Egypt le Cush’ Langah Genkholhna
20
1 Assyria kumpipa Sargon in a galkap mang lianpenpa sawlin Ashdod sima a lak kumin - 2 TOPA in Amoz tapa Isaiah tungtawnin thu gen hi. Ama kiangah, "Na ippi puan suahkhia inla na khedap kaih zong suah in," a ci hi. Amah in a cih bangin hih a, a guaktangin a kheguakin a pai kawikawi hi.3 Tua ciangin TOPA in, "Egypt le Cush ca tungah lim le a siahil ahi dingin ka nasempa Isaiah a guaktangin a khe guakin kum thum sung a pai bang tektekin 4 Egypt galmatte le Cush koltangte a moi a hamin - Egypt maizum nadingin guaktang le kheguakin tawbo dawksa in Assyria kumpipa in a paipih mang ding hi. 5 Cush a muangte le Egypt a kisaktheihpihte lau-in a maizum ding uh hi. 6 Tua ni ciangin tui gei-a tengte in, "Ei muan mite, Assyria kumpipa pana hong huh ding hong hukhia ding ci-a i belhte bang suak ta uh hiam, en dih un! Bang ci suahtak thei nawn ding i hi hiam?’ ci ding uh hi," a ci hi.