikawi hi.
25 Ka en a, mi a om kei hi;
vana vasa peuhmah lengmang khin uh hi.
26 Ka en a, logam hoihte kolhmang khin hi;
TOPA mai, a hehluatna mai-ah
a khuapi khempeuh kisia khin hi.
27 TOPA gen hih ahi hi:
"Gambuppi kisia dinga,
ahi zongin ka susia khin sam kei ding hi.
28 Tua ahi ciangin leitung thum dinga,
tunga vante a mial ding hi;
bang hang hiam cih leh ka gensa hi-a ka khiam kei ding hi;
ka khensatsa ka dok kik kei ding hi," a ci hi.
29 Sakol-tuangte le thal tawite aw ging hangin
khuapi peuhmah tai kek uh hi.
Pawlkhatte gampha lakah lut uh a;
pawlkhatte suangtum lakah kahto uh hi.
Khuapi khempeuh hawm a;
kuamah a teng kei hi.
30 A gamh khinpa aw, bang cih ding na hiam?
Bang hangin puan ausan silhin
khama kizem na hi hiam?
Bang hangin na mitte zemin liapsak na hi hiam?
Nang le nang a mawkna-a kizem na hi ta hi.
Na lawmpate in hong ma ta uh a,
hong thah sawm uh hi.
31 Numei nausuak kuan kiko bang khat ka za a,
a tacil suak dinga tau khat -
Zion tanu husam liangin kiko a,
a khutte zaakin,
"Tazen aw! gim lua si’ng ei,
ka nuntakna mithatpa tungah kipia ta hi," ci-a kiko khat ka za hi.