Zion Ading Tawntung Hotkhiatna
51
1 No thumaan delhaTOPA a zongte aw, ngai un:
Note hong ki-eukhiatna suangpi,
hong kitawhkhiatna suangkuak en un;
2 Na pa uh Abraham le
na suahna uh Sarah en dih un.
Amah ka sap lai-in amah kia bek hi a,
amah thupha pia-in tampi ka phasak hi.
3 TOPA in Zion hehnem taktak dinga,
ama kisiatna khempeuh khuatuahna mitin a en ding hi;
ama sehnel-gamte Eden bangsak dinga,
a gamtulte TOPA huan bang ding hi.
Ama sungah lungnopna le kipahna,
lungdamkohna le lasakna awging a om ding hi.
4 "Ka mite aw, ka thu ngai un;
ka minam aw, ka thu za in:
Kei tung panin thukham pusuakkhia ding hi;
minamte tungah keima thutanna khuavak a suak ding hi.
5 Ka thumaanna hong kinawh mahmahin
ka hotkhiatna hong pai laitak hi a,
ka khut in minamte tungah thutang a puak ding hi.
Tuikulhte in kei hong en ding uh a,
ka khut sep ding lamenin a ngak ding uh hi.
6 Daktoin vante ento unla,
nuai-a leitung zong en un;
vante meikhu bangin mang dinga,
leitung puan bangin paatkhia-in
a tunga tengte tho bangin a si ding uh hi.
Ahi hangin ka hotkhiatna kip tawntung dinga
ka thumaanna a bei ngei kei ding hi.
7 "Thumaan thei a, a lungsimah ka thukham a vomte aw,
ka thugen ngai un:
mite kosiatna kihta kei unla amaute engkona hangin
patau kei un.
8 Ahang in, nget in puan a nek bangin amaute netummang dinga;
siim in samul a nek bangin amaute a valh ding hi.
Ahi hangin ka thumaanna bei ngei lo dinga,
khang tawntungin ka hotkhiatna a kip den ding hi," a ci hi.
9 Khanglo in, khanglo in!
TOPA ban aw, thahatna puan silh in;
a beisa nite bang,
tanglai peka khanghunte bangin khanglo in.
Rahab a atnenpa ganhing lianpi
a sunletpa nang hi lo na hi hiam?
10 Tatkhiatsate kantan theih dingin tuipi keusak a,
tui thukpi tuite a keusakpa,
tuipi sunga lamsialpa
nang hi lo na hi hiam?
11 TOPA tatsate a kileh kik ding uh hi.
La sa kawmin amaute Zion ah lut ding uh a;
amau lutungah a bei ngei lo lungnopna a khu ding uh hi.
Kipahna le lungnopna tawh kidimin
dahna le khuisatna a mangthang ding hi.
12 "Kei, kei mahmah note hong hehnempa ka hi hi.
Mihing hi lel a, mihing tapate ahi lel,
lopa bang lelte a kihta nang kua na hiam?
13 Nang hong Bawlpa TOPA -
vante zala leitung bulpite
a phutpa a mangngilh nang,
mi nengniamte thangpaihna hangin
lauthawngsa-a nungtapa,
siatna bek tupa nei pa nang kua na hiam?
Ahang in, mi nengniamte thangpaihna koi-ah om ahi hiam?
14 Thong kia-a kunte kikhahkhia baih ta ding hi;
amaute thong hawmpi sungah si lo ding uh a,
anlum zong a kitasam kei ding uh hi.
15 Ahang in keimah in nangma Pasian TOPA,
tuihualte a hawk nadingin tuipi a lawkgawppa -
a min Thahatpen TOPA ka hi hi.
16 Na kam sungah ka thute ka guang khina,
ka khut liimin nang kong sung hi -
vante a munah a omsakpa,
leitung bulpite phuta,
Zion tungah, ‘Note ka mite na hi uh hi,’ a cipa keimah ka hi hi," a ci hi.
TOPA’ Thangpaihna Hai
17 Khanglo in, khanglo in!
Jerusalem aw, tho in,
nang in ama thangpaihna ahi -
mite a amsak hai a tawdat dongin
TOPA khut panin
na dawna na kham khin hi.
18 Tuanu sunga piang tapa khempeuh
amah lam a hilh ding khat beek om lo a;
ama khoisa tapa khempeuh
a khuta len ding khat beek a om kei hi.
19 Hih tuahsiatnate a thuapin hong tungta -
kua in hong hehnem ding hiam?
Kisiatna le maimanna, kialpi le namsau -
hong tung hi kua in hong dahpih thei aa ding hiam?
20 Na tapate bah khin uh a;
lam lian bul tengah
lenthanga awk sanang bangin lum uh hi.
TOPA thangpaihna le na Pasian taina tawh
amaute kidim uh hi.
21 Tua ahi ciangin zu hi lo napi
a khama hingimpa aw, hih thu za in.
22 Hih in na Pasian Thupipen TOPA
ama mite a hupa gen ahi hi:
"En in, nang hong hoisak
hai na khut panin ka lakhia khin hi;
tua hai panin ka thangpaihna haipi
na dawn kik ngei nawn kei ding hi.
23 No hong gentheisaka no tungah,
‘No tung ka tot theih nadingin
na khupbawh unla lampi-a kitawn lamlian bangin
na nungzang uh na dawh un,’
hong cite khut sungah ka koih ding hi," a ci hi.