Babylon’ Langah Genkholhna
21
1 Tuipi gei-a sehnel-gam tawh kisai thusuak:Pingpeite in leitaw-lam a kantan bangin
sehnel-gam pan - a lauhuai gam panin
a sim ding khat hong kuan hi.
2 A kihtakhuai mangmuhna khat kei hong kilak a:
Migilopa in lehhek a, a luhpa in a luh hi.
Elam aw sim in, Media aw umcih in!
Ama piansak taunate khempeuh ka beisak ding hi.
3 Hih bangin na sa-in ka gawnggawp a,
numei nausuak nat bangin natna in hong tun hi;
ka zak thu hangin ka genthei a,
ka muhte hangin ka lung mang hi.
4 Ka lungsim hema,
launa in hong lingsak hi;
ka ngaklah nidial kei tungah
launa a suak hi.
5 Amaute in sabuai gualin
sualphah puan phah uh a,
ne in a dawn uh hi!
No uliante aw, tho un
lumte sathau nuh un!
6 Topa in kei tunga hong gen hih ahi hi:
"Pai inla galvil khat omsakin
a muhte gensak in.
7 Sakollengte
a sakolte tawh
laa tunga tuangte ahikeh
kala-oh tuangte a muh ciangin
beltakin, belcingtakin vil hen,"
hong ci hi.
8 Tuateh galvilpa aa kiko a,
"Ka topa aw, ni khat khit ni khat galvilna-tau tungah ka ding hi;
zan simin ka vilna munah ka om hi.
9 En in, sakolte kaih sakolleng-in
mi khat hong pai hi.
Amah in dawng kik a:
‘Babylon puk khin, puk khin ta!
A pasiante limte khempeuh
lei lakah kitamzan ta!’ ci hi," a ci hi.
10 Ka mite, ka ancilna phuala cilsate aw,
Israel Pasian tung pan,
Thahatpen TOPA tung pana
ka zaksa kong gen hi.
Edom’ Langah Genkholhna
11 Dumah bb tawh kisai thusuak:
Seir panin mi khat in kei hong sam a,
"Galvilpa aw zanhun bang tan om lai hiam?
Galvilpa aw zanhun bang tan om lai hiam?" hong ci hi.
12 Galvilpa in,
"Zan zong hi ta a, zingsang hidek ta hi;
nong dot nop uh leh hong dong un;
hong kileh kik unla hong dong lai un," ka ci hi.
Arabia’ Langah Genkholhna
13 Arabia tawh kisai thusuak:
Dedan mi khualzin honte
Arabia gamlak a giahphual satte aw,
14 a dangtakte adingin tui puak un;
no Tema a tengte aw,
galtaite adingin an puak un.
15 Amaute namsau pan,
a kidoksa namsau panin
thal keksa pan le
gal husa pana taite ahi uh hi.